#خُلِقتْ_حُرّة
#الحلقه 29
رهـــــــــــف.....
" يا من غفوتُ على صدرهِ ، كيف تعلمت على أذيتي ؟ كنت سلاحاً في امامي أحتمي به ، والآن أصبحت خنجر في ظهري."
تنهدت بتعب و صبيت غسلت وجي و مسحته بعد ما طلعت هاجر ، فكرت في كلامها ؟
فعلا هل انا قادره انتغلب ع خوفي منه ؟
وهل هوا فعلا مش خايف ان يخسرني لان عارف ان في اي لحظه يقدر يردني ؟
شن حيكون غير هكي ياغبيه ، مالا قعدت في حوش هلك بدون ماهوا يفكر حتى ولو مره وحده يطمن عليا بعد الي داره فيا شن يدل ؟ و لا فكر يجي يطيب خاطري ؟ ، ضحكت ع روحي بهزوه ، هل انا فعلا انراجي فيه يجي ؟ اكيد لا محمد ماضي اسود و انتهى حنعيش لنفسي لرهف
لكن هل تسمحلي مشاعري ننسى..!! ، كيف ننسى وهوا اول من علمني الحب ، كيف ننسى وهوا الانسان الي بنيت عليه كل أحلامي ، عارفين شنو مشكلتنا فالحب ان نحن الي نرفعو سقف التوقعات ، نرجو شي من اشخاص مستحيل يعطونا الي راجيناه منهم
بس الشخص الي علمني الحب هوا نفسى الي علمني الكره ، ياريت تعلمني النسيان عشان ننساك
كل ملامح الحياه مسحتهن من وجي ، خليتني جثه لكن عايشه عشان ينبض قلبها للآلمك و بس ، كيف هنت عليك و انت الي قلت انهون الدنيا كلها و مانهونك ، كيف هنت عليك و انت الي قلت روحي فداء دمعه من عيونك ، كم حتعطيني روح مقابل دموعي ؟
شفت شفت ان حتى كل اسئلتي يدورن عليك و يعاتبن فيك !! ، لـ لحظـهہ هذي و انا مازلت انراجي في تبريراتك بس انكابر لكن هل حيكون موقفي هكي من بعد ساعات من توا.. !
دمعو عيوني ورجف فمي ع ذكراه الموجعه ، خذيت نفس برجفه وتنهدت ب آهات موجعه ، ابتسمت بأسى ع فكر حني القديم رغم ان عندها أشكال و ألوان من لوحات التقطيع الا انها كانت حاطه سراميكه عشان تقطع عليها ، رفعت الموس بإيدي الي ترجف و تنفست بضيق و اندمجت انقطع فالطماطم مره نحث روحي ع اني نكون قويه ، و مره نضحك ع روحي بهزوه اين قوه بوجود محمد الي نجح و بأمتياز ان يخلي مني أنثى تخاف من ذكر اسمه بس
" ألا تأتيك لحظات يقطر قلبك ألماً لشيء صغير تذكرته كان بيننا؟ وكيف أتوقع ذلك منك وأنت قطعة من الجمود، فامرح كثيراً الآن، فالقدر يخفي لك الكثير من الألام. لأن من خلقك و خلقني يرانا وهوا خيرُ الحاكمين "
غمضت عيوني لما تخللني عطره ، صرخ قلبي برعب و خوف بنبضات عاليه ماقدرتش اني انسيطر عليهن ، و شجاعه عقلي راحت بمهب الريح ، لا و ستين ألف لا ان يكون لقائنا توا و نحن وحدنا ، لا انا و لا قوتي جاهزين
بدون سابق أنذار نزلن دموعي و رفعت عيوني في عيونه ، رجف جسمي و شهقت بدون وعي مني و انا نشوف لكمية الظلم الي عشته منه في عيونه ، شفت في عيونه دائرة ظلام و نقطه في وسطها ، ماحملنيش كرعيا عشان نهرب من الوحش الكاسر الي قدامي
