Unicode
Part(0)
တိတ်ဆိတ်လှသည့် တောင်ကြိုးမြို့ ညနေခင်းလေးက ဆောင်းဝင်နေပြီမို့ ပုံမှန်ထက် အေးစိမ့်မှုက သာ၍ ပိုနေပါသည်။ ခပ်မို့မို့တောင်ထိပ်ပေါ်တွင် တည်ထားသည့် စူဠာမုနိစေတီတွင် မြူများဆိုင်းနေသဖြင့် ဘုရားပေါ်ရှိ လူများကို သဲသဲကွဲကွဲမြင်ဖို့ရာ ခက်ခဲလှသည်။ ဘုရားပေါ်တက်ရသည့်အတက်လမ်း နံဘေးရှိ Rich café ဆိုင်တွင် ခုံနေရာ မလွတ်သည်အထိ လူပြည့်ကျပ်နေသည်။ ဆိုင်၏အပြင်ဘက်ဝရန်တာတွင် ထုတ်ထားသော ထောင့်ကျသည့် ခုံတစ်နေရာတွင် ရာသီဥတုကိုသွေဖီလျက် နွေးထွေးဟန်မရှိသော အင်္ကျီခပ်ပါးပါးတစ်ထည်ကို ဝတ်ထားသော လူတစ်ယောက်က ဆေးလိပ်သောက်နေသည်။
အင်း… အဲတာကျွန်တော်ပါ...
ကျွန်တော် ဆိုတာက သင်္ကြန်ပေါ့။ အဲ… သင်္ကြန်ဆိုတာ သင်္ကြန်ပွဲကို ရည်ညွှန်းတာတော့ မဟုတ်ဘူးဗျ။
အဲတာ ကျွန်တော့်နာမည်ပါ။ လူတွေ အမြဲကြားဖူး၊ သိဖူး၊ ခေါ်ဝေါ်ဖူးနေကြပြီး အမြဲမျှော်လင့် နေကြတဲ့ သင်္ကြန်ဆိုတဲ့ အမည်နာမက ကျွန်တော့်ကိုခေါ်ရင်တော့ အမြဲ ထောက်ထောက်ကြီး ဖြစ်စေပြီး ခပ်ကြောင်ကြောင် နာမည်တစ်ခုပေါ့။ အဖျားဆွတ်ခေါ်ချင်ရင်တော့ ကြန် လို့ပဲခေါ်ရမလား။ ရွယ်တူတွေက'ဟေ့ကောင့် သင်္ကြန်'လို့ခေါ်ရင် သိပ်မဆိုးလှပေမဲ့ ကိုယ့်ထက်အငယ်က နာမည်မှာ 'ကို' တပ်ပြီးခေါ်ရင်တော့ အင်မတန် ကြောင်စီစီနိုင်လှသည်။ ဘယ်နှယ့် 'ကိုသင်္ကြန်' တဲ့…
မိတ်ဆက်တာကိုရပ်ပြီး ဆေးလိပ်သောက်တာကို ပြန်သွားရင်ကောင်းမယ်။ ကျွန်တော်ဆေးလိပ်သောက်တဲ့ ကိစ္စကိုပြောရမယ်ဆိုရင်တော့ လွန်ခဲ့တဲ့ သုံးနှစ်၊ အင်း ခင်ဗျားထားခဲ့တဲ့နှစ်ပေါ့။ အဲလိုလည်း မဟုတ်သေးပါဘူး။ ထားခဲ့တယ်လို့ ပြောရလောက်အောင် ကျွန်တော်တို့က ရည်းစားတွေလည်း မဟုတ်ဘူးလေ။ ဒါဆို ကျွန်တော် ကျန်နေခဲ့တဲ့နှစ်ကစပြီးပေါ့။ အင်း… သိပ်တော့မကွာပါဘူးလေ။ ကျွန်တော်ဆေးလိပ်သောက်ချင်နေတာ လွန်ခဲ့တဲ့သုံးနှစ်ကတည်းက မဟုတ်ပါဘူး၊ လွန်ခဲ့တဲ့ခြောက်နှစ် ဆယ်တန်းပြီးတဲ့ အချိန်လောက်ဖြစ်မယ်။ ကျွန်တော်သိပ်သောက်ချင်လို့ ခိုးသောက်ခဲ့တဲ့ ဆေးလိပ်ကို ခင်ဗျားမျက်မှောင်ကြုတ်ပြီး တားကတည်းက မသောက်ဖို့ စိတ်ကိုချုပ်တည်းခဲ့တာ။ ခုတော့ တားမဲ့ ခင်ဗျားလည်းမရှိတော့တာမလို့ တစ်နေ့ထက်တစ်နေ့ ပိုပိုသောက်မိတာကို ခင်ဗျားသိရင် "မင်းက ရူးနှမ်းတဲ့ အလုပ်တွေသိပ်လုပ်တာပဲ!" လို့ပြောဦးမလား။
အဖျားစွတ်ခေါ်လို့ မရတဲ့ ကျွန်တော့်နာမည်ကိုတောင် အသစ်ထွင်ပြီး မရမက ခေါ်ခဲ့တဲ့ခင်ဗျား။ ခင်ဗျားမကြိုက်တဲ့ အလုပ်တွေလုပ်ရင် သုံးရက်လောက် စိတ်ကောက်တတ်တဲ့သူ။ သရဲဆို တုန်နေအောင် ကြောက်ပြီး ကျွန်တော့်ရင်ခွင်ထဲ ခုန်ခုန်ဝင်လာတတ်တဲ့ ခင်ဗျား။ ခုမတော့ စာမလာသတင်းမကြားပါလား။
