#مـاذنبي..!
الحلقـه 7.
نوكوميس"فتــــــــــاة القمر"
قدام المستشفى، كـانت سيـارة الاسـعاف دايره ضجه بصوتها العالي معلنه الاستنفار، عن وجود حالات داخلها، حيه او ميته مش معروف!؟
الممرضين متجمعين يجرو في الباريلات بسرعه.. ومن بعد مـا أعطى الممرض اللي في الاسعاف كل التفاصيل عن حالتهم،قال دكتور بصوت عالي"دخلوها لي غرفة العمليات بسررعه".
الممرضه: قاعد فيه نبض عنده كسور،ومش بعيد يكون عنده نزيف داخلي
الدكتور: ديريله اللازم،وكلمي الدكتوره أسمـاء بسرعه
أمـا وائل اللي كان واقف ع الريسبشن وهوا يسأل في البنت اللي واقفه
وائل: تأكدي من المنظومه اتصلوا بيا وقالولي في المستشفى هادي
البنت: تأكدت مافيه حد بالاسمـاء هادي
وائل مسح ع وجها: لا حول الله ياربي
جت ممرضه شاده في يدها ملف ومداته للبنت؛ هادي حالات جديده دخليهم للمنظومه كل شي مكتوب في الملف
وائل: اكيده منهم
فتحت الملف: اي صح، البنت في غرفة العمليات والراجل في قسم الجراحه..
ومن اللاوعي مكانش مركز غير في حالة خوه،بسرعه امشي لي قسم الجراحه ووقف قدام غرفة العمليات.
وهوا ماشي جااي
_______________________
الـسّاعه الخمسه الفجر..
صلت رانيا وكملت صلاتها وفي وقتها رفعت يديها ودعت لي روحها ولي امها وبوها وعيلتها،وفي الأخيـر قالت،اللهم هون ثم أرح ثم إشفي كُل نفسٍ لا يعلم بوجعها إلـا أنت
فتحت فـاطمـه الباب بتع الدار ف وقفت رانيا لي امهاا
رانيا: بتمشو توا؟
فاطمه: اي هوا هذاك بنطلعو بكري
رانيا: باهي طمنوني عليكم،وين بابا!
فاطمه؛في السياره يراجي فيا،اهو عطاك المفاتيح وقالك زي ماوصيتك
رانيا حضنت أمها: توصلو بالسلامه يارب
فاطمه: انشاء الله.. شافتت لي روان،وقالت
؛ماتملش من النوم،ردي بالك بنيتي ع الحوش في غيابنا ونساوين خوتك عينك عليهم مش تسكتيلهم يركبو فوق ضهرك وهما راكبين
رانيا: ماتشغليش بالك
فاطمه: هي مع السلامه توا
رانيا:سلامات..
وودعت أُمـهـا للمره الأخيره وسقدتها لي فم الباب أشرت لي بوها بيدها وخشت،تندهت وهيا تشم فس هواء الفجر،وخشت
_______________________
إسـراء شاده ولدها اللي كان يعيط وماشيه ديرله في الحليب تلاقت في طريقها مع أمها اللي كـانـت مقعمزه ع الصالون وفي يدها الهاتف..
إسراء فتحت الضي: ماما،خيرك قاعده نايضه
فوزيه: نتصل بخوك مايردش
إسراء:اكيده راقدين
فوزيه: لالا مستحيله مايرقدش توا المفروض نايض يصلي في الفجر
إسراء: خلاص امالا اكيده يصلي ومش رافع موبايله معااه
فوزيه: باهي وخيره هيثم ووائل مايردوش اكيده فيه حاجه،أنا نبي نروح خلاص..
إسراء: شن بيكون فيه الله يهديك! غر ارقدي توا وبعدين ساهل،جربتي تكلمي محمد؟
فوزيه: حتى هوا مايردش وبوك مايردش
إسراء: انشاء الله خير
فوزيه: خيرك انتي نايضه شنو يعيط!
إسراء؛ اي مارقدش بكل شكله غازات
فوزيه: هاتيه عليك وبري ديرله شيشته،
خداته فوزيه وهيا تلعب فيه لكن في قلبها شي مش مريحها.
