#مَـاذنبي..!
الحلقه6
نُوكوميس"فتاة القمر"
ناضت رانيا مخلوعه من الكابوس اللي تكرر مش مره ولا اتنين لا هلبا مراات حاطه يدها ع قلبها،وملامح الشخص بدتلها مألوفه تحاول تفكر تجمع اي شي بس ماقدرتش،راسها يوجعها من تفكير،شافت لي روان اللي كانت راقده في نوم عميق ومش سأله عن الحياه،هيا حسدت اختها اللي مش عاطيه لأي شي في دنيا أهميه كل شي عندها عادي،عكسها هيا اللي ديما تعطي للمواضيع اكبر من جحمها ديما خايفه من الدنيا ومشاكلها،ديما الخوف يحاوط في تفكيرها.
شافت لي ساعه فكانت التسعه صبح تقلبت يمين ويسار مجهاش النوم وهكي قررت انها تنوض ادير الفطور،وفعلا نزلت للمطبخ وبدت تجهز في الفطور ع خشت أمها..
رانيا: صباح الخيرات
فاطمه: صباح نور شن منوضك من توا!
رانيا: معاش جاني النوم،قلت خلي نوض ندير الفطور ونريح الحاجه فاطمه
فاطمه: سلمها بنيتي الفالحه مش زي خميرة النوم هديكا
رانيا وهيا تقرض في الطماطم: اي امتي بتمشو لي خالتي شويخه
فاطمه: لن نمشو لي كنة عمتك قبل
رانيا: امتي لمتها
فاطمه: عمار بيمشي لي صحراء توا ومدابيهم يديروها توا فيسع، امس كنت نكلم في صبرريه
رانيا: باهي كويس
فاطمه تساعد في بنتها: قالتلي الخميس الجاي يبو يديرو لمه والجمعه عقيقه للرجاله بيذبحو
رانيا: ماتقوليليش بري الانه مش ح نمشي
فاطمه: لا ياروح امك بتمشي بسيف عليك
رانيا: ماما فكيني بالله عليك
فاطمه: مانبيش نساوين خوتك ياخدو راحتهم في الهدرزه وانتي مهناش نبييک توقفي فوق روسهم
رانيا: الله أكبر ع تفكيرك
فاطمه: امالا شنو مانخليش حد يتكلم عليك،خلي نوض بوك نقوله يجيبلنا خبزه ترا شوفي الحليب كانه تم خلي يجيب
طلعت فاطمه،اما رانيا تنهدت وهيا تقول: فيهه حلييب لكن مافيش هريسه
"____________________
امـا فراس اللي كان يسخن في السياره ويراجي في روند تطلع وهوا حاسس براسه بيتفجر من قلة النوم كان متكي ع الكرسي ولابس نضراته الشمسيه مغمض عيونه..
فتحت روند الباب وهيا تقول
: آخخخ بطني معاش يناسبني ننزل ونرقى من الدروج كل شويه
فراس ماردش،ف شافتله روند وخبطاته ع كتفه.
روند: حبيبي!
فراس: ها،شن!
روند: رقدت
فراس: نحس في راسي بيتكسر امس مارقدتش كويس
روند: سلامتك رد بالك من الطريق ره تصيرلنا حاجه
فراس: هوا هذا..مش ترقدي وتخليني نرقد حتى اني ومعاش نندري عليها وين تخش بينا
روند: لا ماتخافش امس رقدت كويس.
فراس: انتي امتى عندك موعد عند الدكتوره!
روند: مزال شويه هكي نص الشهر
فراس ابتسم: تو بتعرفنا شن جنسيته
روند: اكيده
________________
ع سفرة الفطور، قال عبد الرحمن اللي نازل يفطر معاهم الانه مرته مش مفطراته..
عبد الرحمن: يابوي الولد يجري في جرتي ويقولي ردهاالي كان هذا شن راايك!!
فنصت رانيا في امها واختها،الانهم مش متوقعين انه الموضوع ح يوصل لي اهني
جبريل: اني قلت لا يعني لا شن بتكسرلي كلمتي بعد هالعمر ولا كيب!
تريحت رانيا من داخلها شويه
عبد الرحمن:بالك تعالج وبدي حاله باههي
جبريل: تعالج ولا متعالجش شن تحساب ماعنديش كرامه باش نعطيهم بنتي تاني
ناض جبريل من جنبهم وهوا راقيله.
فاطمه:خيره مرتك ماتنزلش
عبد الرحمن ياكل ببررود: ماتبيش تنزل
روان بصوت واطي: مقرفين
عبد الرحمن: انتي كان ماتسكتيش راسك المربع هذا نوض نكصره
رانيا ناضت من جنبهم وهيا قالقه من الموضوع اللي صار قبل شويه الاحرف لو يسمع سالم
كملو فطورهم والوضع عندهم مهزوز ومش كويس عبد الرحمن كهربلهم جوهم
