_ أزاي يعني مش فاهمه؟
: بتنهيده = يعني خلاص ياحبيبتي، توفي.
دقات قلبي زادت _ لا لا برضوا مش فاهمه، قصدك أيه؟
إيديها لَمست كتفي وقالت :بهدوء _ وحدِ الله ياملك، كُلنا أكيد هنموت.
فضلت باصه لها وحاله من الصدمه مسيطره عليا.
يعني إيه؟خلاص كده مفيش زياد تاني! الحكايه كده خِلصت؟ طب إزاي! دي لسه مبدأتش علشان تنتهي.
طب هو مش أحنا أتفقنا أن مفيش ملك بدون زياد؟ طب هو ليه مِشي وخلي يبقي في ملك بدون زياد!
أستغفر الله...؛
_ كده خلاص ياماما، مفيش زياد تاني؟
:بتنهيده = بالله ما تعملِ كده في نفسك.
دمعه نزلت _ طب ليه طب؟
= قدر ربنا.
مقدرتش أمنع دموعي تنزل _ ده كان خلاص باقي أسبوع وأبقي مراته، اليوم اللي كنت أنام وأقوم أحلم بيه، أتبخر خلاص وعمره ما هيجي، حب 7 سنين ضاع ومقدرتش أكون له، خلصت الحكايه خلاص .
ضمنتي لـ حضنها، حَسيت بدموعها علي كتفي بتنزل، طبطبت علي ظهري بهدوء = خلاص بالله.
أستغفر الله...؛
كل يوم بيعدي بيبقي أبشع من اللي قبله، دماغي شغاله بتفكر فيه، أو بمعني أصح فينا، حياتي اللي كنت بتخيلها كمان أسبوع عمرها ما هتتحقق، لأنه مِشي خلاص.
= طيب أفتحِ لي الباب طيب.
_....!
= مره واحده طيب.
_......!
= ده أنا، ماما.
خدت نفس طويل وقومت بـ خطوات بطئيه لـ حد الباب، فتحته وقابلت وش ماما بإبتسامه باهته .
_ نعم ياماما.
:بـ فرحه باينه في صوتها قالت = حبيبي ياناس، خدِ الأكل ده ويتاكل قدامي.
قولت :بـ نفس الإبتسامه = مش عايزه.
= لا ماهو مينفعش كده، يومين من غير أكل ليه؟
دموعي نزلت...رفعت كتافي لـ فوق وأنا بقول _ علشان هو مِشي يا ماما.
بكره...بكره 13 ديسمبر، حلمي كان هيتم بكره وكُنت هبقي مراته، اليوم اللي كنت بحلم بيه حتي وأنا صاحيه هيعدي زي أي يوم عادي.
: كملت _ ماما هو خلاص راح، طب أنا ازاي هواجهه العالم لوحدي؟ ومن غيره!
بدأت أشهق من العياط، ثواني وبَقيت في حضنها، غمضّ عيني وأنا بتنفس كإني كُنت بجري، ولسه في حضنها وراميه كل همومي علي كتفها.
أستغفر الله...؛
خدت القلم والنوت وكوباية النسكافيه ودخلت بيهم البلكونه.
المكان اللي بقدر أشوف منه العالم ومحدش شايفني.
كُنا دايماً بندخل البلكونه في الوقت ده علشان نتكلم، مع إن بيبقي في مسافات بيني وبينه بس أنا ببقي قادره أشوفه، بشوفه بقلبي مش عيني.
بقدر أتخيل ريأكشن وشه وهو بيقول حاجه مُعينه، بخمن حركة إيديه وهو بيقول برضوا حاجه مُعينه، بشوف نظرة عينيه وأنا بتكلم اللي بتبقي مليانه حُب، واللي عمرها ما أتغيرت طول ماهو باصص لي.
عيني دمعت لوحدها ومعرفتش أمنع الدموع تنزل، فـ نزلت زي الشلال.
بدأت أكتب في النوت اللي في قلبي واللي مش قادر بوئي يقول له.
أستغفر الله...؛
في يوم وليله بَقيت لوحدي، الحياه بعد ما أتلونت رجعت أبيض وأسود تاني.
أكتر حاجه بَقيت أخاف منها هي العربيات، لأنها السبب في بهتان حياتي من تاني ، هي السبب في أنه يروح مني.
الشئ الجميل اللي كان في حياتي راح، اللي كان إبتسامته بتلون حياتي، خلاص حياتي مش هيبقي فيها الالوان من تاني، لأن الإبتسامه اختفت، وللأبد.
قفلت النوت وفضلت باصه للقمر بهدوء.
دماغي مش سيباني في حالي، بفتكر أيامنا مع بعض وأحس أن قلبي بيتخلع لما أفتكر.
