#خُلقْتْ_حُرّة
#الحلقه 28
قعدت مصبيه مكاني و مصدومه هذي هيا يعني ، ماعيطش عليا ، ماضربنيش ، ماهزبش يعني بكل سهوله خش للحمام و سيبني
تنفست براحه و زمطت ريقي ، مسحت دموعي و خشيت للدار ، الي صار كلا يبرم في عقلي ، حولت الماليه الي كانت عليا و خذيت دبش و خشيت لحمام الدار
خشيت تحت الدوش و انا عقلي يفكر ، معقوله مل مني و حتى خلق معش عنده ليا عشان يناقشني ، معقوله قعد معتبرني انا و الساس واحد وماهمش الي درته ، ضحكت ع روحي بهزوه قعدت نبيه يهزبني و لا يضربني ، خلاني مهزبه رسمي
طلعت بعد فتره من الحمام و انا لابسه قفطان خفيف فوق من الركبه و حاله شعري مبلول ، طلعت من الحمام و شفتله قاعد ع طرف السرير و يدخن و ساكت
مشيت بشويه لزيانه بخيت عطري و انا نشوفله ع امل يشوفلي و لا يرفع راسه فيا بس و لا كأني موجوده ، لما يحاربني نفسيًا نمووت نقعد حايره كيف نراضيه و حتى ولو الحق معايا يقعد عليا ، عكس لما يهزبني و لا يضربني و يقعد حاير هوا كيف يراضيني
تنهدت بشويا و مشيت رقيت ع السرير و حضنته من لاوره لفيت يديا ع بطنه و اتكيت براسي ع ظهره ، وهوا قعد ساكت بس نفسه عالي ، حكيت بصوت مخنوق
هاجر : بصوت قريب للبكاء ، انا آسفه مكانش قصدي اندير هكي بس..
ادهم : قاطعها بجمود ، بس درتي
هاجر : نزلو دموعها ، انا مانتحملهش مانتحملهش مانقدرش نضبط تصرفاتي
ادهم : هز راسه و سكت
رفعت راسي و اتكيت بحنكي ع كتفه و دموعي ينزلن ، شفتله وهوا شافلي و بعد عيونه ع طول و عاقد حواجبه بعصبيه
هاجر : احكي معايا ماتسكتش
ادهم : بعصبيه ، شن نحكي اه شن نحكي طلع شعر ع لساني من كثر ماحكيت ، ياهاجر اسكتي ياهاجر اسمعي الكلام وانا ناخذ حقك ، يا هاجر والله مافي بالي و لا مفكر فيها ، ياهاجر خليها في حالها ، ياهاجر اي تصرف يطلع منك محسوب علياا ، لكن شي تاخذي الكلام من وذن و طلعيه من الاخره رحمة لولديك حولي من عليااا واصله معاياا لهنااا
نفض يديا بعصبيه و صبى ، قعدت مكاني و دموعي ينزلن وهوا خذا مخده و غطاء من الدولاب و طلع ، معش قدرت نلحقه و لا نصبي نحكيه معاه خفت يحرجني كيف توا و لا يطلع اعصابه فيا ، رقدت ع السرير و يدي ع بطني و دموعي ينزلن غمضت عيوني و انا نقرا في قرآن عشان نهدا و نرقد
___________________________________
مـــــــــــلك .........
بعد ماطلعو هاجر و ادهم قعد بالي عندها ، ادهم باين عليه متعقد بكل و هيا من حرقتها لو يحكي معاها مش حتسكت ف خفت ان تولع بينهم ، و من بين تفكيري شالني التفكير لتصرفاتي و تصرفات هاجر ، هاجر حتجن ع ادهم من ياقوت و انا صح تجيني الغيره بس مش درجه اندير الي هيا ديره ، حسيت بالبرود الي انا فيه من لما قال معتصم نبي نزوج
