تعذُر الشروق أيام ..

8

أم فراس: بس ما ..
‏فراس: يمه ما فيها بس رايح انام تصبحين على خير يا الغالية وباس راسها وراح غرفته اللي ما رجع لها من سنين
‏أم فراس ‏تضحك: الله يهديه ‏ما خلاني اكمل
‏عند فراس اللي كان في غرفته ورمى نفسه على السرير كان كل شي متعبه وبالذات كيف يرضي ابوه 
ارتمى على فراشه بيأس وهو يقول : تفكر يافراس ولا تنفذ
ونام من بعد تعب
...
عند سُهاد الي كانت فاقده مياسين وسوالفها ومن الشوق اتصلت عليها
سُهاد بابتسامه  : I miss you
مياسين :  حتى انا والله بيتنا عادي نفس الرياض
سُهاد بحماس : تعالي عندي مافيه احد كلهم في بيوتهم نسولف انا وانتي ونشرب قهوه شرايك؟
مياسين بتردد: بشوف اذا كلهم نايمين بقول لابوي واجيك
سُهاد : تمام
...
عند اصيل
اصيل بتردد : السلام عليكم والرحمة
بندر ( الشيخ ) بفرح : وعليكم السلام ياهلا ومرحبًا بولد الغاليه ياهلا
اصيل ابتسم : هلا بك يا اخو الغاليه مبطي علينا والشوق جابنا 
بندر ( الشيخ ) بمزح : الشوق جابك ولا مشكله ؟
اصيل : الحقيقه يا خال كلها جايبتني
بندر ( الشيخ ) : عطني علمك اسمعك
اصيل : فراس ولد عمي عبدالكريم...
وبدأ اصيل يحكي لخاله كل شي لاحظه بفراس والقصه كامله الي قالها فراس
بندر ( الشيخ ) : كم عمره ؟
اصيل : ٢٠ وبداية هالشي من ثلاث سنين تقريبًا
بندر ( الشيخ ) : يعني كان عمره ١٧ اسمعني يا اصيل
اصيل : معك اسمعك
بندر ( الشيخ ) بمزح : 267 تقسيم 2 كم ؟
اصيل يضحك : اكيد 133,5
بندر ( الشيخ ) يضحك : زين ما خيبت ظني مركز ، الحين اسمعني فراس شغلته صعبه شوي ويحتاج فيها انسان قوي قلب وقالب ولد عمك يقدر ؟
اصيل : ان شاء الله بيقدر  انا من الي شفته وتصرفاته واضح انه انسان غير مهتم لوجودهم ومتأقلم
بندر ( الشيخ ) : حتى لو طلعوا له ؟
اصيل : قبل ايام شفته يسولف مع شي مب موجود وكان انسان بارد باعتقادي انهم ظهروا له من زمان
بندر ( الشيخ ) : لو ظهروا له بهيئتهم الحقيقه مستحيل ينام ليلتها
اصيل : يعني تقول متشكلين ؟
بندر ( الشيخ ) : تقريبًا الجن ينفضحون من اشكالهم التشكيله لانهم لا يتشكلون بهيئه كامله
اصيل بضحك : اي عارف ذي المعلومه وحافظها من كثر ما انقالت لي
بندر ( الشيخ ) يضحك : آن شاء الله يخيب ظني ان موضوعه صعب
اصيل : ان شاء الله ، يعني جاي ؟
بندر ( الشيخ )بمزح : اي جايكم وين تبغاني اعالجه عن بعد
اصيل يضحك : ان شاء الله لا جيت بخير وسلامه ابوريك ايهم فراس
بندر ( الشيخ ) : ان شاء الله ان شاء ان الله فمان الله
اصيل : فامانة الخالق
...
الساعه ١٠ : ١
هادي : عطني
: كم ؟
هادي : كم تجي ؟
: داخل سوق يخوي انت حدد وانا اجيب لك
هادي بعدم صبر : تسعة تسعة
: اوف شكلك بتسهر بسعادتك للعيد الجاي ( وضحك)
هادي : اخلص علي
: اصبر شوي يا رجل الاعمال الي بيجيبها جاي وشفها جات
هادي ياخذ كيسين بسرعه : جيبها
لكن الشخص المجهول يسحبها اسرع من هادي وضحك
: سلم واستلم
هادي بعصبيه : اخلص كم ؟؟؟
: اصبر يالبزر حسابك ٢٥٠٠
هادي بعدم صبر : جب
قرب الشخص المجهول ياخذ المبلغ وسحبه هادي وقال بضحك: سلم واستلم
: خذ كيسك يالتافهه
هادي يضحك: خذ مبلغك يالغثيث ومشى وهو يضحك والشخص الي تركه منقهر من اسلوبه
: انا سحبتك ياولد سعد المفروض تشكرني على سعادتك
ومشى هالشخص المجهول
...
عند هادي الي بمجرد ما دخل البيت قابل ابوه
ابو سامي : وين كنت؟
هادي بارتباك: مع مروان 
ابو سامي : زين المره الجايه لا تجي ٣٠ : ١ الليل وانت برا
هادي : سم
ام سامي قابلت هادي بطريقها : وين كنت يا وليدي الله يصلحك
هادي بعصبيه واضحه : كل من شافني حقق معي ورفع نبرة صوته اكثر وقال : كنت مع مروان يمه مع مروان سمعتم كلكم ؟؟
ابو سامي استغرب رد فعله : امش اقعد اشوف ليه معصب
هادي وهو شابك يدينه في بعض ويحركهم بتوتر : ضغوط اول سنه جامعه يبه اعذرني
ابو سامي : مب انا الي تعتذر مني اعتذر من الي رفعت صوتك عليها
هادي اتجهه لامه وهو مبتسم وباس راسها : اسف يمه والله ما قدرت اسيطر على نفسي يا جعل لساني القص وصوتي القطع اذا رفعته عليتس ولا على ابوي
ام سامي بابتسامه : اسم الله عليك يا يمه لا تكلم كذا وانا امك مهما زعلت عليك مصيري ارضى لانك وليدي
ابو سامي تنحنح من كلامها الي يضعف ولده اكثر وام سامي فهمت انه لازم تسكت : يلا يا يمه روح غرفتك وارتاح شوي واذا بغيتني انا هنا 
هادي يبوس يدها ويبتسم : جعلني ما افقدتس يالغاليه
وتركهم وهو في عز توتره ووده لو يدخل غرفته بسرعه الي كانت باخر الرواق عشان يقدر ياخذ راحته في جرعات سعادته او بالاصح مخدراته!
...
اصيل : وخالي جاي يوم الخميس ان شاء الله مستعد ؟
فراس : ...
اصيل : خايف ؟
فراس : لا لا ابد بس شعور غريب
اصيل : اوصفه ؟
فراس : ما اقدر ما ينوصف يعني انا الحين بكون بين نارين نار جن ونار اهلي ؟
اصيل يربت على كتف فراس : انت مب بين شي الا انه تطلع سالم من كل شي
فراس الي توتر اكثر : شلون !
اصيل : قال لي الشيخ انه موضوعك صعب شوي بس بتتحمل انت ان شاء الله بس ابيك تستعد لكل احتمال
فراس يضحك : انت بتوديني لشيخ ولا بتدخلني عمليه
اصيل يضحك بصوت اعلى : اسلوبي شخصيات
فراس الي ما امداه يكمل ضحكته سكت وبلحظه طاح بالارض بشكل مفاجئ
اصيل الي انفجع : فراس فراس
فراس الي ما كان يرد عليه بحكم انه طايح شبه مغمي عليه واصيل الي تورط وما عرف يتصرف
...
عند سُهاد الي مياسين جات لها وسولفوا ورجعت بيتهم كانت الساعه تقريبًا ٣٠ : ٣ الفجر
و سُهاد في فراشها
حست بشي يخنقها بكل قوته وبصوت انثوي قالت : انتي انتي شوشتي راسه علي 
سُهاد الي ما كانت تقدر تنطق او تبرر من شدة القبضه :
م.. من .. هو....
الجنية : فراس زوجي ولو ما كنا عاقدين على طقوسكم
سُهاد انصرعت من كلامها واستسلمت لقبضتها وعيونها اتسعت بصدمه
الجنية لاحظت الاستسلام : شفيك ياحلوه تاركه نفسك انتي تدرين اني اقدر اقضي عليك بقبضه ؟
سُهاد الي كانت تتمتم ايات في داخلها الى ما خفت القبضه عنها او أختفت تقريبًا وبدت تاخذ نفسها وتتصل على اصيل وهي في قمة خوفها
...
اصيل بخوف : شلون شلون ؟؟
سُهاد ودموعها على خدها : شي ما كنت اشوفه قال..
صمتت لمده دقيقه
اصيل بانفعال : وش وش قال!!!
سُهاد تشهق : قالت فراس ..
اصيل : وش فيه! وش فيه فراس ؟ هو معي هنا مدري شفيه وش قال مدري قالت وش .. سُهاد اخوي لا تبكين وفهميني اسمعيني وش قالت لك ؟
سُهاد : اصيل انا خايفه
اصيل الي مسك راسه من الي يصير : لا تخافين يا امي انتي جايك انتظرني ولا تبكين ولا تطلعين وامي لا تشوفك فهمتيني ؟
سُهاد تهز راسها بالايجاب : اي اي
وقفل اصيل المكالمه وهو شايل هم اخته الي ما يدري وش دخلها بكل ذا وقاعد يرفع فراس
فراس بألم يئن : آهه
اصيل : فراس تسمع ؟
فراس : مين انت !
اصيل وقف مكانه : ما تذكرني ؟
اخذ فراس دقيقتين يسترجع ذاكرته
فراس ابتسم بحزن : اصيل ابلشتك فيّ اعذرني وش صار
اصيل استغرب بس تجاهل : اتركك من الي صار تتألم ؟وين ؟
فراس: اي حيل
اصيل بحزن على حالة فراس : برفعك وساعدني
فراس هز راسه بالايجاب وآلم
اصيل رفع فراس وكان فراس يمشي ببطء والم غريب لاول مره يصير وكان يتنفس بسرعه وضربات قلبه تتزايد ويحس بصداع شديد
فراس مسك راسه من شده الصداع : متى بنوصل
اصيل الي وقف عند السياره : وصلنا اطلع
فراس طلع وكان ساكت وحاط يده على قلبه ولاحظ اصيل
اصيل : باقي تتألم ؟
فراس : اي شوي ويروح
سكت اصيل وهو عين على الطريق وعين على فراس الي لفت نظره انه يتنفس بسرعه ويتنهد وحاط يده على صدره
فراس ويده وصوته ترجف : اصيل اصيل
اصيل انفجع : وش فيك ؟ شقومك؟
فراس بنفس الحالة الاولى : افتح الشباك بسرعه افتح
اصيل : اوقف على جنب ؟؟
فراس الي بمجرد ما اصيل وقف نزل بسرعه وركض يتنفس بشهيق وزفير وقلبه يطلع وينزل وشعور اول مره يواجهه
اصيل معه ماء : خذ فراس
فراس جلس على حافه الرصيف : احس قلبي بيتكي جنبي
اصيل جلس جنبه وضحك: بسم الله عليك وانت الله يهديك كل شي بقلبك ما تطلعه
فراس بحزن : ولمن اطلعه ؟
اصيل : نايف مهو بخويك ؟
فراس ضحك ضحكة سخريه : خويي بس فيه الي مكفيه ازيده ليه؟
اصيل: انا عندك ما عندي شي فاضي طول وقتي
فراس دقه بابتسامه مُتعبه: اي اي شفتك قبل يومين ما عندك شي
اصيل ابتسم معه : انا ما عندي شي دامه ولد عمي بيبتسم
فراس قام : يلا امش نرجع الساعه ٢٠ : ٥ بيقومون للصلاه
اصيل فز وهو يناظر الساعه وعيونه بتطلع : هذا وقت ابوي يقومنا امش فراس امش قبل يجلدني
فراس الي كان يضحك بضيق ومشى مع اصيل للسياره وهو واثق انه بيفزع لاصيل مثل سنينه القديمه
...
ابو سُهاد يدخل المقلط ويشوف العيال كلهم صاحين وهذا شي غريب عليه ما تعود عليه
ابو سُهاد : صاحين ماشاءالله وش عندكم ؟
ثابت : سمعنا الاذان وصحينا
ابو سُهاد بشك : ايه ايه خير ان شاء الله يلا كلن يتوضى ويلحقنا المسجد
العيال : ابشر ابشر ان شاء الله
صالح تنهد من التوتر : الحمدلله ما شك
نايف : اقنعني انه ما شك كل شي يثبت انه شك
ثابت : ما سأل عن اصيل الي هو اول واحد يقومنا
نايف ارتبك يوم شاف ابو فراس جاي : يا عيال يا عيال عمي
صالح يضحك : طيب وشقومك اثبت
ابو فراس: السلام عليكم
العيال : وعليكم السلام والرحمه
ابو فراس بصوت ثابت: فراس صاحي ولا باقي مرطخ الوصخ
نايف ارتبك : الله يهديك يا عمي يعني انت ما تعرف فراس انه بيقوم قبلي ويصلي بالصف الاول معنا
ابو فراس : اي زين وينه ما اشوفه؟
ثابت : راح يتوضى وبنلحقه حنا بعد شوي بس بصحي عمر
ابو فراس طلع
نايف بتوتر مضحك : انا وش سويت ياعيال ورطت فراس
ثابت يضحك : الله يعين فراس عليك وعلى فزعتك
نايف يدقه : قم قم توض بس قبل اوريك الفزعه بك
دخل فراس و وراه اصيل
صالح : شرفوا ضيوف الشرف
اصيل : صالح شف والله مالي خلق ازعل وازعلك اسكت عني
سامي : بس يا شباب هدو يلا مشينا نتوضى ونصلي
نايف اخذ فراس على جنب
نايف : بعطيك الصدمه بسرعه
فراس : وشو؟
نايف: انا قلت لابوك انك رحت توضى وبتصلي بالصف الاولى وتقوم قبلي
فراس اتسعت عيونه من الورطه : وشوووو؟؟؟ نايف انت انهبلت ؟ ولا الديره عجبتك بزياده لدرجه تنسى وش يصير ؟
نايف : ياخي والله ما عرفت وش اقول لابوك وانت تدري اني اخاف منه تورطت يوم سأل
فراس تنهد : امش بس امش الله يعطيك العافيه على الفزعه
نايف يضحك : الحين انت شلون عايش مع مدرب عسكري ما تخاف منه
فراس : ماهو مدرب عسكري خلاص اسكت بس
...
عند المغاسل بجهة الرجال
بعد ما الكل ترضى وراح بقى نايف وفراس
فراس : شلون اتوضى الحين
نايف تنهد : نفس ما توضيت لصلاه العشاء  قبل تروح الجبل
فراس تأفف : طيب انقلع صل انت بلحقك
نايف راح وتركه واتجه للمسجد
فراس : طيب الحين ناسي كيف
فتح جواله واتجه للاسئله عن الوضوء وتوضى بنفس الطريقه الي شافها
فراس : طيب توضيت والموضوع كان سهل الحين كيف اصلي وانا مبتلش بالاثنين الي معي
القطوه السوداء ظهرت فجأة
فراس : شجابك الحين ؟
القطوه السوداء بألم : ليش توضيت يا فراس ليش
فراس بادراك : اها يعني الوضوء .. حلو عرفت شي جديد ما يأذيني ويأذيك
القطوه السوداء : حبيبي ما ابي لك الاذى من مازر افهمني
فراس يضحك : توكلي انتي وهو انصرفي عني
القطوه السوداء اختفت بمجرد ما قال انصرفي
فراس : اي زين الحين نروح نصلي
واتجه للمسجد و صف جنب ابوه بالصف الاول وبدؤا الصلاه .. هالمره فراس ما تأثر منهم ابد كأنهم اختفوا وماهم موجودين وبالاصح كان فيه احد يحميه
...
طلعوا من الصلاه وكان الكل مبسوط ويحس براحه
ابو فراس : فراس
فراس بابتسامه : سم يبه
ابو فراس : انت تكذب علينا بالجن ؟
فراس اختفت ابتسامته : اني صليت ما يعتبر اني اكذب يبه انا بنفسي مب عارف شسالفه
سكت ابو فراس شوي وقال : وانس صادق ؟ انا صدز لقيت بسيارتك المخدرات ؟
فراس الي دارت فيه الدينا من كلام ابوه : لا يبه انس غدار وخطط لغدرته
كان نايف وراهم يسمع هالحوار وهو يقول بنفسه : والله يا انس لاندمك على الي سويته
فراس التفت لنايف : شفيك ورانا امش يميني هذا مكانك
ابتسم نايف من كلام فراس المبطن ومشى يمينه
...
بالمطبخ جهة البنات
سُهاد سارحه تفكر بعد ما جاها اصيل وفهمها وهداها شوي
مياسين بابتسامه: شفيها الحلوه اليوم مختفيه ؟
سُهاد : مب مختفيه سويت فطور الرجال وارسلته ورجعت انتي المختفيه يابنت
نوران : صادزه مياسين اليوم مدري شفيها سُهاد ما تسولف
سُهاد : اسولف بس صديقتي صار لها شي وافكر فيها
ديم دخلت : ميسو سألت سيف عن اخوك قال تكلموا هو وعمي وهم راجعين من الصلاه
مياسين : وش تكلموا فيه؟
ديم: ما يدري يقول
مياسين قامت وهي تتأفف
سُهاد : وين رايحه ؟ الفطور جاهز
مياسين : شوي واجي
...
بعد ما وصلوا المجلس الي كان الفطور جاهز موجود فيه والكل جلس وفطروا وخلصوا وقاموا الا ابو فراس الي قام وكان يحس دنياه تدور فيه وترجع سند نفسه على نايف الي كان واقف جنبه
نايف بهدوء : شفيك يا عمي ؟
ابو فراس : ما ادري مافيني شي بجلس
ابو فراس دار راسه وهالمره صفق قلبه بصدره وحاول يتوازن بس طاح
فراس اتسعت عيونه وهو يكلم مياسين : ابوي
ركض فراس لابوه : يبه يبه
: وخر وخر عنه اسمحوا يتنفس شوي
الكل بمجرد ما سمع الصوت بعدوا عنه
: عبدالكريم تسمع؟
ابو فراس :اسمعك يا حياه الشقى علامكم تصارخون حي حي
فراس حط يده على راسه : اخذت قلوبنا
الشخص المجهول كان ماسك يد ابو فراس يقيس النبض وبعدها القلب 
: ضغطك مرتفع ونبضات القلب عاليه جدا واجهت جهد كبير ؟
ابو فراس : ضغوط الحياة
ابو سُهاد : قلت لك يابن الحلال هد نفسك وارتاح ما سمعتني شف النتايج الحين
: طيب احتاج اني انقله للمستشفى بدر سُهاد وينها ؟ ابيها تثبت لي انها دارسه السنه الاولى نادها
فراس استغرب ومسك كتف الشخص  : هيي هيي من انت اول وش تبي ببنات الناس وجاي تسعف ابوي بعد!!!
ابو سُهاد : فراس يبه هذا عمك راكان صغيرنا
فراس ترك ياقة عمه : عمي ؟ ما اذكر التفت على اصيل وقال : عمي؟ عندنا عم صغير ودكتور ؟
اصيل : اي عندنا امش ناخذ ابوك ونروح المستشفى
فراس ما كان عنده وقت يفكر وهو يشوف ابوه بذي الحاله: طيب جاي
وراكان سبقهم وما كان عنده وقت ابد انه يجلس ويعرفهم عن نفسه
...
صالح تنحنح : يا قوم
سُهاد : هلا باخوي عضيدي مافيه احد ادخل
صالح : عمي راكان جا
سُهاد : الله يحييه وانا كنت بقولكم انه خالي بندر جا جالس مع امي
صالح مسك راسه : اخخخ يا راسييي من الاحداث ذي
سُهاد : ليش وش صار؟
صالح : عمي عبدالكريم طاح علينا وعمي راكان شخصه ويبيك بالمستشفى يختبر قدراتك
سُهاد شهقت : يبيني ؟؟
صالح يمسح على راسها بسخريه: اي ياعيون اخوك يبيك ولا انا اروح عنده واشخص وانا مهندس بترول ؟
سُهاد : لا تطقطق بس يعني مين يساعد امي ويسولف مع خالي
صالح : روحي وانا بغطي غيابك
...
في المستشفى
فراس يتكلم بالجوال : اي اي تعال ابوي ما يبيني قال اني مب ولده وانت ولده الوحيد يا عزام تعال
عزام : طيب وش صار وش فيه ابوي وش قالوا
فراس : قالوا اجهاد قلب وارتفاع ضغط
عزام : طيب يا فراس جايكم بس انتبه لابوي ولا تقول آنه تبرأ منك مازالت ولده
فراس : اي اي ولده قفل بس
فراس قفل وتنهد وهو واقف
نايف : فراس اجلس لا تشيل هم ان شاء الله مافيه الا العافيه
فراس ناظر لنايف وظل واقف
هادي وقف وقابل لفراس : اجلس يا فراس
فراس انهد حيله وهو يفهمهم نفس النقطه وعصب : ماني بجالس وش بتسوون؟؟
هادي الي كان تحت تأثير المخدر الي اخذه ليلة امس مسك فراس ودفه على الجدار : ليه ترفع صوتك وش قايلين لك حنا
فراس بصراخ: هادي وخر لا اقوم جن الارض عليكم واهد دنياكم فوقكم ابعد عني وانتبه
نايف الي سحب هادي : علامك يا هادي كنت احسب انك اسم على مسمى وش عصبك؟ انت تدري ان فراس متوتر
هادي : وخر نايف ماني معصب
نايف رفع حاجبه : كل ذا ومهو معصب ؟
فراس : خلاص روحوا كلكم انا بجلس مع ابوي ما احتاج ناس تصارخ بمستشفى
نايف بحده : فراس العن الشيطان واجلس
فراس جلس وهو منهد حيله من كثر ما صبر
طلع الدكتور واتجهه له فراس
فراس : دكتور وش فيه ؟
الدكتور : الاستاذ عبدالكريم بخير وهو حاليًا تحت رقابتنا وسلمنا الاهتمام لدكتور اخر تقدر تسأله عن الحالة
فراس : وش اسم الدكتور ؟
الدكتور : د.راكان
فراس : تمام يعطيك العافيه
...
بالغرفه عند ابو فراس
سُهاد الي كانت مهتمه بعمها جدًا وتأدي عملها ك طالبه طب و تشوف المعلومات الحيويه ، جلست على الكرسي الي جنبه وحطت يدها على يده
سُهاد : لا تخاف يا عمي ولدك بيصير بخير ادري شايل همه وقلبك ما يطاوعك تبرأ منه وتعبت من مكابرك عليه شوف اذا انت تغليني وانت تقول لي بنتي صح؟ ابيك ما تشيل همه ابد اصيل موجود يساعده ارجوك يا عمي لا تتعب ولا تخلينا نخاف عليك او ..
دخل فراس وتنحنح وما انتبه لوجود سُهاد
غطت سُهاد شعرها وكانت لابسه كمامتها وناظرت لفراس وقالت : ابوك بخير الحمدلله
فراس وهو يناظر عيونها : انتي؟
سُهاد وهي منحرجه من نظرته: انا ؟ وش فيني انا ؟
فراس ناظر فيها من تحت لفوق وتكتف: دكتوره سُهاد يعني
سُهاد عطته النظره الغير مباليه : معليش ما عندي وقت بطلع
فراس ابتسم بسخريه : محد ماسكتس اصلا
سُهاد طلعت وفراس جلس ويناظر ابوه قرب شوي من ابوه وقال : انا اسف ، عارف ما تكفي بس نهايتي قربت يبه
فراس الي فرحت فيه وسميته بذا الاسم على امل يطلع عليه وطلع عكسه فراس الي خيب كل احلامك وامالك وحتى فرحتك .. فراس الي سكت عن حزنه كبيره وصغيره والي رفع صوته عليك و سبك ولعنك او حتى فكر يضربك بغير عمد ، يوم ولدك قرب صار ما يدري هو بيعيش عشان يحضنك ويقولك انه تخرج من كلية الطب ولا ما يدري بيعيش عشان امه الي لطالما حلمت انها ترفع راسها بدكتورها ولا مياسين الي وقفت معي حتى بسئتي الي قررت انها ترفض واقعها واحلامها عشاني ولا جُمانه الي ياما سمعتها تحكي لصديقاتها عن حبها لي وكيف اني بدون اسلوب معها وتخاف مني اذا عصبت ؟ ، يبه عارف ما قصرت معي ، انا اسف على انه لك ولد مثلي ..
وحط راسه على يد ابوه ودمعته نزلت وما تحمل التعب ونام
...
عند العيال بالمقلط
نايف : يا شباب يمدينا ناخذ غفوه؟
ثابت : والله باخذ انا عقلي عقل نعامه ما يتحمل كل ذي الاحداث
صالح : زين اعترفت اصيل وين ؟
ثابت : مدري مختفي
مروان : مهو مختفي جالس على جواله بالحوش
صالح : خلاص البخوا
ثابت : نايف نايف
نايف كان نايم بسابع نومه من التعب وما رد عليه
...
سُهاد تسأل احد الممرضين : دكتور راكان شفت وينه؟
: اي بمكتب رئيسة القسم
سُهاد : مشكور
...
ابو فراس صحى على فراس منسدح على يده ونايم
ابو فراس مسح على شعر فراس وقال : مهما حاولت تبعد ترجع يا فراس ترجع
سُهاد دخلت بحماس : صباح الخير
ابو فراس: اششش اش
سُهاد توهقت : اسفه اسفه ما توقعته للحين هنا
ابو فراس ابتسم : ما عليه يابنتي ما عليه
سُهاد : عادي ابعده عن يدك ؟ بشيل المغذي
ابو فراس : ضروري ؟
سُهاد تهز راسها بالايجاب : اي
ابو فراس يصحيه : فراس ولد فراس
سُهاد : ما بينفع ببعده انا
سحبت سُهاد جسم فراس عن يد ابوه وانفجعت من شكله كان وجهه جروح وخشمه ...