ساعات كِده بيبقي عندي فتور...مش ببقي حبه أكمل، ولا أتكلم، ببقي عايزه أمسك تلفوني وأنام علي سريري وأطفي النور وَ أقلّب علي الفيس في هدوء، وفي نفس الوقت ببقي عايزه أفصل الِنت، او أشيل الفون خالص علشان مكلمش حد، واقعد مع نفسي في نفس الهدوء.
= عامله اي؟
_ الحمدلله.
...عامله اي!
ينفع اقول اني مش كويسه، ومش بخير، ومش تمام، بس برضوا الحمدلله.
محدش قال لِي أن الحياه هتبقي صعبه كدا.
كُنت فكراها زرع اخضر وورد احمر ونُص شمس في نهاية الورقه، وسحاب بيضحك..زي ما كُنت برسمها وأنا صُغيره.
= مالك!
_ مَليش.
بكدب في كل مره بتسِأل فيها السؤال ده.
ازاي مَليش؟وهو في..... في اني تعِبت، والحياه مش راضيه تِحن.
بتفرج علي صوري القديمه.
شُوف شُوف ضحكتي حلوه ازاي في الصوره.
حاولت أقلدّ ضحكتي بس مطلعتش حلوه زي في الصوره...علشان مُصتنعه.
كتبت..." طب اللي حابب ياخد بريك مِن الحياه يعمل اي؟! "
نَزلتها استوري، كُنت حطًه أمل اني هلاقي فعلاً طريقة...بس للأسف أمل لَقيتها نايمه.
= ينام.
= يروح ينام+ إيموجي ضحك.
= يحضن سريره.
لَقيت أغلب الاجابات النوم.
انا فعلاً عايزه أنام، بس نوم أبدي.
لَقيت رساله جايه لي من رقم مش متسجل الساعه ١٠ بليل.
وكان محتواها.
مساء الخير..
خلـيـك مُـؤمـن بـإن الـنهـاردة هـيـبقـي ألـطَـف مـن إمـبـارح وإن الـلـي بـتـتـمـنـاه هـيـحـصـل بـس مـع الـوقـت،إيـاك تـيـأس إن ربـنـا رحـيـم ولـطـيـف أنـت بـس قـرَّب مـنـه وهـتـحـس إن كـل حـاجـة حـلـوة فـي نـظـرك،هـيـجـبُـرَك إطـمـئـن .
أبتسمت وقفلت الفون ونِمت.
نِمت وانا حاطه أمل في بُكره انه هيكون أحسن من النهارده، زي ما قرأت.
صحيت علي ماسدج من نفس الرقم الساعه ٩ الصبح.
صباح الخير.....
عارفه إنك مخنوق ومتضايق ورُبما عليك ضغط زيادة الفترة دي ، بس كنت حابه أقول إن كل اللخبطة دي هتعدي وهتبقى أحسن من الأول ، خليك فاكر إن ربنا مش ناسيك بس مخبيلك كل خير .
على فكرة إنت إنسان جميل
إبتسمتي وسعت اكتر وحَسيت كِده ب راحه وأمان..حَسيت ان في لي خير بس قدام شويه.
حاجه لَطيفه انك تصحي علي ماسدج زي دي.
خَليت يومي جميل في نظري عن باقي الأيام لأنها صَحيت أمل اللي كانت نايمه.
جت رساله من نفس الرقم وفي نفس المَعاد الساعه ١٠.
مساء الخير يا جميل .
أنتَ ألطف مِن إنَك تِحزَن، و أجمَل مِن إن ملامحك تِبهت، ف خُد الأمور ببساطة و ودَع الأحزان يا زوق.
و افتكر دايمًا إن ليك ربّ كبير قادر يداوي قلبك بس أنتَ خليك قُريب.
كانت او كان بتبعت او بيعت كل يوم في نفس المَعاد الساعه ١٠ بليل والساعه ٩ الصبح.
مكنتش برد علي الرسايل لحد ما عده أسبوع علي نفس الحال ف قررت أبعتّ.
_ مين!
الرد وَصل بعد ١٠ دقايق.
= فاعل خير.
_ طب إشمعنا؟
= إشمعنا اي!
_ إشمعنا انا، إشمعنا رقمي انا اللي بتبعت له.
= معرفش، كتبت رقم من دماغي وحَبيت أعمل الفِكره دي ف طلع رقمك انتِ او انتَ.
_ شُكراً.
شُكراً كلمه قُليله علي اللي حسيته في أسبوع، علي الراحه اللي حَسيتها خلال أسبوع، علي لهفتي عل الرساله كل يوم، شُكراً علي بث الأمل فيا من تاني.
من ساعة ما بعت له او بعت لها ردي ومبقتش الرسايل تيجي من تاني، معرفش لي!
حَبيت أقلده او اقلدها وخصوصاً علي التغير اللي حسيته ...ف حبه أغير وأحسن نفسية حد زيه او زيها..كتبت رقم مِن دماغي وبعتً
مساء الخير..
خلـيـك مُـؤمـن بـإن الـنهـاردة هـيـبقـي ألـطَـف مـن إمـبـارح وإن الـلـي بـتـتـمـنـاه هـيـحـصـل بـس مـع الـوقـت،إيـاك تـيـأس إن ربـنـا رحـيـم ولـطـيـف أنـت بـس قـرَّب مـنـه وهـتـحـس إن كـل حـاجـة حـلـوة فـي نـظـرك،هـيـجـبُـرَك إطـمـئـن
بعتّ اول رساله إتبعتت لي.
.........
قفلت النوت وحركت إيدي علي شعره وقولت _ دي قصتنا.
= يعني بابا هو اللي كان بيبعت الرسايل ليكِ.
إبتسمت _ هو بابا..هو اللي خلاني أضحك بعد ما كُنت فقدّ الأمل.
= طب وعرفتي انه ولد ازاي!
ضحكت _ اتكلمنا ياغبي.
سمعت صوته من ورا بيقول = بتحكي للواد اي.
بَصيت عليه بلهفه وانا بقول _ كُنت بقرأ له قصتنا.
قعدّ جمبنا = انتِ كتبها؟
= في نوت لوحدها ولحد الأن بكتب كل حاجه فيها تُخصِنا.
مساء الخير..
خلـيـك مُـؤمـن بـإن الـنهـاردة هـيـبقـي ألـطَـف مـن إمـبـارح وإن الـلـي بـتـتـمـنـاه هـيـحـصـل بـس مـع الـوقـت،إيـاك تـيـأس إن ربـنـا رحـيـم ولـطـيـف أنـت بـس قـرَّب مـنـه وهـتـحـس إن كـل حـاجـة حـلـوة فـي نـظـرك،هـيـجـبُـرَك إطـمـئـن .
#من_نبع_خيالي.
#ملك_محمود.
