رحلة احلام

الهجرة 31

الهجرة

رغم تعب الطريق .. بس بذيچ الليلة ما نمنا لوجه الصبح .. طارت النومة من عيونا .. ست زهراء كانت متشوقه تسمع كل شي عن الديوانية .. حچيت لها عن حسن وعن اللي سوا بينا .. وطلعت لها الدولارات اللي شمرهن علينا تعويض عن قيمة السيارة وانطيتهيا ..

بالبداية ما قبلت تاخذهن .. الا بعد ما حلّفتها ..ولحيت عليها تاخذهن لان هذا حقها .. وبعدين آني كنت معاهده نفسي ما اخذ دينار من حسن ولوث ايدي بي .

من سمعت بحسن مستولي على البيت.. هوايه انقهرت وگامت تبچي .. وتسب وتلعن بي وباليوم الاسود اللي جابه علينا .. گالت:- بالله .. صايره دايره هاي السالفة .. تعب وشقى سنين العمر كله .. يجي على غفلة هذا السرسري السافل ياخذه .. صحيح البيت مال حكومة بس الاثاث كله النا .. وين ماكو واحد هتلي وحرامي ومنحط الله سلطه علينا .. اووووف ياربي ... اذا بعدهم اول ما تولوا عملوا بينا هذا العمل .. چا من يثبتون نفسهم بالحكم شراح يسوون ..؟ وشراح يعملون ..؟ الله لا ينطيهم للامريكان يومن جابوهم علينا ..

&&&

بعد ما سالتها عن العيشة بسوريه .. وشلون ممكن الواحد يدبر امره اذا بقى ..؟ حمدت لي باهل سوريا وبساطة العيشة بيها ورخص الاسعار .. بس ما كان عندها اي تصور عن الشغل .. لان ما سائله عنه .. كانت تقنع نفسها طيلة الفترة الماضية .. ترجع للعراق خلال اشهر .. عندها امل يطلعون الامريكان قبل لا ياسسون حكومة عميلة الهم .. كانت تمزج بين تمنياتها واحلامها ..

حتى غسان وغزوان ما مسجلتهم بمدرسة ولا مكلفه نفسها تسأل عن امكانية متابعتهم للدراسة بسوريا .. وضايعة عليهم السنة الدراسية ..

من خبّرتها بقراري البقاء بسوريا وتامين مدارس للاولاد .. حسبالك صحيتها من نومها .. كانت بعدها مصدومة من اللي حصل بالعراق .. ما مصدگه تنقلب احوالها بهاي السرعة .. ويصير اللي صار .. على گولتها كانت تحس دا تعيش بكابوس وتتمنى تصحى منه باي لحظة .

ما فكرت ادور على سكن مستقل .. كنت متردده اطرح عليها فكرة السكن وياها بنفس البيت .. وشارك بالمصاريف والايجار .. حتى تخف علينا التكاليف .. بس هي خففت عني الحرج .. من سألت على الايجارات حتى اشاركها بدفعهن .. ظنت اريد ااجر شقة لوحدي .. فما انطتني مجال .. رزلتني .. وگالت :- عيب عليچ تفكرين تطلعين ابيت لوحدچ .. اني ما صدگت تجين حتى تخففين عني غربتي .. شو احنا بغربة ولازم نبقى سويه .. يصير ما يصير ..!! لازم ما نفترق عن بعضنا .. وبعدين منوعندنا ..؟ شو بس اخوتچ بالبيت .. وهاي الشقة زايده علينا .. واذا الله يسر واشتريت شقة اخذكم وياي .. ما خليچ تطلعين وحدچ ابد .

فرحتني هوايه بحچيها .. وما عرفت شلون ارد عليها .. گمت بوستها من راسها ودمعتي ما فارگت عيني .

من التعب والسهر نمنا وجه الصبح .. وما صحينا للظهر .. خو الولد ما صحوا لساعة ثلاثة ما اعرف الاربعة العصر ..