#خُلِقتْ_حُرّة
#الحلقه 22
" إذا أغلقت الشتاء أبواب بيتك .. وحاصرتك تلال الجليد من كل مكان .. فإنتظر قدوم الربيع وافتح نوافذك لنسمات الهواء النقي ! وأنظر بعيداً فسوف ترى أسراب الطيور وقد عادت تغني .. وسوف ترى الشمس وهي تلقي خيوطها الذهبيه فوق أغصان الشجر .. لتصنع لك عمراً جديداً وحلماً جديداً .. وقلباً جديداً "
_ الصببح وييين كنتي
جــــــنـــــان ......
قلبت عيوني بملل و شفت ليده يلي ماسك بيها يدي ، ياربي شنو العيله هذي حلال عليهم هما بس و نحن حرام علينا ما هوا كل يوم جايبها لداره خطيبته و قافلين الدار ع بعضهم و لما يجي الموضوع عندي حرام و عيب و جريمه و لو تكلمت جنان قليلة ادب جنان ماتحشمش ، عضيت ع فمي بعصبيه و شفتله
جنان : وين كنت يعني قتلك طلعتتت نمشي حراام عيب كفرت
ايوب : ضغط ع يدها بقوه و بعصبيه و ضاغط ع سنونه ، وطي صوووتك خير مانخربلك وجك و الي قااعد برااا هذا اليوم مروح سبحان الله ع الصدفه
جنان : ابتسمت ب استفزاز ، زي صدفك انت وخطيبتك
رفع ايده بيضربني شفتله و رفع حاجبي ، سكر ع يده فالهواء و دفني ع السرير
ايوب : انتي حتى الضرب ما عاد ينفع معااك و يقعد حضك سمح نلقاك طالعه بس
حطيت ايدي ع ظهري الغجري عزقني بقوه كسر ظهري اكسر يديه ، و الله نوريك مايبقى اسمي جنان اذا ماطلعت ، مع ان مش في خاطري نطلع بس الموضوع عناد و انا و العناد عشق ، صبي للدولاب طلعت توته طويله شويه بس حلوه غيرت دبشي و صبيت ع المرايا ، مشطت شعري قرن تحت و حطيت مرطب فيه لون و مسكرا بس ، فتحت الباب و شفتهم مقمعزين فالصاله ، ماما مقابلتني و الباقي معطيني بظهورهم قعدت انشير لماما لحد مافطنتلي و جتني
جنان : سحبت امها من يدها و سكرت الباب ، ماما نبي نطلع و الحقير ولدك مايبش يخليني
امها : خليكي شويا عند مايقول يبي يشوفك قاعد يحكي مع باتك و ايوب خليه عليا
جنان : ربعت يديها لصدرها و نفخت ، نبي نطلللع
امها : ضربتها ع كتفها ، اثقلي شويه ماكنتي دايره فيها مانبيهش مانبيهش
جنان : حطت ايدها ع مكان الضربه ، عساس انتو تعرفو الثقل تعزقو فينا عزق و بعدين مش زوجي و قرة عيني بنحبه اكيد
امها : حبك عزرائيل قولي امين عشان نفتك من لسانك و مصايبك حولي هك
نفخت بقوه و مشيت شفت لروحي نظره اخيره وفتحت الباب و طلعت نمشي بشويه للكوجينه عشان مايحسوش عليا و ماما تشوفلي و بتموت من القهر ، خشيت للكوجينه و لقيت ماما موتيه الشاهي حطيته و خذيت السفره و طلعت وانا مبتسمه ، شفت لايوب بتحدي و بعدين قدمت ع مصعب يلي قعد يشوفلي و مبتسم ، مديت عليهم و حطيت السفره و قمعزت
جنان : بصوت واطي و هادي ، حمدلله ع سلامتك
مصعب : مسك ضحكته و رد عليها بنفس الهدوء ، الله يسلمك
ايوب : جنان عدي حدديلي سوريتي بنطلع
جنان : ابتسمت بهدوء و اتكت لاوره ، الي عطيتها ليا امبدري حددتها لكي قاعده فوق السرير متاعك
ايوب : رفع حاجبه ، و امتى
جنان : بملامح بريئه عكس تفكيرها و صوت هادي ، لما كنت عند جهااد امبدري
