#مـاذنبي..!؟
الـحـلقـه التـاسعه
نوكوميس"فَـتَـاةُ، الــــقَــمـر".
_____________
في المستشفى، مدت رانيا شيشة الميه لي أمـها اللي كـانت منـهاره نوعًـا مـا.. ؏ وضع جبريل من بعد ماجاته جلطه مفـجـأه سببتله في إعاقه في الجزء السفلي يعني بدي مقعد
رانيا: خلاص يَـاماما ماديريش في روحك هكي بعدين ماسمعتيش الدكتور شن قال!
فاطمه: ياودي ماندري مازال ينوض منها طيحته قويه
رانيا: معاش تقولي هككي
وسكتو فاطمه ورانيا لما شافو سالم جاي من بعيد
سالم: انتي نوضي روحي
رانيا برفعة حاجب: أني؟
سالم: امالا منو؟ هوينه عبد الرحمن يراجي فيك برا وامي خلي تقعد نع بوي
رانيا: مش مروحه، تبيني نخلي أمي بروحها؟
سالم فنص فيها: قاعد شاد روحي عليك الانه في مستشفى وفيه ناس ماتخلينيش نقتلك توا
فاطمه: ضم فمك واسكت طايح في اختك حداي لا عاد تتحشم ولا تستحي؟ وانتي نوضي روحي مع خوك انا مايصيرلي شي نوضي تحركي
ناضت رانيا غصبًا عنها شافت لي سالم وللمره الأولى تجرب شعور الكره في حياتها! خوها من لحمها ودمها يعامل فيها في هالمعامله، وفي نهايه ركبت مع عبد الرحمن وامشت.
______________________
شروق: ماما؟ علاش تقطعي بنصيب البنت موده قعده صغيره ره علاش تحطي فيها في الهم من توا
صالحه: هم شنو! هيا موافقه وتبي
شروق رفعت حاجبها؛ موافقه؟!
صالحه: اي اي غر يروح هوا وامه بتفتح معاه الموضوع
سكتت شروق وهيا تفكر من بعد ما طلعت امها من الدار وامشت تصلي،خشت موده وهيا مضايقه وراقيلها
نوده:علاش تقولي لي ماما هكي؟ انتي شن دخلك فيا أنا اللي بنخش للهم ولا انتي!
شروق: مش حاجه ره بس استغربت والله قصدي انتي صغيره عليه هلبا مش شويه
موده: عادي وشن فيها
شروق: صراحة انا الفكره نحس فيها ثقيله،فراس! راجل روند اللي نشوفو فيه زي خونا
موده: انتي تشوفي فيه زي خوك مش اني
شروق بصدمه؛ شن تخرفي يابنت
موده: انا اللي من قبل نحبه،وهوا مش معبرني
شروق: والله؟ ماعنداش حق اصلا مفروض تزوجك انتي وطلق روند قبل لا تموت..شن تخرطي انتي واكله حاجه مش ليك؟
موده: أنـا نحبت باههي نحببه افهميها هااذي ومع الوقت ح يحبني متأكده،في نهايه أني ح نقعد مرته
شروق: ياربي هالبنت بتجلطني،وانتي واثقه انه موافق!
موده: اكيده منهيا اللي بتقبل بيه عنده بنت غيري اه؟
شروق: تعرفي تنوضي من قدام وجهي!
موده: حسد هذا كله ولا شنو بضبط؟
شروق ضحكت: حتى روند اللي كان يحبها ماقالت هالكلام نوضي سلم وخيتي عندك قرايه،نزلتي باقي موادك؟
موده قلبت عيونها: مادخلكش فياا..
شروق طلعت هاتفها: أحست شي نتصل بمنير يجي يروح بيا الانه كلامك يرعش وكان بنقعد معاك شويه تانيه احتمال بنضربك طريحه
موده طلعت من جنبها وخلتها بروحها،بينما شروق اللي هزت راسها بآسف على تفكير أختها طلعت هاتفها واتصلت براجلها.
________________________
صكرت روان الباب وتأكـــدت إنـه مافي حد وراها وردت ؏ هاتفها اللي كان يرن.
روان بصوت مبحوح من البكي: الو
كنان: حبيبي وينك مغيبه عليا؟
روان: بابا مريض ورفعوه للمستشفى،وانا خايفه عليه
كنان: لا باس عليه امتى صار هذا؟
روان: امس في الليل تعب ورقدوه،
كنان: باهي وشن قالوله؟
روان انهارت بالبكي: جلطه مفـاجآه اثرت عليه هلبا تخيل بابا معاش يقدر يمشي ولا يتكلم طبيعي زي قبل
كنان بضيق: خلاص ياروحي،ماتكبيش اشربي ميه وارتاحي وبإذن الله يرجع زي قبل،مع العلاج الطبيعي يبقى كويس
روان مسحت دموعها ورشفت خشمها: ياارب،خايفه يصيرله شي
كنان: ماتخافيش عليه انتي بس ادعليه ربي يرجعه زي قبل
وتمت روان تهدرز مع كنان اللي كان يحاول يهديها قد مايقدر،لكن ماكنتش منتبها بأنها ماصكرتش الباب كويس وراها!!
