ـ لأ.
= هو ايه لأ ياملك انا مش بهزر.
ـ ولا انا بهزر.
= انا مش معايا فلوس.
ـ طيب.
= انتي مجنونه.
ـ اه، مجنونه يازياد، ذا كان انت فاكر ان ده جنون يبقي اه مجنونه.
اتنهدت = واخده بالك احنا بقلنا قد اي مخطوبين.
ـ استني افكر، اممم، داخلين عل السنتين صح.
= صح ياملك صح، ولسه الشقه مخلصش فيها حاجه غير الحمام والمطبخ
ـ لا لا شوفت الكدب، احنا جهزنا حاجه تاني عل فكره.
= اهه جهزنا اي بقي ياترا.
ـ ركن الصلاه مش جهزنا ولا لأ.
= وده يعتبر تجهيز، دي نقطه متتشفش وسط الحروف.
ـ بس اهم حاجه ولا هتنكر.
= لا مش هنكر، بس.....
ـ مفيش بس انا مكمله للاخر.
صوتي هِدي ـ مش بعد ده كله تقولي خلاص، اذ كنت اهون عليك انا، انت متهونش، والسنين دي كلها مش هرميها علي الأرض بساهل كده.
وطي راسه بزعل، انا حاسه بيه كويس، هو تعبان، جسدياً ونفسياً، بدل الشغل الواحد بيتشغل اتنين وبيدور علي التالت، الحاجات بقت غاليه اوي، بقاله 3 سنين بيحاول ومش عارف، جبنا بس الحاجات البسيطه، الاطباق والكبابي، وجاب تلاجه وغساله بس بالقسط.
انا مش عاوزه حاجه غيره، هكتفي بيه هو، كفايه ان التعب ده علشان يرضيني ويرضي اهلي، ويعيشني في مكان حلو، بس انا بزعل اوي لما الاقي صوته تعبان ف التلفون، بزعل لما بيفرح لما يشوف السرير، شكله مرهق اوي، ببقي عايزه كده احضنه واطبطب عليه واقوله كفايه خلاص.
= وبعدين!
بصتلها، انا عارفه هي تقصد اي كويس، بس وحياة اللي خلقني ما هسمع كلامها.
ـ نعم ياماما.
= نعم الله عليكي، انتي جبله مش بتحسي.
ابتسمت ـ انا اللي مش بحس، ازاي اتخلي عنه بعد كل ده، اسيبه ف نص الطريق ليه! احنا زي ما بدأنا مع بعض لازم ننهي مع بعض.
كانت هتتكلم ، قولت ـ ماما، كفايه الله يبارلك، علشان انا تعبت من الكلام.
مش عارفه ماما مش فهماني ليهه، مش عارفه ان ده هيبقي اكبر غلط وهندم عليه باقي عمري، فيها اي، فيها اي لما نتعب علشان نعيش مع اللي بنحبهم واحنا مرتاحين، ليه فاكره ان لازم من اول مشكله نستسلم، مينفعش الاستسلام، هو مش مينفعش هو ممنوع بنسبه لي، مش واخدين بالهم انه تعبان بقاله 3 سنين وانا بكل بساطه اقوله سلام، بعيداً عن الاذي النفسي اللي هيحصلي، هو هو اللي تعبه هيروح عل الفاضي، هو اللي هييأس وهيعرف ان ذا كان معرفش يبقي محدش هيساعد، وهيمشوا ويسيبوه.
بعتت ـ صباح الخير.
رد بعدها بثواني = صباح الفل يافل، يعني صاحيه بدري!
ـ عادي، بتعود.
= علي اي!
ـ عل الصحيان بدري.
= وانتي هتصحي بدري ليه؟
ـ ايده ايده، لا استوب، الست الشطوره بتصحي بدري علشان ولادها وجوزها، ولا انت مش شايف اني ست شطوره.
= لا لا فشر انتي ست شطوره وشطوره خالص.
ـ ايوه كده، انت رايح الشغل!
= اه.
ـ طب فطرت!
= اه.
ـ بقولك اي، البس تقيل قريت ان الجو هيبقي برد خالص النهارده.
= حاضر.
ـ وخد اكل معاك علشان متاكلش من بره وبطنك توجعك زي اول امبارح.
= حاضر، اي أوامر تاني.
ـ دي مش أوامر، ده اسمه حب ياجاهل.
= ايده، انتي بتحبيني؟
ـ تخيااااال.
....................
ـ شكراً
مشيت وانا فرحانه اوي بالفلوس، بعيت التلفون وخدت عليه 3 الالاف، حلو هيفيدوا شويه.
= برن تلفونك مقفول ليه؟
ـ هااا؟
= هاا اي بقول تلفونك مقفول ليه؟
طلعت الفلوس ـ بُص معايا اي.
بص للفلوس بأستغراب وقال = جبتيهم منين؟
ـ احمممم، اصل انا الصراحه حبيت اساعدك بحاجه حتي لو كانت بسيطه وبيعت التلفون وخدت بداله الفلوس دي.
فِضل باصص لي شويه وهو ساكت، مسك ايدي وطبطب عليها وقال = شكراً ياملك، شكراً لوجدك، انا.. انا مش عارف اقولك اي بجد.
سحبت ايدي ـ هو اي اللي شكراً احنا هنستهبل، ما دي شقتي انا كمان علي فكره.
ابتسم = صح.
.................
ـ الله، اي الجمال دهه؟
= بجد عاجبك!
ـ جداً.
هو عارف اني بحب الرسم جداً، ف خصص لي مكان ف الاوضه وجبلي اسكتشات كتير وفرش والألوان، ماهو انا مش بحبه من فراغ يعني.
= ملك ملك ملك.
ـ نعم نعم نعم.
= لقيت شغل تالت واخيراً.
: بزعل ـ بجد!
= انتي مش فرحانه.
ـ اكيد لأ، انت مش بتشوف منظرك اصل وشغلين بس، دلوقت تلاته يبقي هتموت نفسك، وهتنظم الوقت ازاي، وهتنام امتي، وهتكلمني انا امتي، هتقطع نفسك تلاته يعني.
= طب ممكن نخرس بقي واتكلم.
حطيت ايدي علي بوئي ـ اديني خرست.
= احنا والحمدلله خلصنا اوضة النوم من دولاب لسرير لتسريحه، ف عايزين نشتغل كده بهمه علشان نخلص باقي الشقه، وانتي ياست مالك، هو انا ولا انتي اللي هتتعبي، انا هصحي من 6 زي كل يوم هخلص الشغل الساعه 12 الظهر ويدوبك ساعه اتغدي فيها واكلمك واروح للشغل التاني هخلص تقريباً علي 4 او 5 العصر هروح عل التالت هرجع 11 بس كده.
ـ......:
= بتت.
اتنهدت ـ ربنا معاك.
.................
: بفرحه: بتتكلم جد يازياد.
= والله ياقلب زياد.
ـ يعني خلاص هبقي مراتك.
= واخيراً.
ـ انا مش مصدقه بجد، تعب 3 سنين مرحش علي الفاضي وخلاص كلها 7 ايام ونكتب الكتاب.
= وخلاص كلها 20 يوم ونعيش في بيت واحد، البيت اللي جَهزنا مع بعض وتعبنا فيه مع بعض.
ـ حلمي هيتتحقق يازياد واخيراً، امتي بقي الاسبوع ده يخلص.
............
<بارك الله لكما وبارك عليكما وجمع بينكما في خير>
سجد، مع اخر كلمه قالها الشيخ نزل سجد علي الارض، صوت عياطه انا سمعاه، الكل باصص عليه ومستغرب، علشان ميعرفوش حاجه.
قام وبص عليا ثواني وشدني لحضنه، همس ف ودني = انا فوزت ياملك، واخيراً فوزت علي الحياه، انا مش مصدق.
ابتسمت وانا بقول ـ الحمدلله.
................
= خديجه نامت.
ـ من بدري.
= ليه كده.
ـ صحيت بدري النهارده اصل.
= انا هدخل اصحيها، وحشتني اوي.
ـ ما تسيبها نايمه يابارد.
= هوش هوش، ملكيش دعوه انتي.
ثم ماذا؟
: ثم انها حياه، لسيت بسئيه وليست بجيده.
تُعطيك بعد العسر يسر، فاطمئن.]
#من_نبع_خيالي.
#ملك_محمود
