Unicode
Part(6)Right Here Waiting For You
အချိန်က ကျွန်တော်တို့ကိုအများကြီးပြောင်းလဲပေးနိုင်လေသည်။ စိတ်ပိုင်းဆိုင်ရာသာမက ရုပ်ပိုင်းဆိုင်ရာကိုရော၊ ပတ်ဝန်းကျင်အနေအထားကအစ၊ အရာအားလုံးကို ပြောင်းလဲပေးနိုင်၏။ ကျွန်တော်တို့ပြန်တွေ့ကြရင် ပြောင်းလဲသွားတဲ့ အရာတွေ အကြောင်း ကိုစစ်ကို စီကာပတ်ကုံးပြောပြမည်ပင်။ ယခင်ကပတ်ပတ်လည်ကြည့်လိုက်လျှင် မျက်စိတစ်ဆုံးမြင်ရတဲ့ စိမ်းညို့နေတဲ့တောင်တန်းတွေရဲ့ အရှေ့မှာ သိပ်မကြာခင်ကမှ ပြင်ဆင်မွမ်းမံထားတဲ့ နေရာတစ်ခုထပ်တိုးလာတာကို ကိုစစ်သိပြီးပြီလား။ အဲနေရာကို ကိုစစ် ဘယ်လိုမြင်လဲလို့ ကျွန်တော်မေးရင် ကိုစစ်က ပုံမှန်အတိုင်း'ကောင်းပါတယ်' လို့ဖြေမလား။ ဒါမှမဟုတ် ဓာတ်ပုံရိုက်တဲ့လူတွေ ပိုများလာတာမလို့ လူရှုပ်တာ မကြိုက်တဲ့ကိုစစ်က 'သိပ်မကြိုက်ဘူး" အဲလိုပြောမလား။
ပြီးတော့ဝမ်းနည်းစရာတစ်ခုက ကိုစစ်နှင့်ကျွန်တော် သည်ကလော view pointကိုရောက်တိုင်း စားနေကျ အာလူးပူရီဆိုင်လေးက ပိတ်သွားခဲ့ပြီ။ ကိုစစ်သိရင်ဝမ်းနည်းနေမလား။ ကျွန်တော်ကတော့ဝမ်းနည်းတယ် ကိုစစ်။ ကံကောင်းထောက်မစွာ ကျွန်တော်နဲ့ ကိုစစ်ထိုင်နေကျ ခုံတန်းလေးကတော့ ရှိနေဆဲပင်။
ကျွန်တော်တို့ ကတိပေးခဲ့ကြတယ်မလား။ နှစ်တိုင်း၊ နှစ်တိုင်းအောက်တိုဘာ ၂၅ ရောက်ရင် ကျွန်တော်တို့ ကလော view pointကို တူတူတက်ကြမယ်ဆိုပြီးလေ။ ကိုစစ်ပျက်ကွက်ခဲ့တာ ဒါနဲ့ဆို လေးနှစ်မြောက်ရှိပြီနော်။ အကယ်၍ ကိုစစ်သာ ခုနေရောက်လာရင် နားကြပ် တစ်ဖက်ကို တပ်ထားပြီး ခုံတန်းရှည်မှာ ထိုင်နေတဲ့ကျွန်တော့်ကို တွေ့မှာပါ။ ကိုစစ်သာ ကျန်နေတဲ့ နားကြပ် တစ်ဖက်ကို ယူပြီး နားထောင်လိုက်ရင် ကျွန်တော်တို့ တူတူ နားထောင်နေကျ Richard Marx ရဲ့ Right here waiting for you သီချင်းက ကိုစစ်ကို အရင်ကလို ဝမ်းနည်းမှုပေးနိုင်ဦးမလား။ ရထားပေါ်မှာ ဖြေခဲ့တဲ့ ကိုစစ်၏စကားသံက နားထဲတွင် တဝဲဝဲ လည်နေသည်။
ဘူတာရုံဟောင်းထဲက မီးရထားတွဲလေးက ပုံမှန်ခုတ်မောင်းဆဲ...
သင်္ကြန်ဆိုတဲ့ ကျွန်တော်ကလည်း ဒီအချိန်၊ ဒီနေရာ၊ ဒီခုံတန်းလေးမှာပဲ...ကိုစစ်ရေ~~
