صباح تاني يوم على ابطالنا
صحي عزيز خد شاور ولبس وهو نازل قرر إنه يواجه أمير قبل ما يروح الشركة، نزل لقى أمير والباقيين قاعدين بيفطروا
عزيز: صباح الخير
كاميليا: صباح النور، تعالى أفطر
عزيز: لأ أنا مش جعان وهفطر في الشركة
ووجه كلامه لأمير: أمير ، أنا محتاج أتكلم معاك في موضوع مهم قبل ما امشي هستناك برة في الجنينة
خرج عزيز يستناه
عند أمير
أمير: خير هيعوزني في إيه عالصبح، اوعي تكوني قولتيله على حاجة
كاميليا: وأنا هقوله إزاي يعني، شوف أنت عملت إيه وأنا معرفش
أمير: عالعموم أنا هشوف هو عاوز مني إيه
بيتر: تمام، وابقى خلي بالك
خرج أمير لقى عزيز قاعد مستنيه
عزيز: إيه كل ده تأخير
أمير: خير عاوزني في إيه
عزيز: لحد امتى يا أمير... لحد امتى هتفضل تلف وتدور عشان تاخد فاتن مني طب أنت سألتها... سألتها هي عاوزاك ولا لأ
أمير بنبرة حادة: مش محتاج اسألها أنت خطفتها مني يا عزيز هي كانت بتحبني أنا وكانت بتهتم بيا أنا مش بيك وهفضل ألف وأدور لحد أما اخدها منك
عزيز: بص يا أمير فاتن عمرها ما هتكون ليك لأنها تخصني وأنت عارف إن أي حاجة تخصني محدش يقدر ياخدها وفاتن مش مجرد حاجة عادية دي حياتي كلها فمهما حاولت عمرك ما هتطول حتى شعره واحده منها
قام عزيز وقبل ما يتحرك لف وقال: اه صحيح السكرتيرة أنا هرفدها انهاردة وابقى أختار ناس عدله تتجسس عليا صح
وسابه بيغلي من الغضب ومشي يركب عربيته
دخل أمير الڤلة لقاهم قاعدين في الليڤينج راح لهم وقعد
لاحظ بيتر إنه شكل في حاجة معصباه
بيتر:. هو عزيز اتكلم معاك في إيه
أمير: البيه بيهددني فاكرني هخاف بل بالعكس أنا قررت أقدم الخطة والخطة هتتم بعد بكرة
بيتر: تمام اهدى كده وكل حاجة هتتنفذ
وكاميليا قاعدة عاملة نفسها مركزة مع الفيلم مش معاهم وسابتهم وطلعت فوق الاوضة
عند عزيز راح الشركة ودخل المكتب وقال للسكرتيرة تتبعه
السكرتيرة: صباح الخير يا أستاذ عزيز ده جدولك ان...
قاطعها عزيز وقال: أنتِ اترفدتي
السكرتيرة بصدمة: اترفدت إزاي أنا قصرت في إيه أو غلطت في إيه
عزيز: عشان تبقي تتجسسي عليا تاني إيه فاكراني مغفل ومش هعرف
السكرتيرة بدموع: أستاذ عزيز أنا آسفه
عزيز: بره ومشوفش وشك هنا تاني
عزيز عمل تلفون للحسابات: صفيلي حساب السكرتيرة بتاعتي وحط عليه مكافأة نهاية الخدمة، وقفل الخط
خرجت السكرتيرة بحرج ودموعها على خدها وبتقول في سرها: ياريتني ما طاوعتك يا أمير
قعد عزيز عالكرسي واتنهد واتصل على فاتن
فاتن: الو صباح الخير
عزيز: صباح النور، عاملة إيه
فاتن: الحمدلله بخير، أنت عامل إيه يا حبيبِ
عزيز: الحمدلله، أنا بظبط الدنيا وهعجل في الفرح فجهزي نفسك لأنه ممكن يكون في خلال الأسبوع ده
فاتن: الأسبوع ده!
عزيز: معلش يا حبيبِ بس أنا مش مطمن عليكي وأنتِ بعيده عني
فاتن: حاضر اللِ تشوفه هعرف ماما ونظبط الدنيا أنا وهي
عزيز: تمام
فاتن: طب والمعازيم ومكان الفرح
عزيز: أول ما أحدد يوم هجيلك ونظبط الموضوع ده سوا
فاتن: تمام يا حبيبِ
عزيز: هضطر اقفل معاكي عشان عندي شغل مهم
فاتن: ربنا معاك، في رعاية الله وحفظه
قفلت فاتن وقامت تاخد شاور عشان تنزل تحضر الفطار وكمل عزيز شغله
نزلت فاتن تحضر الفطار وصحت مامتها عشان تفطر
وهما عالسفر
فاتن: ماما عزيز قالي إن الفرح هيبقى في خلال الأسبوع ده
مامتها: على خير إن شاء الله ومكانه فين
فاتن: عزيز قالي لما يحدد اليوم هيجيلي ونظبط كل ده سوا
مامتها: على خير يا حبيبِ، مش مصدقة إني خلاص هجوزك باباكي لو كان موجود كان زمانه طاير من الفرحة بيكي.
فاتن ومامتها : ربنا يرحمه ويغفر له
عند كاميليا في اوضتها كانت بتكلم عزيز وتقوله على معاد تنفيذ الخطة
عزيز: تمام ماشي، وقفل الخط
فلاش باك
بيتر كان مع أخته في اوضتها: أنا آسف يا كيمي إني ضربتك بالقلم وهينتك قدام أمير بس أنتِ عارفه إني عملت كده عشان ميفقدش ثقته فيا أنتِ عارفه من الأول إن إحنا بنساعده عشان نوقع ما بينه وبين عزيز وناخد أوراق الملكية لينا وعزيز يبقى ليكي
كاميليا: عزيز مبقاش يفرق معايا أصلًا أنا اللِ بقى يهمني أوراق الملكية وبس، وعلى العموم أنا هسامحك أنت عارف مقدرش أزعل منك
وحضنوا بعض وبيتر قالها وهي في حضنه: زي ما إحنا وهسيبلك فون صغير تتواصلي معاه مع عزيز وتعرفيه أول بأول بالخطة وكمان تبقي تضحكي عليه وتقوليله على اللِ أمير عمله وإنك اضطريتي تجيبي فون جديد وخط عن طريق واحدة من صحاباتك
كاميليا: تمام
باك
عند عزيز خلص شغل ورن على فاتن يقولها إنه هيعدي عليهم عشان مكان وميعاد الفرح وقفل معاها وكمل سواقة لحد أما وصل ورحبت بيه فاتن ودخلته
فاتن: هحضر العشا نتعشى ونبقى نتكلم
عزيز: تمام
دخلت فاتن تحضر العشا ومامتها كانت قاعدة مع عزيز عالسفر مستنينها
مامتها: عامل إيه يابني
عزيز: الحمدلله بخير، أنتِ عامله ايه يا ماما
مامتها: الحمدلله بخير، هو خير وكل حاجة بس مستعجل ليه وعاوز تعمل الفرح في خلال الأسبوع ده
عزيز: عشان مش عاوزها تبقى بعيدة عني أكتر من كده مش مطمن عليها وهي بعيدة
مامتها: طب وقررت المكان والمعاد
عزيز: ايوه هبلغكم بيه بعد العشا
مامتها: ربنا يتمم لكم على خير يا حبيبِ
عزيز: يارب
جات فاتن بالعشا وحطته عالسفرة وبدأوا ياكلوا وخلصوا أكل وفاتن قامت تلم السفرة وعزيز ومامتها استنوها في الليڤينج عقبال ما تعملهم نسكافية
جابت فاتن النسكافيه وقعدت جانب مامتها، وبدأوا يتكلموا في المعاد
عزيز: أنا قررت إن المعاد يبقى بعد بكرة
فاتن: بعد بكرة! ، ده قريب أوي
عزيز: معلش يا حبيبِ للأسف حصل عندي ظروف خلتني استعجل كده بس أنتِ تبدأي من بكره تظبطي نفسك وتهتمي بيها وأنتِ ومامتك تعملوا قايمة المعازيم وهسيبلك الفيزا كارت تجيبي بيها الفستان وتعملي بيها اللِ أنتِ عاوزاه وهسيبلك عربية بالسواق توديكم مطرح ما أنتم عاوزين، ومكان الفرح هيبقى في فندق عالنيل أنا حجزته انهاردة وهاجي بكره عالظهر كده عشان أخد القايمة وامشي و هبدأ اعزمهم وهيبقى في اعتذار لطيف عن تقدمنا لمعاد الفرح بالشكل ده
فاتن بتنهيدة: تمام
عزيز: آسف يا ماما ويا فاتن، بس بجد كنت مضطر
مامتها: ولا يهمك يا حبيبِ، المهم أن يتقفل عليكم باب واحد وتبقوا سوا، وبصتلهم بحب وابتسمت وهما كمان ابتسموا وبصوا لبعض
عزيز: طب هستأذن أنا عشان الوقت وعشان عندي وعندك أنتِ ومامتك بكره يوم طويل
قام عزيز وراح ناحية الباب وفاتن قامت توصله وتودعه وقفلت الباب ودخلت
مامتها: أنا قلبي مش مطمن لاستعجاله ده وتحديد المعاد بالسرعة دي أكيد فيه حاجة خلته يعمل كده
فاتن بتحاول تبان إنها مش قلقانه هي كمان: لأ يماما ولا حاجة ده تلاقيه بس من كتر حبه ليا مش قادر يستنى، وضحكت وخدت الصينية توديها المطبخ ومامتها قامت عشان تنام
مامتها: تصبحي على خير
فاتن: وأنتِ من أهله يا حبيبتي
خلصت فاتن غسل المواعين وطلعت كلمت عزيز تطمن إنه وصل وقالها إنه وصل و هينام
فاتن: تصبح على خير
عزيز: وأنتِ من أهلي
ابتسمت فاتن وقفلت وهي بتحاول تطمن نفسها على قد ما تقدر وقالت: خير البر عاجله
صباح تاني يوم على ابطالنا صحي عزيز وخد شاور ولبس ونزل لقاهم بيفطروا راح ووقف قدامهم
عزيز: صباح الخير، طبعًا انتوا مش غُرب ولازم تكونوا عارفين إن فرحي بكرة وهبقى ابعتلكم الدعوة اللِ هتدخلوا بيها الفندق انهاردة عالڤيلة، وسابهم وهما مصدومين وخرج يروح الشركة.
ياترى إيه اللِ هيحصل في الفرح وهل هيتم ولا لأمير رأي تاني.
بجد بعتذر عن التأخير بس كنت محصورة في الثانوية العامة وقررت إني أرجع اكتب تاني وبإذن الله هنزلكم كل اسبوع بارتين حلوين.
دُمتم بخير، رأيكم يهمني. 🌚❤️
#بقلمي
#هاجسي_أنت
ك/ فاتن محمد ♡فُتُون♡
أنت تقرأ
My obsession is you||هاجسي أنت
Romanceالهوس الهوس زي ما هو مؤذي إلا أن إحنا بدأنا نحبه بل بدأنا نتمناه نتمنى شخص يدخل حياتنا يبقى مهووس بينا بكل تفاصيلنا بس عمر ما هيحس بالأذى ده غير اللِ طاله عمر ما هيحس الشخص أن الهوس مؤذي غير لما يجربه بس بطلتنا محستش بالأذى بل بالعكس حبته حبت الأذى...
