#خُلِقتْ_حُرّة
#الحلقه38
خذيت التبسي من يدها و عيوني عليها بغل ، من اول ماجينا و هيا هذا اسلوبها ، يأما تامرنا على شي و لا تنفخ علينا و لا طنش و لا تحكي على دلال راجلها الي كلنا نعرفوه ، مرات نحطلها عذر و نقول تعوض في نقص الي صارلها بس نحن شن ذنبنا أو شن دخلنا ؟
هاجر : حطيه بسرعه و تعالي خوذي هذا
الجمله عاديه بس صيغه الأمر نرفزتني ، رفعت حاجبي و شفتلها
ملك : عفوًا
هاجر : شيرت بعيونها ع الطاوله ، حطيه غادي قلت
خذيت نفس نهدي في روحي ، اهدي ياملك اهدي اعذريها ، خذيته و سكتت و مشيت حطيته ع طاوله و قمعزت ، يركبها مرض مانخدمش عندها تأمر عليا ، حالتها النفسيه و اللهي كلنا حالتنا النفسيه تعبانه
خذيت نفس بهدوء و شفت للبحر ، دمعو عيوني لما تذكرت ان اخر مره جيت للبحر هذا مع رغد ، وقتها كانت اندويه عمرها سنه ياعمري عليها ، رديت بذاكرتي لموقفي مع رغد و سؤالي لها
" _ لو يعني كان لكي خيار تاخذي غير معتصم و يكون واحد متفتح و مش من العيله يعني هكي مش زي النمط ، تختاري من
_ لو يجيني ماجد المهندس بجلالته مش حنختاره
ضحكت و هيا ضحكت ، كانت تحب ماجد المهندس بطريقه فضيعه مرات حتى تعارك في عرايك كبار مع معتصم عليه ،
ملك : رسمت بيدي ع الرمله ، و الله جاوبي جد يعني يرد بيك الزمان تختاريه
ابتسمت بهدوء و شافت لمعتصم الي قاعد يشوي ، و تغيرت نبرت صوتها لحنيه و هدوء
_ حنختاره مره و ثنين و ألف ، ملوكه صح عصومي طبعه زيهم يعني مش ميه فالميه بس تقدري تقولي ان تسعين فالميه نفس اطباعهم و عصبيتهم و كلامه زي السم مايضربش بس كلمته تقولي الضربه اهون منها ، لكن حنيته شي ثاني لو تشوفي حنيته وقتها انتي بروحك تقوليلي معاك حق ، تخيلي لو نمرض بس يقعد مرات باليومين عالق مايرقدش و لا تغفى عينه نين انا خلاص نقعد نجدا فيه بس عشان يريح روحه ، لو بكيت و لا نزلت دمعتي يقلب الدنيا ، مرات حتى نقعد دايره شي يقهر و يرفع صوته عليا لكن لما يشوفني خايفه ، ضحكت و صغرت عيونها تخيلي يجي يحضني و يقعد يهزب و هوا حاضني عشان مانخفش ، والله نقعد نضحك عليه نقوله مافهمتش كيف
خذت نفس بقوه و ردت ابتسمت ، عصومي مانبدلش حتى بروحي ، لو يخيروني بين روحي و بينه نختاره هوا
_ مشكله لو مش شاهده نقولك كذابه ، بس ولو احترمي مشاعري انا سنقل يابنتي
_ ضحكت و عيونها صغار و لما تضحك يختفو بس لقطتهن حلوه رفعت كتفوها ، نبي نحكي عليه ولو ان الكلام مايكفي
_ صبيت و نفضت يديا من الرمله ، ااخ نعدي نشوفلي ندنوده خير من وجك
_ رفعت حاجبها بغيره ، حبيبتي هوا انت طوليه وجي و الله الا مانخليك تمني تشوفيه
