#ليله_في_ديسمبر4
بعد لحظة صمت لدقايق
طارق بنبرة إستفهام قال ليها :امي؟؟؟
خالتي سلوى:شنو امي مالك اها؟
قال ليها ما عملتي الكلام البتقولي فيه دة صح؟
خالتي سلوى:والله عملت،مش قلت ليك اول حاجه حأعملها بعد م انزل السودان حأفتش ليك عرو..
قاطعها بي نهرة وصوت عالي وانا قلت ليك م عايز ،م تشوفي ،ما تدخلي في الموضوع دة
خالتي سلوى:إتكلم معاي بأدب اول وم ترفع صوتك دة علي كدة انا امك قبل كل شي وعايزة مصلحتك مصلحتي شنو في عرسك غير سعادتك وراحتك
طارق:مش لما تحترميني وتحترمي قراراتي الأول؟سعادتي وراحتي حتكون وين في عرس بالجبر ؟
قالت ليه إنت داير شنو طيب؟داير تقعد كدة عمرك كله زي الولد الما كويس ؟الأمهات ديل كلهم بعرسو لأودهم وبختارو ليهم نسوانهم وقفت علي انا ؟
طارق:امي لا إله إلا الله
خالتي سلوى:محمد رسول الله
طارق:البت دي انا م عايزها وم بعرسها منتهي الكلام دة تمام؟
قالت ليه انا كلمت الناس،كلمت خيلانها ،وكلمت خيلانك اللي هم اعمامها برضو،كيف يعني ارجع اقول ليهم م عايزنها لعب عيال هو ؟
طارق:إتصرفي ما شغلتي،إنتِ كيف تخطي خطوة زي دي من غير م تشاوريني؟انا م راجل م عندي خشم؟وإن م إتصرفتي يا امي انا بتصل على اخوانك وخيلانها اكلمهم إني م عايزها فهمتي ي امي؟
خالتي سلوى:سمح اسمع كلامي دة كويس طالما إخترت نصل للنقطة دي براك لو إتصلت على خيلانك ولا على واحد من اهل البت دي وصغرتني قدامهم م عافية ليك لا دنيا ولا اخرة وم برضى عنك إن إنطبقت السماء على الأرض
قفلت الخط في وشو..
طارق بهناك شبه إنهار وبقى م عارف يعمل شنو ،راسو بقى يودي ويجيب وهو سايق العربية وماشي بأقصى سرعة ،كل تفكيره بقى شهد،اكيد حتكون عرفت ،كيف حيقدر يواجها بالموضوع دة ويوضحو ليها خصوصاً إنه إختيار امه بالذات م عادي وحيعمل فجوة كبيرة شديد بين اطراف كتيرة في البيت..
...........
وانا جاية داخله من الدوام لقيت ابوي وعمو عثمان راجل خالتو كوثر قاعدين في الحوش وبلعبو شطرنج ويضحكو،وعمو عثمان بقول ليه م لقيتني رااايق للعب بس وإلا كان وريتك 😂
قلت ليهو عمو عثمااان
قال لي الغالية بتي كيفك إن شاءالله كويسة
قلت ليه الحمدلله ي سعادتك شايفاك باللبس الرسمي جاي علينا بجاي
قال لي هو انا كان م اديتكم طلة وقعدتة اخدتة لي خشم خشمين مع ابوك اقدر اصل البيت؟بيتكم دة بيتي التاني
قلت ليهو حبيبي ي عمو عثمان نحن زاتنا لو م شفناك يومنا بضرب 😂♥️
قال لي كيف الشغل إن شاءالله تمام؟محتاجة حاجة؟اوعى تترددي كان إحتجتي انا وابوك واحد
قلت ليه اكيد وانا مغمضة بجري عليك لو إحتجت 🔥
شايفاك مغلوب في اللعبة 😂😂
قال لي اسكتي ساي مغلوب وراسي مسخن لكن دقايق بس وتشوفي
قعدتة إتونست معاهم شوية وقلت ليه حأمشي ارتاح وخليتهم على كدة.
