قعدت _ امممم.
كان شاب....باصص علي ورق قدامه واول ما قعدت أنتبه لي.
= ملك!
كنت بَصه قدامي وانا بقول _ اه.
سمعت ركنت القلم وهو بيقول = أتكلمِ.
بصيت له بسخريه _ أتكلم...
بَصيت قدامي تاني _ ازاي يعني، أي الهبل ده...
بَصيت عليه تاني _ ازاي اكلم شخص غَريب عن حياتي وتَفاصيلها؟
قلع النظاره = انتِ مش جايه رَغبه منك، انتِ مجبوره صح؟
اتتهدت _ صح.
قام من مكانه وجه قعد في الكرسي اللي قدامي وقال = طب أذا كان بقي الموضوع إجبار يبقي مش هيجيب نتيجه.
_ علشان موضوع بايظ اصلاً، واحد معرفوش احكيله عن حياتي ازاااي؟!
بإبتسامه = انتِ مش بتحكي لنا عن حياتك، احنا بس بنكون صُحاب لا اكتر.
_ لا واو، وانا هروح برضوا أصاحب حد لسه شيفاه حالاً.
بتنهيده = بُصِ يا..ملك، اللي بيجوا هِنا مش بيجوا علشان ياخدو علاج او حاجه، هُما بيجوا علشان يصاحبوا حد، ف بتالي بنفضفض لـ بعض، أما بقي اللي زي حالاتك مُجبر، ف ده مش بيبقي عايز صُحاب لأ، هو عاوز يفضفض بس.
أبتسمت إبتسامه سُخريه _ مين قالك؟ علي فكره مش صح، عندي ماما وعندي اختي أقدر احكي لهم وأفضفض معاهم.
= مكنوش أجبروكِ تيجي.
بصيت بِعيد وقولت _ لأ...انا بس اللي كتومه.
= مَفيش حاجه اسمها كتومه، في حاجه اسمها مش لاقيه الأمان ومش لاقيه الشخص المناسب اللي اقدر احكي له، في حاجه إسمها خوف، وفي حاجه اسمها تردد، لَكن كتومه دي، مش موجوده في قاموسي.
أتنهدت _ بس عندي انا في قاموسي انا حاجه اسمها كتومه...
قومت _ عن إذنك ي دكتور.
خرجت لَقيت ماما ورحمه قاعدين ومستنيني قاموا اول ما شافوني.
ماما قالت بسرعه = بـ السرعه دي ي ملك، عملتِ اي؟ وقال اي؟
أبتسمت ومشيت من غير ما ارد عليها.
_ يعني اللي سمعتيه ي ماما.
قعدت قدامي = بتّعبيني وبتّعبي نفسك لي ي بنتي، انا واللهِ خايفه عليكِ، انتِ مش شايفه نفسك.
مِسكت أيديها وبوستها _ متقلقيش ياست الكُل انا زي الفُل صدقيني.
شالت إيدها من إيدي = محصلش، مش باين، ولو فعلاً زي الفل مكنتيش اتكلمتِ مع الدكتور كدا، انتِ خايفه ي ملك من المواجهه، خايفه تنسيه ف تبطلِ تحبيه...
قطعتها _ ماما لو سمحت انا تعبانه عايزه انام شويه بعد إذنك.
اتنهدت = تصبحي علي خير ي ملك.
بوست راسها وقولت _ وانتِ من اهله.
دخلت انام وكانت الساعه ١٠ بليل، بس انا طبعاً نمت ٣ الفجر زي كل يوم من تعب التَفكير.
= ام محمد جارتنا لسه راجعه من السفر إمبارح وانا عزماها علي الغدا النهارده ف عايزاكِ تروقِ معايا الشقه.
_ حاضر هخلص واجي.
= ماشي ي حبيبي.
_ اهلا وسهلاً اتفضلِ، ثواني اقول لماما انك جيتِ .
= ماشي ي حبيتي.
_ ماما خالتو ام محمد جت.
= حاضر طالعه اهو.
_ اتفضلِ العصير.
= شكراً ي حبيبي.
بَصت حواليها في الشقه وقالت = مش انا يابت ي ملك سيباكِ متجوزه، يعني لسه مخلفتيش ي حبيبي.
غمضت عيني وقولت بتنهيده _ محصلش نصيب ي طنط.
بصت عليا = ليه يابنتي ده انا سيباكِ وكان بقالك شهرين متجوزه وأهو انا بقالي سنه مسافره.
كنت بضغطت علي إيدي جامد وماما بتقول = أصل الواطي لما عِرف ان في مشكله عند ملك ومش بتخلف طلقها.
= يوووه، معلش ي بنتي ربنا يعوضك.
= يارب ياختي.
انا مش هلومه انه طلقني لأن ده حقه، بس انا زعلانه علي العِشره، ده حب ٥ سنين، انا راضيه واللهِ راضيه يارب.
كنت في المطبخ وسمعاهم بيتكلموا.
= يابت يا سُعاد لازم تجوزيها بدري ويكون راجل متجوز، وياريت لو يكون عنده عيال يونسوها، الست المُطلقه بتتعاب في بلدنا، وغير انها مش بتخلف ف اكيد محدش هيرضيَ بيها، شوفِ لك راجل متجوز احسن لك.
الدموع نزلت لوحديها، انا مش زعلانه بس انا خايفه من اللي جاي، خايفه.
