رحلة احلام

ست زهراء 30

ست زهراء 23

من طلعت ست زهراء من عندنا اخذت گلبي وياها .. حسيت بالوحدة .. ما بقى لي احد بهاي الدنيا من ريحة بابا .. كان بودي اروح وياها .. بس فكرت بالولد ومستقبلهم .. خاف بسوريا ما الگالهم مدارس ويجوز ما اتمكن من الطلعة لالمانيا .. لان الولد ما عندهم جوازات سفر .. وجواز سفري صار له اسنين منتهي ما جددته .. والمستمسكات الرسمية اللي تثبت ولادتي بالمانية صادرة من المانيا الشرقية واحتمال ما يعترفون بيها حاليا .. بعد ما توحدت الالمانيتين .. هاي عدى الفلوس .. ما كان عندي فلوس اتمكن من العيشه بيهن بسوريا .. والثنعش ورقة اللي انطاهن حسن لمولود ما اريد الوث نفسي بيهن .. واذا اضطريت واخذتهم ..!! ما راح يعيشنا هوايه .. ولا اريد اصير عالة على ست زهراء .. الله واعلم شگد بقن عنده فلوس .. المال الما ينزاد خلصن .. والمره قطعوا راتبها .. فاللي عندها بالتاكيد ما راح تتمكن تعيش بيهن .. وتعيش بيهن اخوتي سنين ..

كل الليل بقيت افكر بست زهراء وباللي راح يجرالها ويجرالنا .. فقررت انتظر المدارس .. اذا ما فتحت لنهاية السنة ادبر حالي واخذ الاولاد واطلع لسوريا ومناك بلكت اتمكن اسافر لالمانيا .. وهناك العيشة تدبر .

بعد يوم او يومين .. جوني للبيت ام حسن وحماية وليد اللي بوقتها خلص قانون وكان متعين كاتب عدل بمحكمة الديوانية .. فرحت بيهم اول ما جوني .. تصورت جايين دا يتطمنون علي ..! ويشوفوني شمحتاجه ..!!

بعد ما سلموا وگعدوا .. حسيت اكو انَّ بسوالفهم .. ماجابو طاري حسن .. حسبالك يدرون مار علي ..!! من حچيت لهم على سالفة جيته وعلى الفلوس اللي شمرهن علي .. شفتهم ما اهتموا للامر .. وحاولت عمتي ام حسن تحببني بحسن وتنسيني ماضيه ..

المهم .. لافها وليد للسالفة .. منا .. وجابها منا .. واخير شي .. طلب من عندي مفاتيح بيت بابا .. گال :- البيت يوميه يجون علي جماعة دا ياخذونه .. ونطلع نمنعهم .. فنخاف لا تجي عائلة .. على غفلة .. وتگعد بي وتسويلنا مشاكل .. فافضل شي انطيني المفاتيح حتى ابقى بي ليل ونهار .. منا ليما نشوف شيصير ما يصير .. ونتصرف ..

المفاتيح ما كانن عندي .. بس ست زهراء دلتني وين مخليتهن .. حتى لا يضيعن منها ..

بالبداية تعذرت من وليد .. وحلفت له المفاتيح ما عندي .. وكنت صادقه بحلفاني ..

بعدين اندار على سويچ سيارة ست زهراء .. فمن جاب طاريها طلبت من عنده يلگا لي مشتري الها .. لان ست زهراء امنتني عليها ..

كنت مأمنه بوليد هوايه .. بعدين هو مو غريب عني ..!! حماية ..!! ما معقولة يغدر بيَّ ..!!

شفت حچايته بخصوص حماية البيت معقولة فدليته على مكان المفاتيح وانطيته سويچ السيارة وترجيته يحافظ عليها باعتبارها امانه .. الى ان يلگا لها مشتري ويبيعها .