تعذُر الشروق أيام ..

10

رجوع زمني في ذاكره نايف
قبل ٤ سنين في بيت نايف
نايف ينادي : سدن .. يا سدن  فهد وينه ؟
سدن وهي شايله صحون : مدري يا نايف مدري
نايف ياخذ الصحون منها : عطيني عنك عنك
سدن بكل حنيه : يا نوم عينتس يا سدن وانتي عندتس نايف بجماله
نايف ابتسم : الملسونه تكلم بالحب لنايف ؟ ابد ذي يبي لها احتفاليه مع فهيد وحسينوه
سدن تدقه بضحك : والله يا ويلك لو يسمعك ابوي ليمصع اذونك الثنتين
نايف يجاريها ويمزح : والله دامه به سدينوه تمدح اكيد اني بحتفل هذي ما تجي الا كل ٥ سنين
سدن تضحك وهي تشغل اغنيه محمد عبده ( ياليت العمر يتوقف على ساعه هنا جنبك ) : وهذي لك بعد
نايف الي تكتف وهو مبتسم يناظر اخته واهداءها ونفسيتها الحلوه وقال : عاد اليوم شكلتس ما كرفتي البيت وضحك
سدن بحزن مصطنع : والله ظالمني ترا كرفت وزينت الفطور والغدا والقهوه والشاهي وشبة النار وهذا وانا بنت بعد
نايف يضحك عليها : لا لا انا ظالمتس ظالمتس متأكد بس علميني وينه فهيد ؟
سدن بخبث : عطني ٥٠ واعلمك وينهم كلهم
نايف ضحك لخبثها وعادتها وطلع من مخباته ٥٠ : وهذي خمسين لتس بس علميني وقتي لا يروح وهو ثمين
سدن : ابد راحوا العزبه حسينوه وفهد وابوي وعمي ابو امير مدري ليش تاركينك تبلشني
نايف : طلع هذا علمتس يالملسونه.. يلا بامان الله تبين شي ارسليه وتامرين فيه
سدن بفرح : يازين حياتس يا سدن وعندتس هالاخو الله لا يحرمني منك
طلع نايف وكملت سدن الاغنيه والابتسامه شاقه وجهها
...
بعد نص ساعه تقريبًا وصل نايف لعزبه ابوه وشافهم واقفين ومجتمعين عند فهد وكان واضح على ابو نايف الانفعال
نايف : السلام عليكم
الكل التفت له : وعليكم السلام
ابو نايف : وش جابك انت من علمك اننا فيه!
نايف : قلت امر اشوف الابل واستغربت انكم هنا فهد وينه
فهد بحزن : هنا
نايف : علامه صوتك وش بك !؟
فهد الي كان بيقول وش فيه لكن قاطعه ابوه وقال : ما فيه شي انت رح لامك واختك البيت مابه رجال
نايف : يبه باقي تخبرني الوغد الي تلعب عليه بكلمتين ؟
فهد بغصه : نايف تكفى لا تصدق الي ينقال
نايف الي كان عارف وش ينقال : وش ينقال يا فهد تخبرني اصدق غيرك في مواضيع كبيره؟
ابو نايف : اثرك تعرف سعسعته اخر الليالي والي يسويه !
نايف بحده : اي يبه اعرف واعرف انه يروح يشتغل شغل زياده على شغله عشان ما يكون حملٍ عليك
فهد : شفت يا يبه حتى نايف شاهد علي والله ان مالي بذي الامور ولا اعرف وش دخلني فيها
ابو امير بانفعال : تختلي ببنتي وتقول مالك فيها!!
نايف الي اتسعت عيونه : وش ترطن انت ومن انت عشان تقول فهد اخوي يختلي بوحده وانت تعرفه اكثر منا كلنا انه مستحيل يرفع عينه حتى ويناظر في بنت
ابو امير بعصبيه : يا تزوجونه بنتي يا ما بيننا الا دم سمعت يابو نايف !!!
نايف الي ما تحكم في اعصابه ومسك ابو امير من ياقته : تتبلى على فهد الضعّيف وتقول انه اختلى في بنتك وترميها علينا وهي بها بلا والبلا تربيتك يالمخنز ذي ما تمشي علي تسمع! وفهيد مهوب متزوجها ضف وجهك انت وعيالك وبنتك العوبا
فهد الي كان يحاول يفرق بين ابو امير ونايف : نايف تكفى لا تزيدها
نايف الي ترك ابو امير بكل قوته : هذا هو العلم وصلك وبنتك تضف وجهها ما لقت الا فهد تبتلى عليه لعنه تلعنك انت وبنتك تقلع يلا قم انقلع
قام ابو امير وتركهم وهو يتوعد لهم انه ما يخليهم وبيقتله لكن محد عطاه اهتمام
ابو نايف بحده وثبات : لا اشوف وجهك يا فهد تبريت منك ولانت بولدي ولا لي اي علاقه بواحدٍ اسمه فهد
نايف بحزن : يبه تكفى لا تدّخل الشيطان بيننا لا تحرم ولدك من اخوانه ومن امه ومنك
ابو نايف ما اهتم لنايف : الحين ياخذ اغراضه ويطلع من بيتي لا اشوفه
حسين مسك يد ابوه : تكفى يا يبه تكفى لا تفرق عايلتك بيدك يا يبه تكفى الا كلام الناس لا تصدقه ما بيبقون شيٍ الا ويقولونه
ابو نايف سحب يده بقوه : الي يحامي عن هالولد ما اعرفه سمعتوني ؟
نايف الي كان عارف ابوه قوي القلب ولا يهمه حتى ولده جلس على ركبته يترجى ابوه يوقف مع ولده ولا يترك مجال للناس بس كانت ترجيات نايف بلا فائده كالعدم
فهد الي فقد الامل وقال بصوته الي خنقه العبره : نايف قم لا ترجى وانا اخوك
نايف الي كان يبكي من غلاة فهد عنده : تكفى يا يبه وتكفى تهز الرجال
ابو نايف بحده وكان داخله يتصافق من كلامه ودموع نايف وبكاء حسين الصامت وثبات فهد الي كان عارف وش وراه  : انا رجالٍ عجزت اربي رجال قلوبهم قويه
فهد بصوت حاد : قم انت وياه لا تذلون انفسكم عند شخص ما صدق عيونه
قام نايف وبعده حسين الي كانت دموعهم وعيونهم الحمرا تغورق وكانت توصف قوة وحزن الموقف على قلوبهم
ابو نايف مازال ثابت : قلوبكم الرهيفة ما تنفعكم
وراح وتركهم في دوامه البكاء والتفكير وهم يحضنون فهد ويترجونه يراضي ابوهم لكن كان رده الوحيد : ما اراضي الي يشره ومابه شرهه وانا اخوكم
وجلسوا ذيك الليله في قمرا شبه مكتمله وكل واحد فيهم يبكي بصمت من هنا تعرفون غلاة فهد عند اخوانه وكم من مره حاولوا يرجعونه بس كانوا بين نارين نار رجعته ورفضه ونار ابوهم الي نذر لو دخل هالبيت يطلع منه
تنهد نايف وهو يرجع للواقع على صوت الممرضه
الممرضه : انت نايف ؟ المريض بغرفة رقم ٧٩ يناديك
نايف فز : اي انا
دخل نايف وهو يشوف فراس مبتسم بألم
فراس: حي الله سمح المحيا
نايف الي كانت ابتسامته فيها تعب : لا والله الا حي الله صدري الشمالي ياولد غبت عني يومين اختبصت اموري والله اني بدونك ضايع
فراس ضحك بألم : قلت لك اني جدولك بس ما تصدق وجاك الدليل
نايف الي كان خايف على فراس حيل : يوجعك شي انادي الدكتور ؟
فراس اعتدل بجلسته : لا لا ما يوجعني شي بس مشتاق لسوالفك وانا صراحه شاك ان بك شي وجهك اصفر وش صار ؟
نايف نزل راسه : ابد كالعاده اهوجس
فراس ضحك : اخويا نحتاج اخويا يواسونا
نايف : مبطي ما نلقى غير بعض
فراس : انشهد يا سمح المحيا
نايف تنهد بابتسامه: الا قول لي وش صار لك يوم شفت ذيك البنت ؟
فراس تذكر وتربع على سريره: مدري شلون لفت الدنيا وذيك البنت الي ساعدتني شفتها ابشع مما يكون
نايف قابل له : شلون شلون !
فراس : يعني انا متعود على اني اشوف جن واسمعهم لكن اني اشوف بنت كانت طبيعيه فجأة تتحول لابشع كائن شي روعني اول مره يصير
نايف : لاحظت انا بس عارف الي يصير وبعدين دقيقه انا شفت اصيل سحب البنت وطلع ؟
فراس ضحك: اي اي اخته طالبة هنا
نايف يضحك : احسبه بعد.. اشوف خشمك لايكون انكسر ويجيني تأنيب اني حسدتك عليه
فراس فز : لا عاد ابعد عنه لا تحسبني ثور ما افهم لعبك
نايف يضحك بعلو : واضح انصدت على كثر ما سويتها
واخذتهم السوالف والمزاح وكان فراس فرحان جدًا ان فيه احد يفهمه ويسعده اما عن نايف الي كان في قلبه هم اخوه لكن انزاح الهم عنه اول ما قعد مع فراس وتعالت اصوات ضحكهم بالغرفة
...
في بيت ابو فراس
ابو فراس : ياهل البيت
مياسين فزت: سم يبه
ابو فراس ابتسم : السلام عليكم والرحمة
مياسين : وعليكم السلام .. اجلس اجلس يبه
ابو فراس : وينهن امك واختك ؟
مياسين : بالغرفه .. يبه فراس وينه ما جا ؟
ابو فراس ابتسم : بيجي بعدي .. انا بشوف امك
مياسين مشت بعد ابوها متجهه لغرفة امها 
ام فراس فزت: هلا هلا يابو فراس .. جُمانه جيبي لابوك ماء
جُمانه بحب تعود عليه الكل : عيوني لو تبونها اجيبها
ابو فراس: ياحبي لتس يابنت لطيفه
ام فراس : فراس وينه؟
ابو فراس ما حب يربكها : جاي جاي ان شاء الله عنده كم شغله مع العيال
ام فراس : اي زين شلت همه بس دامك شفته خلاص
مياسين تحك جلدها من التوتر : متأكد يبه؟
ابو فراس يبتسم ويهز رأسه بالايجاب واطمئنان
مياسين بنفسها : الحمدلله .. شكلي بروح اتصل على سُهاد اسولف لوقت جيت فراس بس ماني مرتاحة ابد لكلام ابوي شسواه!
ام فراس : مياسين
مياسين: سمي يمه امريني ؟
ام فراس: افرشي لنا بالحوش وضبطي القهوه والشاهي بننتظر فراس ونتقهوى
مياسين بمزح : كم لي ؟
ام فراس تضحك : افا هذي نهايتها وانا امتس
مياسين مازالت تمزح : طبعًا يمه الدنيا غالية الحين كل شي حقه بفلوس
ابو فراس يضحك : لتس الي تبينه بس وجبي لامتس وابوتس يابنت
مياسين بضحك : شدعوه يبه امزح معكم والله اني اخسي ما اقهوي هالوجيه الزينه جعل يومي قبلكم
ام وابو فراس بنفس اللحظه : بسم الله عليتس
ابو فراس : وش هالحكي يابنتي الله لا يجيب يوم اشوف عيالي فيه متأذين
مياسين بابتسامه : اسفه قلتها على سياق الحوار بالغلط
وتركتهم يسولفون وراحت تضبط القهوه والشاهي وترتب المطبخ وتنتظر جيت فراس الي همه بقلبها اكبر من اي شي
...
في المستشفى عند الاستقبال
فراس : اوقع هنا اني بطلع ؟
الموظف : ايه .. تفضل
نايف : ابعد انا بوقع عنك
فراس يناظر فيه : نايف فكني اقسم بالله ما اتحمل المستشفى ذا
نايف : اخاف يكون خطف ولا اذن لـ شي كبير وخر اوقع انا
فراس ضحك : طيب انا المريض يا ذكي
نايف : لا ما عليك انت مرضت وانا معك روح في جسدين
فراس يضحك : طيب خذ وقع ليه لا
الموظف : بس المريض..
نايف : انا المريض وعلتي ذا الولد .. يلا مشينا ؟
فراس ابتسم : اي اكيد الحين الدنيا انقلبت وابوي ما قدر يسيطر على الوضع
نايف : لا يعني ما اتوقع حط توقعاتك في عمي اكبر يمكن للحين ما قال لهم
فراس : بتكحلها عميتها
نايف يضحك: هي عمياء بكحل ولا بدونه
فراس بضحك : يا عليك سوالف مدري شلون تجيك
...
في بيت ابو سُهاد
ابو سُهاد : يعني شلون فراس تجنن؟
سُهاد تضحك: لا يبه الله يهديك هو بس صار له شي غريب وش جابنا للجنون
ابو سُهاد بتفكير : انا ما فهمت عليتس كل حكيتس عنقليزي مدري شنهو ذا
اصيل يضحك بصوته كله : يبه انجليزي اسمه
ابو سُهاد ضحك : عاد وش دراني بحكيكم هذا
صالح : وهو صادز ابوي ليه تتكلمون معنا بمصطلحات انجليزيه
ثابت دخل : هل لانها طالبه طب ؟
سُهاد بابتسامه: جا من ينصرني
ابو سُهاد : خليتس منه وقولي لي متى يطلع فراس !
سُهاد : كم الساعه الحين ؟ اتوقع انه طلع حتى
صالح : الساعه ٩ الصبح
ثابت : ماشاءالله لو ما قلت الصبح ضعت احسبها بعد العشاء
صالح : يبه اعذرني اذا صفقته ولا تزعل مني
ابو سُهاد يضحك بصوت جهوري : ابد ابد خذ منه حقك
سُهاد : مطلق وينه ! ما جا غريبه
ام سُهاد دخلت ووراها مطلق : اي انتي لتس يومين تدورين بالمستشفى ما دريتي عن اخوتس وحرمته
سُهاد فزت : علامهم يمه ! فيهم شي
مطلق : فينا الخير وانا اخوتس الحمدلله
سُهاد قامت تضمه بحماس : مطلوقيييييي اشتقت لك وينك مبطي عني
مطلق بضحك : فكينييييي لا تدلعيني ذا الدلع الخايس
صالح : اجحدتنا عند مطلق
ثابت : المفروض انك متعود من زمان
اصيل ابتسم يخفي الشكوك : ابي اطلع بس جازت لي الجلسه
صالح : انت شعندك كل يوم طالع ؟
اصيل : شدخلك حرمتك انا تحقق معي
مطلق بفرح : جاي اعطيكم الخبر المصيري والي يتكرر المره الثانيه بنفس المشاعر
سُهاد بحماس : وشوو وشو تحمست
صالح : الله يستر اذا قال مصيري اعرف انه مصيبه حلوه
ثابت : هو قال المره الثانيه وش صار في الاولى ما فهمته
اصيل : اسكتوا عشان تعرفون طيب
مطلق والابتسامه شاقه وجهه : يمه يبه بتصيرون اجداد وانتم بتصيرون اعمام للمره الثانيه
صالح : وش تقول انت اصبر استوعب
ثابت : ياحمار بتصير عم للمره الثانيه .. دقيقه وشو عممم!!!
سُهاد بفرح : ااييييييي مطلوقيييي مبروكككك الله يجعله من الصالحين وتشيله وتشوفه في حضنك
اصيل قام : مبروكك الف مبروك يا مطلق الله يجعله ذريه صالحه ويذكر بين الناس بالخير
مطلق مبتسم : الله يبارك فيكم عقبال ما نشوف عيالكم واصير عم وخال انا بعد
صالح : دقيقه هو وش بيجيك ورع ثاني قصدي ثالث ؟
مطلق يربت على كتف صالح ويضحك : اي اي الحمدلله على السلامه استوعبت يالفاهي
ثابت نط : مبروكككك مبروكك جعله شاهد لك لا عليك
مطلق ضحك : متابع هو ترا ورع شايل دمنا
صالح : والله بصير عم مره ثانيه صدق !
مطلق بمزح : ايه انا فاضي لك امزح معك بموضوع يفرح
ابو سُهاد بابتسامه : الف مبروك يالغالي يتربى بعزك واسأل الله ان يبلغك فيه باتم العافيه
ام سُهاد بدموع فرح : الف الف مبروك يا امي انت الله يبلغك فيه وتشوف عافيته وتشيله بين يدينك ويجعله من الصالحين
مطلق : امين يا يمه الله لا يحرمني منكم ومن فرحتكم ويجعل بيتنا تعمر به السعاده ولا يدخله الحزن
الكل : امين يارب
سُهاد : اذا خلصنا دعاء وتباريك شرايك تجيب رشا عندنا ؟
مطلق بمزح : عاد ذي ما يبي لها اكيد بجيبها بالدور الثاني تحتاجك وتحتاج سوالفك الي توسع الصدر
سُهاد فزت : صدق بتجيبها !؟
مطلق يضحك : والله مدري بشوفها اذا بتتوحم على خشتي بجيبها عندك تشوف جمالك يا وخيتي
سُهاد بمزح : استحيت اصبر
صالح يضحك : شف شف شتقول ... اذنك عبرت عن الوضع اصلا
والكل كان مبسوط ويضحك بوجود مطلق اخوهم الي فرحهم بالخبر الجميل مع الصبح ..
...
في بيت ابو فراس
مياسين بالمطبخ تغني : يا راميني بسحر عنيك الاثنين .. ما تقولي واخدني ورايح فين ...
فراس : ياهل البيت
مياسين تكت على الباب : هلا بك
فراس : بسم الله اخذتي قلبي كم مره قلت طلعي صوت
مياسين صدت معصبه : احسن
جُمانه ضمت فراس : اشتقت لك
فراس يبعدها عنه : اي حتى انا بس وين امي ؟
مياسين : تتقهوى هي وابوي برا شلون ما شفتهم!
فراس : جيت مع الباب الخلفي يا ذكيه
جُمانه : الحين بتفجعهم انهم ما شافوك وانت داخل
فراس : ما عليتس بقولهم بس خذي ذا ..
جُمانه : وشو ذا ؟
فراس بابتسامه : لتس انتي وميسو
جُمانه وهي تفتح الكيس وتشوف ان فيه ايس كريم ومفرحات يحبونها : الله تعرف وش نحب !؟
فراس مازال مبتسم : خواتي شلون ما اعرف .. يلا انا رايح لامي وابوي
مياسين برضى خفيف : ارجع هنا بعدين يويلك تطلع وانا ما حققت
فراس يضحك : داري مالي مفر منتس
اتجه فراس لامه وابوه
فراس بابتسامه : السلام عليكم والرحمة
ام فراس : هلا هلا وعليك السلام
ابو فراس : وعليكم السلام
فراس : اشوف الخواطر منشرحه
ام فراس : خلك من الخواطر وين كنت ما علمتني ؟
فراس يناظر لابوه ينتظر اجابه وكان بينهم فهم نظرات
فراس فهم نظرات ابوه : هذا شسمه كنت مع اصيل وعمي بدر
ام فراس : متأكد ؟
ابو فراس : الله يهديتس يا لطيفه هو وغد عشان تعلمينه ويش يسوي ؟
ام فراس: ماهو وغد لكنه..
فراس يقاطعها ويبوس راسها : لكن اني جاي عشان ارضيتس لاني ما قلت لتس ونسيت
وجلس يسولف مع امه وابوه وما جاب طاري الي صار ابد
فراس قام : يلا استئذنكم
ابو فراس : على وين ؟
فراس : ابد العيال اتصلوا علي قالوا تعال
ابو فراس : اجل نايف معهم اكيد اذنك معك
فراس بمزح : لا شفها طايحه جنبك
ابو فراس وام فراس فهموها وضحكوا
فراس مازال يضحك : ياجعلني ما افقد هالضحكات واشوفها دايم ولا يعتم حزن علينا
ام فراس : امين يا يمه انتبه لنفسك
فراس : ازهلي 
ابو فراس ضحك : هالكلمه ما تطمني ابد
فراس : ازهل ما بجيب مصايب
ام فراس تضحك: عنادك يا عبدالكريم
...
في غرفة سُهاد
سُهاد وهي تمشط شعرها وتغني :
ما خطر لحظة في بالي اني بلقى حببب عمري
و فجأة شفتك وانتشيتتتت كل وقتي صار ... وقتك
آهه ما فضيت والله
دق الباب
سُهاد : تعال اصولي تعال
اصيل : ميته بالحب انتي وش هالاغنيه الهابطه
سُهاد بابتسامه: وش عرفك بشي اسمه كلمات اغاني عميقه
اصيل بلحظه ادراك : حتى كلمات تجيب الهم .. دقيقه لا يكون تحبين من وراي !!
سُهاد تغايضه: واذا حبيت وين المشكله
اصيل : لا تلعبين باعصابي هو ملعوب بها أصلًا
سُهاد مستمره : كل وقتي صار وقتك ومن عرفتك ما فضيتتتتت
اصيل : اتركي هالحركات اففف الدينا صارت حر
سُهاد بابتسامه خبث : ما احتريت الحب قبلك ما احتريتتتت ليننن جانييي بدونن...
ثابت دخل : موعد واهتديتتتت
صالح بعده : الله على الدويتو الخايس
اصيل : تشوف انت جالسه تغايضني على الحب
صالح : اخر ما توقعنا ان اختي انا تحب من وراي
سُهاد بمغايضه : كنت اظن الحب لعبة وكذبه بيضا وانييي بقوى
اصيل شالها وهو يضحك : والحين بتقوين ولا !
سُهاد : نزلنيييييي يبه شوف اصيلللل
صالح يضحك : لا تنزلها الا اذا اعترفت
اصيل : تصدقون خفيفه حتى الاوزان الي اشيلها اثقل منها
ثابت بضحك : تكفى تمرن فيها خل نضحك
سُهاد بضحك : الله ينصرني عليكم يا عيال سمر نزلنييي تكفى اغيضكم بس ماحب احد والله
اصيل وهو باقي شايلها : افكر بتأييد فكره ثابت
سُهاد بضحك : تكفى اصيل والله ما احب احد ترا بزعل منكم
ثابت : خلاص نزلها اختي ما تكذب واهلها ما يهون
صالح الي فطس ضحك : اقسم بالله شكلها يموت ضحك
سُهاد تضرب كتفه : اي اي اضحك بس زعلتوني
اصيل كاتم ضحكته: لا ما يهون ما يهون زعلك نمزح معك
ثابت يضحك : ما يهون والله صدز
سُهاد بضحك : حسبي الله صرت اضحوكه لكم
وجلسوا يضحكون كل ما تذكروا شكلها ويسولفون
...
في مجلس ابو سُهاد
فراس دخل : السلام عليكم
الكل : وعليكم السلام
: هذا ولد منهو يابو سُهاد
ابو سُهاد : هذا ولد عبدالكريم
: ماشاءالله ماشاءالله كبر والله
فراس في نفسه : اجل بنتظرك تقول اكبر .. هالمجلس يجيب لي ضيق
: وش اسمه يا بدر ؟
ابو سُهاد : اسمه فراس يا صقر فراس
صقر : ايه فراس فراس ايه عرفته عرفته هذاك الوغد الي كان يجي مع ابوك رحمة الله عليه
ابو سُهاد بضحك : وصلت وصلت يا صقر .. يا فراس
فراس فز : سم ياعم
ابو سُهاد : قهو عمك صقر
فراس: ابشر ابشر
فراس في نفسه : يارب يجي اصيل بسرعه ما عاد اتحمل القعده هنا
فراس يمد الفنجال لعمه : سم
ابو سُهاد : الضيف اول
فراس يمد الفنجال لصقر : لا حلفت ما يجي الا لعمك
وبدأ الكرم يسيطر عليهم وفراس يطير بالفنجال بين عمه وصقر صاحب عمه
فراس يمد بعدم صبر : علي بالحرام ان ما يشربه الا عمي صقر
صقر : الله يهديك يا ولدي ما كان له داعي تحلف بحرام
فراس في نفسه : خليتم بها حرام طفشتوني ابتلشت
فراس يمد لعمه فنجال ثاني : سم يا عم
ابو سُهاد : اكرمك الله
فراس في نفسه : الله يكرمني بدخلة اصيل تنقذني من هالشياب الي بيشيبون بي
ابو سُهاد : فراس وانا ابوك
فراس : سم
فراس في نفسه : يالله ان تعينني يالله
ابو سُهاد : شف برا فيه كرتون بلح جبه وتعال
فراس : ابشر
طلع فراس يتأفف وهو ما يدري وش جابه ذا الوقت وبلش في هالشياب ولمح بنت صاده بشعر بني طويل كانت واضح انها تسقي زرع وتسمع اغنيه وترقص عليها
وواضح حبها للحياه
فراس : يارب مهو بهي .. لا مستحيل هيئتها شلون ما تجي بذي الملامح كلها
ام سُهاد : سُهاد يا بنت وينتس!
سُهاد وهي ترفع شعرها لفوق : جايتس يمه جايتس
فراس تنهد اول ما عرف انها انسيه
ودخلت سُهاد لامها
فراس يكلم نفسه : هييي هييي صحصح نزل عيونك بنت عمك شفيك !!
فراس ضحك : هذي الي خفت منها الحين والله انك ضايع ... وين كرتون البلح ذا طلعت اجيبه وبرجع بواجد .. اي هذا هو بس اي واحد الي فوق ولا الي تحت ؟ ارجع اسأل عمي ؟ ولا اخذ اي واحد ما بيدري بالنهايه ما حدد هو .. شقومي اتكلم واجد ! ومع نفسي بعد ! اختبصت! طيب اي واحد اخذ ؟ الي فوق طارف وقريب باخذه
رجع فراس للمجلس ومعه كرتون البلح
ابو سُهاد : علامك طولت
فراس ارتبك: شسمه ضيعت اي واحد هو الي فوق ولا الي تحت ؟
ابو سُهاد : الي فوق الي فوق
فراس يمد الكرتون : هذا هو الي فوق