حكايه و روايه (مجموعه قصصيه)

عفريت بكر

الاول

                عفريت بكر 👻

انا  ندي  حاتم .. فات  علي حكايتي سنه  تقريبا

حكايتي غريبه . بس دايما الخيال بيكون اغرب من الواقع
‏
بتبدا الحكايه بيوم ما جارنا الجديد جه وسكن في الشقه اللي قدام شقه ماما
‏
شاب اسمر وطويل وملامحه اجنبيه مش مصريه دائما هادي  وفي حاله  قعد شهر في الشقه ، بشوفه بالصدفه في الاسنسير   مش بيتكلم خالص. ومتحسش بوجوده

لحد ما في مره اتعرفت عليه كان يوم ما يعلم بيها الا ربنا ...  يوم ما الكهرباء قطعت في العماره  كلها ولحظي الاسود كنت في الاسنسير معاه

واتحبست  طبعا

..

ندي. : انا بخاف من الضلمه وكمان عندي فوبيا من الاماكن المقفوله  .

بصلي ببرود ومفيش اي رد فعل

بصتله تاني بس المره دي كان صوتي عالي ومتوترة : بقولك ايه.  انا بخاف .. اي نيد الهليب (i need help ( فاهم يعني ايه هيلب ...  انت لازم  تتصرف مش عارف اخد نفسي  ...

بصلي وخرج الموبيل من جيبه شغل الكشاف وهو
‏ بيقولي : اهدي  .. مفيش حاجه
‏
ندي : انت بتتكلم عربي .  افتكرتك اجنبي  .. تعرف عربي من امتي بقي

نطق : هو ده وقته ..مش مفروض انك عندك فوبيا وبتخافي

ندي : الفوبيا ...  اه صح .. انا نسيت اني عندي فوبيا ..  ابعد كده شويه مش عارفه اتنفس  .. شهيق وزفير كانو ازاي  .. حد يفكرني

  : بس خودي نفس يا اسمك ايه ..واهدي .. 

ندي : بقولك ابعد عني  يا جدع انت ...

  وقف بعيد   وشويه النور نور  والاسنسير اشتغل تاني
ندي : الحمد لله يارب .  الحمد لله .  انا هدبح فرخه عشان ربنا نجاني من الموت

بصلي باستغراب  وكاني براسين.    ليه حق بصراحه  .. عدلت نفسي وقولته :  علي فكره انا اسمي  ندي

رد : انا اسمي ابي بكر

ندي : ايه ده بجد اسمك كده .. انا افتكرتك مش مصري ..

هو :انا   ابي بكر أو الممكن تقولي ابو بكر  أو بكر اسهل ، زي ما بيقولوا هنا .    من الصومال بس  عايش بمصر من  ١٥ سنين اتعلمت هنا واشتغلت كمان مهندس

ندي : اه ..حلو اوي  هقولك بكر اسهل.   .  سلام بقي عشان رايحه اشتري  حاجه من السوبر ماركت واتاخرت

ابي بكر : انا كمان رايح ينفع اجي معاكي
ندي ؛ تعال ،   اهو نتسلي ..  هتشتري ايه

بكر. : اشياء للتلاجه

ندي : ايه نوع الاشياء .  انت ساكت ليه .  انا مش حشريه .. انا بسالك عشان اقدر اساعدك

بكر : مأكولات أو عصائر.