#ليله_في_ديسمبر20
كنتي عارفة صح؟
عارفة شنوو؟
إنه عمار جا وطلعتك امبارح بالليل ديك مشيتي لاقيتيه 😒
والله م كنت عارفة ي رفيدة، حركة عملوها هو وليلى وبقيت احكي ليها ،قالت لي عايني عايزاهو انا الراجل دة حبيتو خلاص 🥺
المهم نحن هسي إتسمبكنا،م جاهزين ولا شنو ي عمتو سميرة؟
اي والله م جاهزين هو قال العرس متين؟
قلت ليهم م عارفة والله م حدد
رفيدة قالت لي مفروض تحددو إنتو الإتنين مع بعض،ونحن بنتكلم جات سندس داخلة،قالت لينا عايزة شاحن..
كانت حذرة في دخلتها وحذرة في كلامها كأنه نحن غرباء والمكان غريب عليها وكأنها م بتطلب حاجه من ناس م بتعرفهم اصلاً بقيت اعاين ليها حقيقي الإنسان لا مؤاخذ على مكانه الناس في قلبو اياً كانت افعالهم،
رفيدة طلعت ليها شاحن مدته ليها ورجعت واصلت كلامها معي وقالت لي مفروض نكلم امي عشان تجي،وحتتحبسي متين ي شهد مفروض تحددو مواعيد عشان الحبسة والشيلة والموالات دي،انا كلمتك تتحبسي قلتي لي قرار لم الشمل احياناً بياخد سنة وشويه،اهو لبستي ونحن لبسنا معاك
قلت ليها بتتظبط ياخ 😂💔
رغم إنه خالتي معانا في البيت والأمور شبه بتتشاف طيبة من ناحيه التعامل لكن برضو في تكلف بينا انا م بحب اقرب من مكان م هي موجودة ولا هي بتحب كمان ،ي دوب بينا السلام وكيفك اليوم وخلاص،ما سواد قلب مني لكن في حاجات مهما حاولنا نعديها م بتعدي ابداً ودة موقفي من خالتي شكله كده...
رجعنا ايوا قاعدين معاهم الفترة دي،ما عارفة العرس حيكون متين لسة م حددوه اظن لكن قريب،م متأكدة بس م اظن حأقدر أحضرو وم عارفة عنه شي وم عايزة اعرف ،اي بحاول اجي عندكم في البلد هناك فترة لغاية م تعدي فترة العرس بعدين ارجع،بعدين ي خالتي م كلمتي خالي بموضوعي؟
عشان انا قدمت وجمدتة سنة م عايزة تجي مواعيد الدفعة الجديدة تاني كمان اللقى روحي م قادرة ادفع واجمد برضو..
لو قدرت اسدد الرسوم مصاريف الجامعة م مشكله كدة كدة انا لقيت شغل بس لو إتثبته فيه بقدر اطلع مصاريف الجامعة واي شي تاني بحتاجو،خلاص عليك الله ي خالتي م تنسي تكلميهو لي تاني تمام؟
مستنيه منك رد اكيد عشان لو م حيدفع لي اجمع رسوم السنة من شغلي دة من هسي
طارق م كلمتو لأنه من تلقاء نفسه م سألني وم حأكلمو ،م بقدر اتصل عليه واطلب منه يدفع لي مصاريف الجامعة ويصرفني اصلاً هو م قاعد يتكلم معانا لا انا لا امه خالص،عنده صحبو بس بحول عن طريقو وصحبو دة بحول القروش في حساب امه لكن ياها المصاريف العادية بس لا اكتر ولا اقل،وعمتي بس ياهو بتفعل لي النت وإحتياجاتي الصغيرة دي بتجيبها لي مره مره كدة،المهم م تنسي القلتو ليك
وانا ماشة على المطبخ اشرب موية بالليل سندس كانت في الهول براها مشغله التلفزيون وبتتكلم مع خالتها ،م شافتني وم حسيتها بوجودي لكن معلومة إنها جمدت السنة دي صدمتني جداً كيف جمدت السنة وصاحب طارق بذات نفسه مره رسل لي مسنجر وإتكلم معي وقال لي طارق حول قروش بإسمو في السودان ل سندس قال اظنها رسوم الجامعة ومستلزماتها وطلب مني استلمها لأنه م في السودان وتلفونو مفرمط م فيه ارقا م وم قادر يصل لخالتي وم عايز يكلم طارق لأنه هو وكلو يعمل مع سندس الإجراءات وكدة وهو عايز اسبوع عشان ينزل السودان وم عايز سندس تتوقف عليه،وانا بذات نفسي رسلت ليه رقم خالتي وقلت ليه إتصل عليها وشوف كيف ممكن تستلم المبلغ ، يعني طارق من ناحية حول القروش هو حول لكن خالتي م كلمت سندس بكدة وضيعت عليها سنة وخلتها تجمد،وأكيد طارق شهرياً متكفل بمصاريف سندس من الألف للياء بس سندس م عندها علم بي دة ،
قلبي بقى مقبوض وحزنتني جداً،انا إنشغلت لدرجة إني غفلت عنها وعن دراستها وم سألت عليها ،نفسي افهم خالتي ليه عملت كدة ؟معقولة تضيع عليها سنة كاملة وتقعدها في البيت وتخليها تشتغل كمان؟
م حأقدر اعمل شي لأني المره دي حأتفهم غلط والمشكله الفاتت حتبقى ولا شي قصاد دي لو فتحت موضعها،طيب مفروض اعمل شنوو اتصرف كيف؟
وسندس شغالة وين وشغالة شنو اصلاً ؟
طول الليل م جاني نوم وانا بفكر
