#مـاذنبي..!
الحلقه 5
نوكوميس" فتاة القمر"
تعالت صوت الزغاريط في حوش الحـاج عبد السلام بعد ما سمعت فوزيه انه ولدها الكبير ربي رزقه بذريه وعطاه من غامض علمه، زيه زي خوته.
عبير وهيا تغسل في الماعين: هذا وين بتعيش ملكه
ليلي: هيا عاد من قبل الكنه المفضله
عبير: أنا مش فاهمه هالجو اللي دايرينه وكان بنت اختها يعني شن الفرق!
؏ خشت راسيل اللي قالتلهم؛ جو نساوين باش ديرو القهوه وتحطو من الحلاوات
وطلعت.
عبير: هذا ما ناقص عقاب فرخه تتأمر علينا،خيرها ماتجيش الدير معانا تحساب روحها صغيره
ليلى: اسمعي واسكتي كان تقولي كلمه تطلعي انتي قليلة الأصل وإنتي اللي ماتنفعيش
سكتت عبير وهيا مضايقه بكل،حاسه انه هيا الكنه الغير مرغوب فيها بينهم،يعاملو فيها معاملة انها برانيه ومش منهم،في نهايه هيا مش زي ليلى اللي يعرفوها من زمان وهيثم خداها عن حب،ولاهيا زي روند اللي تكون بنت خالتهم وخداها فراس عن حب
أبداً هيا مش هكي، عبير تكره المعاملات الإستثنائيه تستفز فيها حرفيـا،الانه اللي قاعد يصير لا يطاق في وجهة نظرها،ف قررت انها تتفاهم مع وائل باش يديرلها حل للوضع اللي هيا فيه،تبي تحط حدود لي نفسها
'____________________
أما عند روند اللي كانت متكيه ؏ السرير جنبها امها واختها وعزوزها وسلفاتها اللي بعد ماكملو حوسة حوش شيابينهم ركبولها كدلك دنيا اللي ماليهاش كيف خاشه.
صالحه: ردي بالك على روحك بنيتي ماتعبيش روحك
شروق مدتلها طاسة ميه: وخودي دواك اول بأول مش تنسيه
فوزيه: العفو ياصالحه توصي فيها واني موجوده مانخليهاش نقيم اليبره من ع الاررض
عبير وليلى شافو لي بعضهم اما فوزيه كانت مورقتلهم فـ قالت
: بعدين اهو سلفاتها يعونوها ومايخلوهاش تحتاج شي،كل يوم وحده تبعتلها غداها،ولا شنو ياعبير؟
عبير ابتسمت بغيض: اكيده امالا شنو من غير ماتوصي
دنيا: ليك شهرين حامل وماحسيتيش بيه وتوا لما قالولك حامل بديتي تتدلعي عاد.ههههه
روند بابتسامه مجامله: ومن قالك مانحس في شي غر اني مانقولش
دنيا: اي،راهي فراس مايحبش الدلع الزايد انتي عارفتيه راجل معنقر من الجيل الذهبي
صالحه: وانتي مالك ومالها هيا وراجلها
فوزيه: ههههه اعطيك السلامه ياصلوحه دنيا تبصر ماتعرفيهاش
عجبها عبير كلام دنيا رغم انه هيا وياها مش في الابيض وابتسمت ع جنب
أما شروق بعد ما اتصل بيها راجلها وقاللها هيا ناضت جهزت روحها باش تروح،خدتها صالحه ع جنب بعيد عليهم
صالحه: انتي خيره جوك هكي من لما جيتي وضعك ماعجبنيش
شروق: مافيا شي غر مريضه شويه هي منير يراجي
صالحه: ع خاطر الصغار؟
شروق: المشكله مش اهني وبس المشكله انه انه تزن عليه يتزوج وحده تانيه تخيلي
صالحه: هالمنوجها هاادي
شروق: ع اساس راس ولد وتبي تشوف صغاره،نفكر نطلق ونتسريح
صالحه فنصت عيونها: نهارك احرف ردي بالك تفكري حتي تفكير فيه ماعندناش بنات يطلقو شن يقولو علينا الناس شن ماتعرفيش طبع بوك ولا شني؟والله مايسمعك تقوليها يقصلك راسك امشي روحي مع راجلك..
نزلت الشروق وهيا في صدمه امها اللي كانت متوقعتها تشجعها او تريحها حتي بالكلام زادتها ع همها همم،
طبيعي جداً ف مش كل الامهات زي فاطمه،ومش كل الابهات زي جبريل.
_________________________
