متمرد ولكن

الفصل الثالث والعشرون

_ همس والدته اقتحم اذنيه اثناء غفوته صباح يوم العطلة الذي ينتظره بفارغ الصبر كل اسبوع ففتح عينيه يحاول توضيح الرؤية امامه مع استعادة النشاط البصري و العقلي

مدت كفها بالهاتف تناديه : هادى ..حبيبي اصحى تليفونك بيرن من بدرى

امتعض وجهه بضيق ظناً منه انهم يهاتفوه من العمل او الصيدلية الخاصة به : هاتيه يا ماما ...صباح الخير يا ست الكل

ناولته الهاتف بهدوء مبتسمة : صباح الخير يابني

نظر للشاشة بملل ثم انتفض ناهضاً نصف جلسة على فراشه ملاحظاً ذهول والدته فعاد لرزانته قائلاً : طيب بقولك ايه يا ست الكل انا جعان ممكن تحضريلي الفطار ؟
ابتسمت متأكدة من ظنونها ان ( الشعنونة ) كما ظهر اسمها على هاتفه قد تكون حبيبته فنهضت متجهة للخارج : متتأخرش و سلملي على الشعنونة

انتظر حتى ذهبت ثم فتح زر الرد : ايه يا ريهام حد يصحي حد كدة

قالها مبتسماً بمكر يود استفزازها فقط فاجابته بحنق : انت نايم و سايبني في الشارع بقالي ساعة و عربيتي واقفة
تحدث بأهتمام : ايه منزلك الشارع يوم الجمعة يا ريهام

سمع صوتها الغاضب : يعني ده وقت سؤالك يا هادي اكيد رايحة الماركت بجيب طلبات البيت مانت عارف ان مرات اخويا حامل و اخويا مسافر

تنهد بصبر مردفاً : طيب ادخلى جوة عربيتك و متقفيش كدة في الشارع و انا ربع ساعة ابقى عندك بس ابعتيلي اللوكيشن

فتحت باب سيارتها تخبره بقلق : حاضر بس متتأخرش عليا

اغلق الهاتف مبتسماً لا يعلم سر تلك الابتسامة لكن فكرة انها لجأت له اول شخص في عقلها ذلك يسعده

_ بعد مدة نص ساعة كان يركن سيارته على جانب الطريق يبحث عن سيارة تقف لكنه لم يجد فاخرج هاتفه يحدثها : انتي فين يا ريهام مش شايف عربيات

بعد ثانيتين كانت تقف امامه بيدها الهاتف : انا اهو تعالى معايا

وضع الهاتف بجيب بنطاله الاسود و لم تكن خطوتين حتى رأى سيارة صفراء صغيرة ذات انحناء ظهري عميق تشبه جلسة القردة : يعني انتي منزلاني من بيتي الساعة ٧ الصبح علشان السلحفة دي و عربيتي وقفت الحقني يا هادي و بتعيطي ...و هي دي عربية اساسا يا بنتي ؟

ضيقت بين حاجبيها بتذمر : اه عربية مالها عربيتي ملكش دعوة بكرميلا دي صديقة كفاحي و عملت جمعية علشان اقدر اشتريها بتعبي هتعرف تصلحها ولا لا

رفع كمي ساعديه متخذاً وضعية الاستعداد : افتحيها خليني اشوف مالها ، والله خايف اقربلها تتمزء ( تتمزق )

كرمشت وجهها بطفولية و فعلت ما املاه عليها فصدر منه صوت سعال مرتفع متكرر بسبب الدخان الكثيف المتصاعد من السيارة : يا بنتي انتي بتعذبيها ليه هي قدك دي ..دي محتاجة مية يا هانم و انتي سيباها كدة قربت تنفجر فيكي من غلبها