تعذُر الشروق أيام ..

11

رجع فراس للمجلس ومعه كرتون البلح
ابو سُهاد : علامك طولت
فراس ارتبك: شسمه ضيعت اي واحد هو الي فوق ولا الي تحت ؟
ابو سُهاد : الي فوق الي فوق
فراس يمد الكرتون : هذا هو الي فوق
اصيل دخل : السلام عليكم يا قوم
الكل : وعليكم السلام
اصيل : شلونك عمي صقر ؟ وشلون عيالك عسى بخير ؟
صقر : بخير بخير الحمدلله وانت شلونك ياولدي ؟
اصيل بصوت عالي : طيب ولله الحمد طيب
فراس يدق اصيل : اقصر صوتك فجرت اذني
اصيل يضحك : وش بيدي الرجال ما يسمع الا تسذا
فراس : اثره كذا كنت اسولف بهدوء وشكله كان يسلك لي
اصيل : شكله ؟ الا تأكد
فراس : وش صار معك!
اصيل : بموضوع خالي ؟
فراس بسخريه : لا زواجك عسى ما تدري بيكون الاثنين الجاي !
اصيل ضحك : لا تطقطق طيب احسب قصدك موضوع ثاني غيره
فراس : يارجال وانا عندي هم غيره
اصيل ابتسم: بيهون بيهون ان شاء الله بخصوص خالي تراه ينتظر جيتك بس
فراس : ليه انا ارتبكت الحين
اصيل: يمكن شي جديد عليك بس وش رايك نقوم ونتركهم يسولفون على راحتهم ومنها نروح لخالي
فراس : مشينا ليه لا
اصيل : عاد نستأذنكم والله مشاغيل
ابو سُهاد : اذنكم معكم
...
مياسين : يمه فراس وينه !
ام فراس : طلع مع العيال
مياسين تتأفف : اففف قلت له لا يطلع الا وانا محققه معه
ام فراس : ذا الي مضايقك شوي ويرجع يابنت .. انتي واختس خذوا عبيكن وامشوا معي لام سُهاد
مياسين : سمي
...
اصيل : انتظروا بالسياره شوي وراجع
فراس : وين تبي بعد ؟
نايف بضحك : خايف ينقفط من احد
اصيل : والله اشوف ماله علاقه بذا بس ابو سعيد بيبلشني لا شافني عند بيت خالي على طول بيألف موضوع ويصرفه لابوي
فراس : طيب رح اخلص
نزل اصيل يتأكد اذا فيه احد
فراس : بديت اتوتر
نايف : مابه شي يوتر فراس وش اقوى من ذي الخطوه الي سويتها من وراي
فراس : ياليل معك زعل فكنا منه
نايف : لا ما بزعل شدعوه بس..
فراس : الدنيا بارده ولا ؟
نايف : يعني شوي عطني يدك اشوف
فراس يمد يده : والله برد
نايف ارتاع : ليه يدك بارده كذا واحنا ظهر ! وترجف بعد
فراس : ماني بمتراجع عن قراري لو يصير الي يصير
اصيل يدق ع القزاز : امشوا
نزلوا العيال واتجهوا لبيت الشيخ
اصيل : السلام عليكم
بندر ( الشيخ ) : وعليكم السلام والرحمة .. تفضلوا
اصيل بتعريف : هذا فراس ولد عمي وهذا نايف خويه
بندر ( الشيخ ) : سبحان الله عرفته من نظرته تشبه نظره ابوه
فراس : تعرف ابوي ؟
ابو فراس دخل : اي يعرفني شلون ما يعرفني
فراس التفت برعب : يبه وش جايبك .. اصيل !
نايف سكت من خوفه من ابو فراس
اصيل فهم نبرة فراس : لا والله ما قلت لاحد بالذات عمي !
بندر ( الشيخ ) : انا ناديته .. اجلسوا الحين
فراس : ليه ليه؟!
بندر ( الشيخ ) : فراس اقعد
فراس : ما بقعد نايف امش
اصيل يمسك كتف فراس : اجلس ما عليك
فراس جلس ونايف بعده
بندر ( الشيخ ) : ناديت ابوك لانك تحتاجه اكثر من اي احد موجود هنا
فراس بعدم صبر : كم يبي لي عشان افتك من هالحياه الي انا بها؟
بندر ( الشيخ ) : انت قصتك طويله مب متعاطي عشان تقول كم يبي لي هي  تعتمد على العناد
ابو فراس : اذا على العناد موضوعه كبير
بندر ( الشيخ ) : مب عناد ولدك .. عناد الي معه
فراس : وش معي قل وش معي ؟
نايف : لا عاد تنكر يا فراس انت جاي تتعالج مهو تتحدى
فراس تنهد : معي اثنين وثالثهم روحي
بندر ( الشيخ ) : عارف وموجودين بشرهم هنا
ابو فراس : وش تقولون انتم
بندر ( الشيخ ) : اعذرني فراس لكن مضطر اقول لابوك عشان يقدر يساعدنا
ابو فراس : قول ما عليك منه
بندر ( الشيخ ) بدأ يحكي لابو فراس : في تهور شباب راح فراس و......
فراس:  الظاهر عرف لو اتصل على اختي بعد واقول لها
نايف : لا افضل نخلص الموضوع بعدها تتكلم
فراس : تضايقت
نايف : انت روق بس
فراس : والله تضايقت حتى نَفَسِي تسارع وقلبي يصفق بصدري
نايف : شهيق وزفير
فراس: ماشاءالله دكتور الغفله وش له دارس سنتين الله يعين مرضاك بس
نايف يضحك بخفه: وش اسوي تعرف اني اذا توهقت ما اعرف اسوي شي
فراس : خلاص اسكت بس
نايف : وشبها النفسيه قفلت
فراس: ما تشوف نظرة ابوي كيف !
نايف : كيف ؟ كيف تشوفها؟ بعدين غريبه شلون ما صار شي للحين في شي غلط !
فراس : ما فيه شي غلط فيه شي بقوله هو مخليني عايش للحين
نايف : وشو ؟!
فراس : خل الشيخ بس يخلص واقوله
بندر ( الشيخ ) : وهذا هو قدامك بالشكل
ابو فراس تنهد : خساره السنين والله دامها كذا شلون ما لاحظت انا
فراس : عندي شي اقوله
اصيل : قل كل الي عندك لا تترك شي
بندر ( الشيخ ) : قول
فراس: امس جاني صوت وانا بالمستشفى وناداني اربع مرات ورديت يوم رديت قال
رجوع زمني
في المستشفى
الصوت المجهول : فراس ... فراس .... فراس .... فراس
فراس بخوف بسيط : نعم ! حتى بالمستشفى لاحقيني
الصوت المجهول : بتشكرني على مناداتك
فراس : ليه منزل لي وحي ؟ مين انت اصلا!
الصوت المجهول : انا شيخ قبيلة من الجن وبساعدك
فراس بسخريه : شيخ ! وبتساعدني ! بوش تساعدني ؟
الصوت المجهول: ابعد عنك رنسم
فراس يوم سمع الاسم اعتدل بجلسته : الجنيه الي مناشبتني! خادمها معها شلون !
الصوت المجهول : اشوف سخريتك اختفت
فراس بثابت : الجن ما تساعد بدون مقابل وبالذات شيخ وش عندك ؟
الصوت المجهول : طلب بسيط بس
فراس : وش طلبك !
الصوت المجهول : تعطيني رنسم ومازر خادمها
فراس ضحك : اول شيخ يمر علي بطلب بسيط فعلًا وش اسمك ؟ جاز لي طلبك
الصوت المجهول: ظَلَشْ اُلقب بـ الاجدر
صوت صرخه استنجاد : فراس حبيبي لا تصدقه ما يقدر يسوي شي كذاب كذاب يا فراس
فراس يضحك : دامه وصل لي يقدر يسوي الي ما سويتيه
ظَلَشْ ( الاجدر ) : ما تقدر ترد عليك هذا بس تأكيد لكلامي لك
فراس : طلبك عندك ليه جاي لي ؟
ظَلَشْ ( الاجدر ) : مربوطة هي وخادمها باسمك بامر ابوها الملك
فراس : واو ابوها ملك بعد يعني الي كلمني ذيك الليله كان ابوها ؟
ظَلَشْ ( الاجدر ) : اي الملك الي دخلت ممتلكاته وترك بنته لك مع خادمها
فراس : طيب ليه؟
ظَلَشْ ( الاجدر ) : عشقتك والعشق محرم بمملكتها
فراس : وانت وش تبي فيها !
ظَلَشْ ( الاجدر ) : كنت بتزوجها لو ما عشقتك
فراس : يعني انت كنت عاشقها ولا انا فاهم غلط ؟
ظَلَشْ ( الاجدر ) : كنت عاشقها والحين عدو
فراس : طيب ترا فليناها بالسوالف الحين لو يدخل احد يقول تجنن ذا .. طلبك جايك انصرف
ظَلَشْ ( الاجدر ) : ما تقول لشيخ قبيله انصرف
فراس : طيب اسفين لو سمحت ممكن تتفضل لقبيلتك ؟
فراس : وبس هذا كان حواره معي وكنت تحت حمايته لاربع اسابيع
بندر ( الشيخ ) : خطوه شجاعه انك تقول ان الجن يجونك لو تبغون الحين ابدأ بعلاج ابدأ لكن النتايج ماهي بيدي بيد الله عز وجل
فراس : ببدأ ومالي رجعه
ابو فراس : فكر زين
فراس : يبه فكرت وببدأ
بندر ( الشيخ ) : متزوج ؟
فراس : لا طبعًا
بندر ( الشيخ ) : العمر ومتى بدأ كل هالاحداث ؟
فراس : ٢٠ وبدأت من ثلاث سنين واربع شهور و٧ ايام بالضبط
بندر ( الشيخ ) : الاعراض التي تشعر بها؟
وبدأ فراس يعطي كل الي يعرفه والي ما يتذكره يعديه اما عن الشيخ ف كان يشخص الحاله تشخيص كامل صحيح وملاحظ توتر فراس وابوه
...
مياسين تهز رجلها : والله اني خايفه عليه وهو مب قايل لي
سُهاد من التوتر تحك رقبتها : ماعليتس اصيل معه وقال لي انه عمي عبدالكريم بعد جا
مياسين : شلون !! ابوي هناك ؟
سُهاد : اي الشيخ ناداه
مياسين : عسى خير بس
جُمانه : ميسو ماما تناديك
مياسين : جايه الحين
سُهاد تضحك : شخصية جُمانه فرق عن شخصيتس احسها طول حياتها عايشه بين حضر
مياسين بضحك : مواليد جدة صدقتي بها
سُهاد تضحك وهي طالعه : روحي لامتس لا تنسين
...
صالح : عند الحريم توصل الاخبار اسرع من عندنا ليه ما اتصل اسكتهن ؟
ثابت : حمار انت وش تقول لهم اذا ما يدرون بالخبر !
سيف : حتى امي ما علمتها اسمعوني .. دام حنا الثلاثه نعرف نسكت ونساعده تعرفونه هو طيش مراهقه وهادي اخوي واعرفه مب حولها صدقوني مجبور
صالح : كلنا نعرف هادي لكن كيف وصل لها؟
ثابت : يمكن ما وصل لها هي وصلت له
صالح : وانا اخوك اول مره اشوف ذكائك
سيف : فعلًا اول مره انا شلون نسيت ان ابوي عسكري !
ثابت : يعني قلنا اني مب حول الدراسه لكن مهو غبي
صالح : خلاص لا تبلشنا انطم
سيف : وش السواه الحين ؟
صالح : السواه وانا اخوك نمسك هادي ونصرف الاهل........ وبدأ يحكي الي بيسوونه
...
نايف يضحك : ها فراس شلونك اخبارك بعد القران
فراس : كل تبن نايف
اصيل ضحك : اتركه اتركه الدنيا مغربلته وشارهٍ عليها
فراس يوم سمعت كلمه شرهه طرت له ابيات شعر قال :

اشره على الحظ ولا اشره على احلامي ؟
الحظ مكتوف ... والاحلام مكتوفه

احيان .. باب الفرج ينسد قدامي
واحيان يفتح بوجهي بس ما اشوفه
اصيل : صح لسانك
نايف الي كان عنده ابيات ثانيه فيها مواساة بسيطه :

يالله بحظٍ يعمي عيون الظروف
وتبطي تصاريف الزمن ماتهده

اصيل الي شبك معهم وهو يعرف قليل بالشعر :
ياحظ قم خلني الحق العربان
العربان تمشي وانا طايح عدو

قم تكفى وقومني واقوم
صبري نفذ واحلامي قريبٍ بدو
فراس ابتسم ابتسامه تعب : صح لسانك انت وياه ما دريت انكم شعار
اصيل : لا جلست معك يصحى حس الشاعر
نايف : تبي الصدق انا ما عرفت الشعر الا معه
فراس : حبي للفن كبير العود بالذات لو درا ابوي عنه كسره براسي
نايف : ابوك يخوفني والله احسه يدري بكل شي بس ساكت عنك
فراس : قصدك عنا تراك معي في كل بلوه وانضم لنا اصيل
اصيل يضحك : لا لا  مصايبكم مانيب فيها
فراس ضحك : يارجال كلها كم صفقه ونرجع طبيعي
اصيل : اجل قم انت وياه نرجع للعشى قبل ابوي يتعشى بنا
...
مياسين الي كانت سارحه في افكارها وجنبها كوب قهوه ووصلت لها رساله من نفس الشخص المجهول  امسكت هاتفها وشاهدتها كان مضمونها: آهلًا كيف الحال ايتها المجهوله؟ ، انا ولاول مره اتحدث بالفصحى لست اقرأها في رواية او كتاب او اقتباس انا اتحدثها معك انتِ نعم مع شخص وهو انتِ ، لقد عرفت انك تحبين العربية وتهيمين بها ، لا اعلم لما اشعر بالراحة عند ارسال الرسائل لك ولكن اطمئن بردك حتى ولو كان فقط النظر لرسالتي ، كيف حالك واخيك أيضا ؟
مياسين ابتسمت لا ارادي : وش فيه ذا الادمي وش يبي .. خير ليه مبتسمه !! وي ! ما يهم ليه ابتسم بس جذبتني كلمه تهيمين بها يا تُرى ارد عليه او اتركه ؟ ارد واشوف ؟
اي يلا ارد عادي وش وراي
امسكت بكوب قهوتها لتأخذ رشفة استعداد
مياسين : اففف بردت وش هالحظ ما عليه بس يلا وش اكتب ؟
بدأت بكتابه مضمون رسالتها : آهلًا بك انا بخير كيف حالك انت ؟ لستُ مجهولة أنني النجم الزاهرُ البعيد في السماء اما عنك فأنت المجهول الى الآن ، ان العربية الفصحى تضمُ جميع احوال الحياة مثل المرض ، الحب ، الوقت وغيرها العديد لا تخجل من الحديث بها انها اللغة الاصل ، ألهذه الدرجه انك لا تعرفني أبدًا ! ، سؤال اخير ما علاقتك باخي ؟ أتعرفه؟
شافت ان الشخص المجهول بدأ يكتب وقفلت هاتفها بخوف من الرد تتمنى ان يكون غريب ولا علاقه لها به
مياسين : ليش رديتي ياحماره الحين تبلشين افففف وش هالحاله يالله
وصلتها رساله وكان المضمون : حللتِ آهلًا و وطئتِ سهلًا  ، عند ردك اصبحت بأتم هنائي ، انني الراسخ الثابت خالص النسب ذو جذور علم أصيلة ، الآن لم اعد مجهول بالنسبة لك ، انني اعلم اسمك وقد قلتهِ بصيغة اللغز حتى يصعب علي ، لستِ مجهولة لدي انني اعرف من انتِ وابنة من واخت من ، علاقتي باخيك علاقة وطيدة وكذلك ابيك واخيك الاكبر .

مياسين بتعجب : اذن نحن اقارب ؟ او انت فقط تعرفني !

: نعم كلانا نحمل الدم ذاته ولكن لا اظن انك تعرفيني ابدًا

مياسين : حسنًا انا مضطره للذهاب وداعًا

: انتظر لقائك الكتابي مرةً اخرى ، الى اللقاء

مياسين شافت الرسالة وما ردت جلست تفكر في هالشخص ومين هو
مياسين : اف مياسين خلاص ما بقى لك اي عقل كل شي تفكرين فيه .. وش يبي بس
...
في مجلس ابو سُهاد
ابو سُهاد : الا يا راكان وانا اخوك وين حرمتك ما جات معك ؟
راكان بسخريه : طلقتها
ابو فراس : وشهو وشهو الي طلقتها اترك عنك المزوح
ابو سُهاد بعصبيه : وش...