#خُلِقتْ_حُرّة
#الحلقه36
خذيت نفس و طلعته بهدوء كررتها أكثر من مره و شفت لروحي فالمرايا ، أبتسمت بثقه و غرور ع شكلي و همست بصوت مسموع
_ جمال ياربي جمال
شفت لقفطاني الاحمر الي راسم تفاصيل جسمي ، كان ضابط كلا ع الجسم يوصل لنهايه ركبتي و من فوق يجي كلا محلول بحيث رقبتي كلها باينه ، كمامه طوال لنص كف يدي ، رفعت شعري فوق و نزلت خصلات عشوائيه ، مكياجي كان هادي مع روج أحمر ، و آخر لمسه أكسسوار ذهبي مع سندل ذهبي
_ ضحكت بصوت عالي ، حتجلطي العروس بروحها أنتي ، أهدي مانبوش خسائر قبل عرسك والله إذا شافك هكي ينجن
_ شفتلها من انعكاس المرايه و أبتسمت بغرور و رفعت حاجبي ، نبيه ينجن ياحُبي
_ ضحكت و طبست تسكر في قبالها ، مش كويس يابنت نسمع ان الثور مايحبش لون الأحمر
_ ضحكت و أنا نعدل في شعري ، ألا ثوري نا اكيد حيحبه و غمزتلها
_ هزت راسها بضحكه ، و الله عارفه ان وراك مصيبه بس شنو الله اعلم
_ برمت عليها و خذيت عبايتي نلبس فيها ، معقوله انا من ورايا مصيبه انا يجي من ورايا كل خير
_ أم المصايب اسكتي نعرفو الي هناك ، ابتسمت و هيا مشت صبت ع المرايه تعدل في مكياجها
لبست وشاحي و طلعت لانها مزال مطوله ، طلعت و لقيته يستنى فيا عند الباب و معطيني بظهره ، أبتسمت أبتسامه واسعه على قولت باب الحاره ، يؤبرني طولو و هيبتو و ثقلو و كل حاجه فيه ، و اللهي لولا الرجاله را هكي نطيت عليه و حضنته
حس بوجودي و برم عليا و هوا عاقد حواجبه ، رد يشوف لجهه للثانيه وحكى بنبره ثقيله
_ غطي وجك و امشي بسرعه
رديت ابتسمت اخرى زي الهبله ، مع ان حكى معايه هالكلمتين و كأنه قايلي انحبك على قد الجفا الي خذيته منه ، ماكنتش انتوقع اني حنحب غيرتهم الشرقيه بس حبيتها ، حبيت ثقله يلي حتى وهوا زعلان مني و مايحكش معايا لكن جا عشان يوصلني و مارضش نطلع بروحي وسط الرجاله ، خذيت نفس بقوه يلا المهم ان اليوم انصالحه
حطيت الوشاح ع وجي ومشيت وراه ، كعب و الوشاح على وجي و هوا كل شوي يقولي اسرعي تقول تهريب ع شوي و جيت ع وجي ، مسكت في ذراعه و همست بصوت واطي
_ مانحقش و كعب حنطيح ع وجي
مسك يدي و سرع في خطواته ، لحد ماوصلنا لحوش عيت جدي و خشينا ، حولت الوشاح و تنفست براحه شفته صافن في وجي ابتسمتله ، و هذا ع طول فطن لروحه و عقد حواجبه ، جا بيطلع ناداته أمه ، كنت بنخش لكن لما سمعت امه ناداته قعدت مصبيه نظام مراته و شخصيه و كذا
_ عيت خوك وين
_ وين نعرف نا يمي ولدك قاعد برا
_ و كنه مايجيبها تساعد و لا بس شاطرات يجن على آخر شي
عرفتها تعزق في كلام عليا ، رفعت حاجبي و هوا رد عليها
_ و انا شن دخلني بيه يجيبها و لالا ، رد شافلي و نت فيا ، و أنتي الاخرى خشي جواا مصبيتلي هنااا و الباب مفتوح
