رحلة احلام

منعثر زرزور 25

منعثر زرزور25

بعد اسبوع او اكثر من شوفتي لمنعثر زرزور.. جتني ست زهراء للبيت حتى تطمن على احوالي كالعادة .. من ما اروح لها تجي هي تزورني ..

حچيت لها على السالفة اللي سمعتها من ابو جواد عن منعثر فاكدت لي السالفة وحذرتني ابتعد عنه وما انطي وجه حتى لا يكررها ويجيني للبيت .. كانت تعرف عنه كل شي .. سكير ونسواچي ومحتال ومتلون .

بوقتها عرفت منها بان بابا يمتلك قطعة ارض سكنية – عرصة - بحي المعلمين على شارع الفرزدق ومساحتها كلش زينه .. وخيرتني اذا كنت محتاجة حتى ابيعها حصتي من الارض .. او نتركها للمستقل الى ان يكبرون اخوتي .. او تصير عندنا امكانية ونبني بيها بيت ..

كان بودي يكون لي بيت لوحدي .. كنت احلم بالبيت .. الخرابة اللي مأجرتها قديمه هوايه وكل ما تمطر الدنيا اتوقعها تو گع فوگ راسي .. بس ما بقى عندي فلوس يبنن بيت .. فلوسي اللي بدفتر التوفير ما عاد يجيبن كيلوين شكر .. بعد ما كان بامكاني اشتري بنص منهن قطعة ارض سكنية بارقى مكان بالديوانية .. فطلبت منها تتركها بالوقت الحاضر الى ان تتغير الامور .. بعدين كانت هناك عقبة اخرى گدامنا .. وهي اخوي سنان .. اللي له حصة بالارض حاله حال غسان وغزوان .. اما ماما فتيقنت بان بابا مطلگها غيابي قبل لا يتزوج ست زهراء .. حتى يتخلص من اشكاليات مساءلته عنها بعد سفرها .. وبعدين ما كانوا يسمحون له يتزوج من نسوان اثنين الا بعد موافقة الزوجة الاولى .. فما كان گدامه حل ثاني غير يطلگ ماما حتى يتزوج ..

وعرفت من عندها بان الشركة منذرتها باخلاء بيت المطاط ورايحه بوقتها لمدير عام الشركة ومتوسطته حتى تبقى بي الى ان تفرج وتشوف لها صورة حل .. والرجال مقدرها هوايه بعد ما عارف بيها مسؤولة بالحزب وباتحاد النساء ..

استاذنت مني حتى تبني بجزء من القطعة مشتمل وتخلي احتياط تحسبا للمستقبل .. تخاف لا فد يوم يجبروها على اخلاء بيت الشركة .. فوافقتها ..

اخذتني بيومها ورحنا شفنا العرصة .. كانت بمنطقة كلش راقية قياسا للمكان اللي اسكن بي .. بس بعيدة عن السوگ .. ابعد من مدرسة مولود ..

من مرينا بالشارع المحاذي للمدرسة .. اشتكيت لها لست زهراء من بعد المدرسة .. وشرحت لها شلون مولود المسكين يرجع متگطعات رجليه من المشي .. فاعتذرت لان كانت هي السبب بنصيحتي باختيار المدرسة ووعدتني من تنهي السنة تنقله لاقرب مدرسة على بيتنا .

&&&

بعدها بايام زارني منعثر للبيت .. كان جايب مواد غذائية كاملة .. طحين وشكر وتمن وچاي ودهن ومعجون .. وكل شي يحتاجه البيت ..ما كنت موجودة بالبيت .. رجعت من السوگ لگيت المواد مخليها بالمجاز ورا باب الحوش .. قبل لا اسال جاوبني مولود :- ماما هاي عمو زرزور جاب كل هاي الكمية .. گال سلم لي على ماما .. باچر امر لها .