رحلة احلام

صدمة 27

صَدْمَة 

الگاع جواي صلبة وباردة .. حسبالك نايمة على قالب ثلج .. كل جسمي بارد .. وعيت على نفسي نايمه على ظهري ارجف من الداخل .. وما كنت احس اذا اطرافي ترجف وله لا .. ؟ بس كنت احس بيهن يوجعنّي وثگال .

واحس براسي حرگة والم من جهة اذني اليسرى .. وجفوني لازگه على بعضها ..ما اگدر افتح عيوني .

تذكرت لينا .. ردت اصيح .. صوتي ما طلع ..

الهوى البارد يضرب بوجهي و صوته يصفر ويوحف مثل العاصفة ..

جربت احرك ايديَّ ورجليَّ .. ظنيت بعدهم لازگات بالطين ..

حركت ايدي على كيفي .. طخت بفد شي صلب .. خفت لتكون رجل الرجال الي شمر نفسه فوگاي بالطين .. امتدت ايد ولزمت ايدي .. وصوت جاني كلش واضح رغم الهوى اللي ينفخ باذاناتي:- لا تخافين مابيچ شي ان شاء الله .. اصبري لا تتحركين وصلنا ..

ياربي شنو هذا ..؟ دا احلم ..؟ وله شنو ..؟

گلت له بصوت واطي :- لينا .. لينا وين ..؟

جاوبني الصوت:- موجودة .. موجودة .. لا تتحركين اختي .. ما بقى شي ونوصل ..

كلامه حسسني بالطأمنينه .. كلمة اختي ريحتني .. تحسست جسدي بايدي .. ما باقي شي علي من ملابسي ..

بدات استذكر اللي حصل .. اجتاحتني رغية حتى استقيم بگعدتي .. لأتأكد من وجود شي يغطيني .. كنت احس بوجود دثار فوگاي .. ولكن خفت لا اكون متوهة .. استحيت من نفسي و بقيت على اتمديدتي .. وفكري رجع يعيد صياغة اللي حصل من جديد ..

اريد اعرف وين اني ..؟ بيا مكان ..؟ وشنو اللي صار بيَّ؟ وشنو هذا الهوى اليضرب بيَّ ..؟

فتحت عيوني .. الدنيا افترت بي .. ماشوف غير سواد السما ونجمات زغار ثابتات .. ظنيتهن مجرد وهم ..

المكان اللي اني بي دا يتحرك .. مرات يخف الهوى ومرات يزداد .. بدت اطرافي ترجف ..

تلمست الارضية الصلبة جواي .. وخمنت .. هاي ارضية بدي سيارة .. ما يفصل بيني وبينها اي شي .. جسمي عاري تماما .. نهضت راسي شويه وتاكدت من جسدي مغطى ابطانية ..

سمعت اكثر من صوت حوالي يطمّني .. فتحت عيوني ودرتهن بكل الاتجاهات .. حتى اشبع فضولي واتاكد من اللي حوالي ..

بعدني ما متطمنه كلش .. يمكن يكونون نفسهم .. بس اصواتهم واسلوبهم بالحچي يختلف .. بقيت فاتحه عيوني حتى اميزهم واتاكد من نفسي .. حيَّة وله ميَّته .. لان راودني شعور كلش قوي باني متت .. ويجوز ذولي ديغسلوني ويكفنوني ويودوني للمقبرة ..

يگولون الميت يبقى يحس بنفسه من تفارگه روحه ويشوف الناس اللي حواليه بس ما يگدر يحرك جسده .. تلمست نفسي مرة ثانية .. ما عرفت شي ولا تاكدت من اللي ديصير حوالي ..!! ممكن اكون ميته ..؟؟ وممكن اكون حيَّة ..؟