#ليله_في_ديسمبر21
في قعدة لينا ونحن بنشرب القهوة ومتلمين إتصلت خالتو سارة مكالمة فيديو وبقينا نتكلم معاها
قالت لي اها ي شهد هسي العرس قلتو بعد شهرين،عملتو شنو جهزتو شنو ولا بس حددتو العرس وخلاص سكتو ؟وين الشيلة،وين قولة الخير،شهرين دي هسي فات منها اسبوع،وين الحاجات دي كلها ؟
رفيدة قالت ليها يا امي قولي ليها حجزتي فستان،حجزتي ميك اب ارتست،اتحبستس؟قعدتي في حفرة الدخان...الخ شهد لغاية الان م عملت اي شي بس اسم عروس وقاعدة
خالتو سارة قالت لي معناها الا اقوم استف شنطتي واجي،سميرة،سلوى قاعدين بتسو في شنو ما تهدو البت دي
عمتو سميرة قالت ليها م بتسمع الكلام
قلت ليهم ي جماعه م حكاية م بسمع الكلام بس اصلاً هو ماف عرس
كلهم بقو يعاينو لي بإستغراب
خالتو سارة قالت لي كيف يعني ماف عرس؟
قلت ليها مافي،يعني ماف صالة،ماف زفاف،ماف عزومة،ماف شي بس هو حيجي يسوقني وحنمشي بس
خالتو سارة قالت لي إنتِ يا بت جنيتي؟
رفيدة قالت لي شهد م جادة كيف يعني م عايزة تعملي عرس؟واخدتي القرار دة على أساس ؟وبراك ولا عمار برضو موافق؟
قلت ليها براي وكلمت عمار م عندو مشكلة
عمتو سميرة قالت لي إنتِ عارفة انو انتي البت الوحيدة في البيت والأهل كلهم منتظرين بفارغ الصبر عرسك ؟
يا عمتو اي اهل عليك الله؟قاعدين يسألو مننا ولا عارفننا حيين ولا ميتين ولا بس ياهو صلة قرابة بالخشم والأوراق الرسمية وخلاص؟
رونق كانت ساكتة وطول الفترة المضت دي بتجي بتقعد وبتكون ساكته او بتتكلم مع خالتو سلوى وسندس وعمتو سميرة،فجأة قالت لي ماف بت بتعرس بالطريقة دي الا اذا كانت معيوبة ما تجيبي الكلام لأهلك ساي الناس يقولو مالها عرسو ليها كدة،وكان العريس ظروفه صعبة اخوانك م بقصرو وبغطو الناقص
قلت ليها والله ياخ انا حريصة على سمعة اهلي ما محتاجة زول يوريني النقطة دي وانا ادرى بالمناسب لي
رفيدة عاينت ليها من فوق وتحت وقالت لي طالما دة رايك ودة قرارك إنتِي صح يا زولة وكان غلط صاح العرس عرسك وانتي بس يحق ليك تختاري عايزاه يكون كيف وي ريت الما طلبو رايه م يحاول يتطفل ويدخل في الما بخصه. ..
رونق قامت مشت على طول
خالتي سلوى م اتكلمت ولا سندس برضو ما اتكلمت والجو شبه إتكهرب كدة لكن واصلنا عادي
............................................
وانا جايه داخلة البيت بعد المغرب لقيت شهاب ماسك سندس وهي بتحاول تتفك منو وهو جاريها بالغصب ومافي غيرهم في الحوش،لما شافوني اتخلعو وشهاب فكاها..
قلت ليهم في شنو ؟
سندس مشت وشهاب بقى متردد في الكلام ومتوتر بعد ما كررت ليه السؤال قال لي بتكلم معاها م بتسمع الكلام حقارة بقت
قلت ليه وإذا ي شهاب من متين بتتعامل معاها كدة؟ودة شنو الشي المهم البخليك تمسكها بالغصب عشان تسمع كلامك؟
قال لي بإنفعال إنتي مالك ما تدخلي لما اتكلم مع البت دي انا اصلاً دلعك ليها دة هو البوظها وخلاها تطلع في راسك وراسنا كلنا
