قلوب بليده

part 19

صعبه من تبتعد مجبور
عن شخص كلشي بيك يريدلك قربه
.....
تصويت
بقلمي زينب
.........

بشائر ...
نفضت التراب عن ملابسي
مسحت دموعي وحركت عيوني
فتحت بطل ماي الورد واني اصبه على قبر امي
امسح على حروف اسمها بهدوء ودموعي تتسابق روحي التعبانه تشكليها كلشي
تمنيت بهاي اللحظه تطلع وتاخذنه بحضنها
لو بس تطلع وترزلنه وتعاملنه ابشع معامله المهم نشوفها
نرجس الامه نفسها على القبر وتبجي سديم الي مفرفحه وهيه مدنكه راسها على القبر وحاضنته باديها
تشكي شنو عانت تشكي الامي من ابوي تمسح دموعها وتضحك ترجع تحجي وياها
محست عيوني واني اسحبها من القبر اكومها حضنتها امسح على راسها اريدها تهدأ
عافتني وهيه تحضن ب القبر
سندت ظهري على قبر يم قبر امي واني مغمضه عيوني وصداع موتني تفكير وتناقض بين اجي اشوفها وبين اعوفها
فززني صوت غيث وهو يكول
_تميم تكول تعالو راح نطلع
هزيت راسي واني اكوم سديم من قبر امي ضل خشمها ينزف من حلاة روحها
وحرارة الشمس الي تمرد بيها
ضليت اغسل بوجهه لحد ماكطع خشمها
اضرب على خدودها الي صايرات حمر من الحر بهدوء اريدها تصحصح
_سديم انتبهي لايغمه عليج انتبهي شبيج
فتحت عيونها بهدوء وهيه تكلي
_خابري تميم
_مو اني يمج وغيث راح نروح تميم خطيه يم امه وخواته
بجت وهيه تكول
_خابري تميم اريده يجي
رفعت عيني الغيث واني اجر نفس
_اريد جهازك اخابر تميم جهازي ب السيارة
فتح الرمز ومدلي تلفونه
ضوا الشمس ضارب ب المبايل ماشوف شي عليت الاضاءه رجف كل جسمي واني اشوف حاط خلفيه الجهاز صورتي اني وياه من اخذناها سوا
ضليت ابلع بريكي وايدي ترجف انطيته التلفون واني اكله
_خابر انت راسي مصدع كلشي مجاي اشوف
_هسه اخابر سديم بس صبرو شوية
تعالي بشائر منا
عفت سديم يمها نرجس وهنه صافنات ع القبر كانو ميحسن بشي يمهن
_ها غيث
_انتي ليش حاضرتني هيج مخليتني بحيرتي بين يوم وليله اعرف انتي بنت عم صديقتي هيج تسوين بشائر
_اهاا اني بنت عم صديقك يعني مثل اخته فلاتسوي شي يضر صديقك انت مو اساسا راح تخطب بعد شعندك هنا
_وانتي بكل رحابه صدر هيج تكولين وقابله باعي اعرف لا المكان ولا الزمان صحيح لهيح مواضيع بس بشائر على الاقل فتحي الحظر اريد اصخم اتفاهم وياج لو هو حظي منين ماجيبه اعوج
صفنت بكلامه واني ماعرف شكول
_تدري عباس وتميم عرفو جنت قبل خاطبني وعرفو كلشي
ضرب على كصته براحه ايده وهو يكول
_لا يااا الله شبيج تخبلتي انتي واني اكول ليش الحجيه تحاجيني هيج
_مو بيدي مرت ابوي دمرتني بهل فتره
رفع تلفونه وهو يخابر التميم مثل المستعجل ويحجيله على سديم ابتعدت عنه رحت السديم
اجه تميم ملهوف وهو يحجي ويه سديم
لزم وجهه بثنين ايده وهو يكول
_شبيج ليش هيج ممروده روحج
هزت راسها وهيه تكله
_نروح ونعوف امي
حجه بصوت مليان غصه
_مثل ماروح واعوف روحي جوا التراب الي هو اخوي سديم سندي نفسج مو هيج تسوين بروحج
كومها وهو لازم ايدها اني ونرجس وحده صافنه بوجهه الثانيه ونحلل تصرفاته بكيفنه معقولة اكو شي يجمعهم
مشو واحنه وراهم طلعنه من المقبره اكو حمامات دخلت سديم بيها وضلت تتقيا
سندتها من اكتافها واني اغسل بوجهه
نفضت ملابسها واني لازمتها وذابه كل حيلها علي
بس طلعنه اجه تميم يحجي بصوت بي لهفه
_شبيها ليش هيج صار بيها تقيات مو اخذج للمستشفى بيج شي
_لا هيه تعبانه هسه نصعدب ب السيارة وتنام
تجاهل كلامي وهو يكلها
_جوعانه اجيبلج اكل
هزت راسها بلا وصعدت ب السيارة جانت بيها بس كم مره وكلهم نازلين ب المقبره
التفت تميم وهو يكول
_امشي يم بيبي تعبانه هم
رحت وراه لكيت عباس حاضن القبر ويبجي بشوغه يحجي بصوت مبحوح من البجي
_ياصاحب روحي المابعدك صاحب اريد اجي الكاك تحضني وتداهرني مو اجي الكاك جوا التراب
كوثر الي شبه فاقده وهيه تبوس ب القبر
منظرهم قشعر جسمي
غيث الي واكف من بعيد مدنك راسه وايده على عيونه واجتافه تهتز
دمعت عيوني عليه شكد يحب صديقه
كومت بيبي الي بس تنعه وتبجي
صعدنه ب السيارة بعد ماتعب تميم وهو يقنع امه تكوم
طبطت بيبي على ظهر عباس وهيه تكله
_لاتسوي هيج بنفسك تميم كوه ساند نفسه من يشوفكم يتعب اضعاف
هز راسه ساكت
عجيب عباس عنده قدرة يضم كلشس بكلبه ويضحك ويسولف ولا كانو صاير شي
يحسس المقابل الدنيا شكد تافهه من كد مايشاقه بنفس الوقت تشوفه انسان شايل جبال على ظهره
شرب ماي وهو يمدلي البطل ومبتسم
_ليش ضايجه بشه
_هههه انوب بشه ماضايجه بس راسي مصدع ومنا سديم مدري شبيها
_لاتضوجين بس على نفسج سديم عندها الي يضوج عليها
كالها وهو ياشر على تميم الواكف يم غيث وعاقد حواجبه بعصبيه ويحجي
_وانت عندك الي تضوج عليها
كهكه بضحكه مصطنعه وهو يكول
_نوصل ونحجي بعد جلاووي
جانت كلمته بلحظه صعود غيث للسيارة
التفت عليه غيث وهو يكول
_تعال اصعد يمي لا اكسر سنونك بحكلك سوق شوية ترا ظهري نكسر
خديجه_كوم سوق عن الوليد خطيه
عفس وجهه وكعد كدام يم غيث
زرنه الامام تنفست هوى بهدوء شرح كل صدري قريت قران وصليت
كعدت وشمس حطت راسها على كتفي طلعنه ويه بيبي لكيت حنان مخبوصه تحجي ويه تميم وهيه تاشر باديها
جابو اكل جاهز وكعدنه ناكل يم الامام
رتاحينه شوية وطلعنه جان الدنيا عصر بس صعدت للسيارة نمت من التعب
كعدت من وصلنه للبيت جان الدنيا ليل
عيوني ثكال من النعاس
عفت كلشي ورجعت كملت نومتي ب الغرفه بدون لا ابدل الملابس الابستهن
سديم....
يوم جمعه
دخلت شيماء وبيدها جنطه جبيرة
ب اليوم الرحنه بي للنجف هيه راحت الاهلها واجت من وصلنه ثاني يوم
صعدت بدون ماتسلم على احد
ولازمه مرتضى ويمها مصطفى ابوي دخل وراها وصعد بدون مايحجي شي
هزيت ايدي على شكلهم عفتهم ورجعت اكمل الطرشي اكص بي وشمس تسوي لبن
بشائر تغسل ب المواعين
صوت صياح تميم وجدو وهم يشوون سمج برا
دخل عباس حجه وهو يضحك البشائر
رفع تلفونه لوجهه كانو يراويها شي
طفرت اليمهم حطيت راسي بينهم اشوف شنو يشوفون دفعني حيل وهو يضم التلفون ورا
_والله اكل البيبي اذا ماشوفتني عباس الله عليك شوفني
_اشوفج بس ب الاول تودين هذا الجدو
_كول والله
_والله
اخذت السمج ع السنك الي راد اوديهن الجدو ورحت يمه انطيتنهن اله مستجله ردت ارجع وستوقفني كلامه
_جدو تعالي اسولف وياج ونشوي
باوعت التميم المبتسم براحه
_لا جدو مو جاي احضر ب الغده
_البنيات يحضرن تعالي انتي
_بعدين جدو والله اجي يمك ونسولف عمه ميساء كلتلي طفي التمن ونسيت
هزلي راسه مبتسم رحت ركض اشوف عباس كتلني الفضول
بس شافني حط التلفون كدام عيوني كلش بحيث صرت حولة كعدت ب الكاع واني اكلهم
_تعاالو كعدو تعالو السالفه مو مال وكفه
اخذت جهازه اكلب ب الصور صورة هو وبنيه يعني حليوة جمالها طبيعي
_عباس ماتوقعتها منك هاي حبيبتك مووو
ضحكت شمس وهيه تكول
_لا تسمعج بيبي اله تطرد عباس
_انتي هم تعرفين
_جا شلون ماعرف اكثر من مره البنيه معزومه عدنه
بشائر_شلون يعني اقاربكم
هزت راسها بلا اردف عباس بسرعه
_هاي بنت خالتي
_يعني بنت اخت عمه ميساء عندها اخت وحده شفتها ب الفاتحه صغيره يعني مو مال وحده عندها هيج بنيه جبيرة
كلبت صورة ثانيه هيه وياه وصورة هيه لابسه لابكوت
اردف وهو يسحب الجهاز ويراويني صورة اوضح الها وهيه ضاحكه بعفوية شكد حبيتها هنا
_بنت خالتي وبس لاتسألين ماشي
من كالها كانو نرسمت ملامح القهر عليه والخيبه بس يحاول يخفي بضحكته
اردفت بصوت متعاطف
_عباس اسفه بس فضولي كتلني
_وانتي عفتي جدو واجيتي هنا ماطول سويتي هيج تعالي اشوفج بعد
ضل يشوفني فيدوات وصور الها وهيه ب الكليه تشتغل باسنانه مبنيه طالبه طب اسنان
حبيت الفيديو واني اكله
_لككك شوف عباس النذل شكد حلوين
فززنه صوت تميم رفعنه راسنه من التلفون متفاجين
وهو يكول
_هذاااا شغلللج ست سديييم
هيه طفرت وهيه وكفه
_اي جاي اسوي طرشي باع
كلتها واني اشر على طاسه الطرشي
ضحك عباس وكال
_يابه جاي اراويها جوريتي بيها شي
تميم عوج حلكه وهو يكول
_جوريته هو جوريته دكول جوري الملحه وفضها
سديم_لا تميم ليش تحجي ع البنيه والله حلوة ترا احلى منك
رسم ملامح دهشه على وجهه ب الجذب وهو يكول
_تروح فدوة ونذر لعيوني وعلي هاي الملحه تقارنيني وياها
_اهووو تميم حبيت البنيه ليش تحجي عليها بعدين تصير جنتكم لازم تحترم مشاعر عباس ع الاقل
ضحك عباس وهو يكول
_خيولي ناطيه الاذن الطرشه الجحش
بين كلامنه دخل عمو رافت وعمو رافد وهمه يضحكون عمو رافت باوع التميم وهو يكول
_راح يطلع حازم بعد كم يوم
تميم من سمعهم حط اصبعتين بحلكه وهو يصوفر راح البيبي يصيح ب الهول
_حااازم راح يطلع
ضحكت على ضحكتهم واني اسأل شمس
_منو حازم
_عمو حازم
_يعني؟
_اخو ابوي يعني عمو هو مسجون بس جانت التهمه متخصه هو ضل خمس سنين ب السجن شال التهمه عن صديقه لان صديقه عنده اطفال وعمو حازم مامتزوج
_صدك تحجين لو تشاقين صار شكد هنا محد فتح هيج موضوع
_ب البداية اول مانسجن كلش وضع البيت متكهرب جنت صغيره بس اتذكر الصار وبيبي تمرضت بسببه بس بمرور الوقت تعدونه جانو كل جمعه يزورونه واحد من الولد واستمر الوضع هيج ضل محد يذكره اله نادرت ماتتخيلين شكد فرحانه لان حيرجع لان عمو حازم هو روح البيت مثل عباس ب الضبط حيل يحبنه
_من كلتيلي مسجون عبالي مثل ابوي بس باعي هو بريء ومسجون وامثال ابوي يسرحون ويمرحون بارض الله وين العدل ب الموضوع
_ربج على كلشي قدير يجي يوم وينقلب السحر ع الساحر يجي يوم والله يعوض عمو حازم عن كل سنينه الفاتن
_زين هو جبير يعني اكبر من ابوي
_لا بعمره تقريبا يعني هيج شي صار سنين مشايفته فماعرف
سمعنه صوت بيبي وهيه تهلهل وتبحي عمو رافت حاضنها ويبجي وياها
شكد الموقف صعب والاصعب جان ابنهم مامتهم بشي
بيومها جانت السعادة ماليتهم ورا ماخيم الحزن ع البيت فتره طويله
بعد الغده شربون جاي كال تميم وهو مبتسم
_سديم اسجلج بمعهد تقوية للسادس انتي ونرجس
باوع الابوي نزل كوب الجاي من ايده بعصبيه
_منو كلك تدرس بعد بكفيك تحجي انت
_طبعا عمو تدرس شفرقها عن البنات وشمس مو جمانه اخذت شهادة سادس بس ماقبلت تكمل سديم هم تاخذ الشهادة
سلطان_خصم الحجي بناتك يكملن دراسة واذا ماتريد الله ومحد وعلي وياك الشارع يلفيك واحنه نلفي بناتنه

سكت وهو يباوع الجدو بغضب جدو الي لاويه من ذراعه بكعدت البيت من شاف كلها ضده ماحجه واصلا جبان مايكدر يسوي فعل بس حجي
كالت جمانه الي جانت كاعده وماسمعنه الها صوت
_بابا انا اريد اجع قدملي على كليه
حيل فرح عمو بقرارها وامها تبوس بيها يردونها تطلع من الدائرة العاشت بيها يدرون بحبها لحسين لهيج متعذبين عليها
تميم_معدلج مايسمح كليه زينه دخلي اهليه احسن شنو تردين ياقسم
جمان_انت شتكول ياقسم زين اي شي المهم اداوم مابقى ب البيت حيل ملل
عباس_باع تميم ادري نجمانه ماتهتم ب الدراسة فليش دخلها قسم يعني خصوصا الهندسه والطب لاتجيب يمها مثلا تربيه عوم هيج دخلها حكومي احسن
جمان_اي علوم زينه
تميم_ماشي اليجرالج بنيتي
ما استغرب لطف تعامل تميم ويه جمان لان هيج يعامل شمس
اضحك بضحكه شخص فاقد امل
الحب البيناتهم ياخذون قراراتهم بكفيهم كل شخص واله رأيه الخاص والشي الي يحبه وان كانت بنيه الها احترام جبير بينهم عكس معامله ابوي النه كبنات
يوم عن يوم احترمهم اكثر بسبب رابطتهم وحبهم البعض
بيني وبين نفسي اكول تميم يشوفني هيج مثل شمس لو يشوفني بغير نظره
ارجع اكول لا هو كلي اشوفج غير عن شمس
اختنكت من التفكير وكمت اريد اروح
استوقفني صوت شمس
قبل لا التفت مسحت عيوني بحركه سريعه خاف بيهن دموع
_سديم هسه موافقه تداومين معهد لو تدرسين ب البيت ترا هذا المعهد كلش زين انا درست بي الاساتذه زينين
رفعت اكتافي بحيره
_مادري كيفكم لو بس نرجس احسن اني ب البيت ادرس
تميم_لا ثنينكم سوا ماكو فرق
حاولت ارسم ابتسامه مصطنعه بدون ماحجي عفتهم ودخلت يم بشائر
بس كلت النرجس على كلام تميم ضلت تهز كتف طلعت فرحانه واني احجي البشائر
_من اكعد وياهم احس نفسي بشر اله كيانه يسألوني شنو اريد شنو احب يخافون علي يردون اكعد واتناقش وياهم هذا كله حرمونه منه امي وابوي عزلونه عن كل العالم بشائر احنه جنه مدفونين ب الحياة من اشوف هيج عائلتهم اضل اصلي على محمد بيني وبين نفسي معقوله بسبب الفقر هيج الشخص يعاني
_نبدي من جديد نعيش حياة جديده خنتعلم من ماضينه ومن كلشي عشناه
_سمعتي تميم شنو يكول على عمو حازم
_اي حجتلي ريم عليه خطيه والله

مر يومين وجاب جدو خروف يذبحه على سلامه عمو حازم
جنت متحمسه علمود اشوفه
للظهر وصل جدو دخل وراه عمو حازم واكو هواي زلم برا سلمو عليه وهم يحضنونه وفرحانين احنه نباوع من المطبخ ذبحو الخروف يم رجله دخل وبيبي تهلهل وتطش عليه جكليت دنك وهو يحضنها ويبجي
شمس من كد ماتاثرت بيهم ضلت تبجي وياهم رفع راسه من حضن بيبي الي تبوس بكل وجهه وترفع ايديها وتندعي
بس شاف شمس اجه حضنها بلهفه كانو ابوها مو عمها
سلم ع الموجودين وعيونه حمر اختفت ابتسامته وهو يشوفني بشائر نايمه جانت ونرجس يمي
اشر علي وهو يكل البيبي
_بنت اسراء
هزت راسها بيبي وهيه تمسح دموعها بشيلتها
فتح عيونه متفاجا
اني تفاجاة وين يعرف امي
كالت بيبي
_الله يرحمها سرور
كال بصوت مليان غصه
_لاتكولينها يمه

.....
يتبع