بين طيات الايام
اواجه عثرات تبعثرني
تنقل بي عواصف الى مسمى انتقام
اواجه كل شعور لوحدي
قابضه على صدري
ها انا
كالمعتاد عليها
المعتمد عليها
كرنين جرس
في حياة من ادخلها
استراحه مابعد الرنين
في حياة من اخرجها
ها انا
ذات الحظ العاثر
حاول ان يجد نفسه
بين حقد وانتقام
بات كل مشاعري مدفونه في انقاض الحقد
......
فتحت باب الغرفه بهدوء علمود لا يفزون
ابتسمت وانا اشوفهم نايمين
البراءة مرسومه على وجهم
اخذت من الميز يم الجرباية كتاب
داخلي مملية بالراحه
مشيت على كيف وسديت الباب وراي
شغلت التدفئة
حطيت كوب جاي وكعدت
نزعت الجواريب الثخان الجنت لابستهن
برودة الكاع لسعت رجلي
باوعت للكتاب ورجعلي كل وجع مريت بي
بكل شته جان عضامي يصلن عليه من البرد
بس هل شته جان غير
فتحت الكتاب الي كل ماباوعله يذكرني بكلشي مريت بي
صفنت على نفسي لحظات
انا شكد قوية تجاوزت كلشي
انا شكد قوية لحد هاي اللحظة انا ابتسم
يبقى كلشي صار ماضي مدفون بكلبي
وغصه
وجع
وقهر
الم ماينسي
دكات كلبي السريعه عبالك بسباق
احسني احتريت وبديت اختنك فركت ركبتي
صار هواي معايشه هيج شعور
بكل ورقه اكلبها اكلب تعب من تعبي
اليوم انا سديم
الي صار الي اسمي
مكانتي واحترامي
سديم الداست على كلبها وكملت حياتها
اشرب جاي وعيني على الكتاب ورجفه بداخلي
تذكرت كل ماضي مريت بي الى هاي اللحظة
..
طفيت المنبه وكمت من مكاني
رفعت البطانيه عن وجه اختي بشائر
دغيتها بكتفها
_بشائر كومي هسه يجي السايق وانتي تتاخرين
فتحت عيونها بضجر
ركزت بوجها
سواد جوا عيونها
شفايفها اليابسه وجها التعبان
اخذت نفس وهيه انتبهتلي وكامت
_شصار هم مانطمرتي علمود الاخ ماكافي يا بشائر لشوكت تضلين حابسه نفسج بهيج قفص
ياختي التفتي النفسج التفتي المستقبلج بعدهي حياتج كدامج
دارت وجها وراحت تغسل ماكأنو احجي وياها
حركت دمي بهاي حركتها
اردد بيني وبين نفسي
شنو الجديد ياسديم من يوم يومها بشائر تكتم كلشي بداخلها يعني شي طبيعي وتعودي عليه
غسلت وبدلت اريد اروح للمدرسه قبل ماشوف احد
امي واكفه تسوي ريوك وابوي النايم ب الاستقبال ومنبطح على بطنه
هوسة البيت وملابس مطشره من الكنتور
ريحه القذرة الي توصلنه من جيرانه لان يربون حيوان
جريت نفس بتعب ودنكت البس حذائي
صوت امي وهيه تطلب مني
_تريكي ترا مالي خلك يوميه اخذج طبيب مافارغتلج
_محد طلب طبيب لا تخافين هل مره ماطيح
بلعت ريكي وانا احجي
طلعت من البيت مدمعه عيني لحد ماوصل السايق وطلعت وياه
طول الطريق وانا حابسه الدمعه بعيني عن لا افضح نفسي كدام البنات
طول الدروس انا بس صافنه
مافتهم شي وصافنه ب الصار والي راح يصير
أنت تقرأ
قلوب بليده
Romanceانا عينيك الثالثه انا نفسك الثاني انا قلبك الذي لا يتوقف فكرك الذي لا يهدأ انا حرب لاتنتهي انا عصف حياتك انا كل عثراتك
