حكايه و روايه (مجموعه قصصيه)

عفريت بكر ٣ 👻

عفريت بكر

٣

لا إله إلا الله

فجاه الراجل وشه اتحول وبقي وش كلب ورجل معزه

وقفت : رجل معزه.   الحق يا عمو رجلك بقت معزه

الراجل :وبالنسبه لوشي ملفتش نظرك

ندي : لا لفت . بس رجلك معزه ..

الراجل :  متحوليش تهربي من قدرك.  احنا هنفضل وراكي

ندي : انتم مين بقي

الراجل   : هتعرفي .  كل حاجه في وقتها      بس  انتي  استسلمي لينا . 

رجع لشكله مره تانيه وبصلي بشر : اطلعي بره . ومتجيش هنا تاني

ندي : رجلك لسه معزه

الراجل : قولت بره .. برررره
....  ماما وخالتو فاقو من اللي كانو فيه  ، وجرينا
علي بره 

وخالتو : والله ما رايحه معاكم في مكان تاني  . 

ماما. :  ياختي مش انتي اللي جبتي الراجل العفريت ده

ندي : لا ده الراجل المعزه .  رجله معزه.  بجد انا شوفتها

ماما : هو ده اللي شاغل بالك في  المصيبه اللي احنا كنا فيها

ندي : لا ده المصائب كتير . اللي فات حماده واللي جاي حماده تاني خالص . شكلنا داخلين علي منحدر تاريخي ..

ماما : هو الراجل ده قالك حاجه

ندي : قال كل خير يا حبيبتي ..  متشغليش بالك .. وانتي يا خالتو فين المحشي

خالتي : محشي ايه . هو انا قادره اقف علي رجلي ليكي عين .. تضحكي  يا حلوفه

ندي : مضحكش ليه يا خالتو .   بصي انا عندي مبدأ ..

ماما : مبدا ..من أمتي ده يا بت

ندي : اول امبارح جالي .

ماما : ومتقوليش يا كلبه

خالتي بصتلي انا وماما  وصوتت في وشنا وهي بتقول علينا تافهين  روحنا عند خالتو وقضينا اليوم . رجعنا البيت

ماما دخلت تنام وانا طبعا حاولت بس مفيش اي نوم

دخلت المطبخ وبفتح الحنفيه نزل منها دم  صوتت ورجعت لورا

برفع راسي كانت القطه بتمشي علي السقف 

بصوت بس صوتي مش بيطلع .. وقفت ومسكت في المطبخ  ولقيت دم كتير على الأرض والقطه بتمشي قدامي

ندي : عايزين ايه مني .. يا ماما .. يا ماما

جريت علي اوضه ماما .. وهي صحيت مخضوضه وبتسالني في ايه . 

خدتها علي المطبخ وبقولها في دم

ماما. : يا بنتي مفيش حاجه