#ليله_في_ديسمبر27
الأنا فيه كان ابعد من إنه احاول اللجأ للشرطة،انا كنت في مركز إعادة تأهيل من الإدمان،لو مشيت وحكيت الحاصل معي دة كلو يمكن في البدايه يكون فيه شي من المنطق بالنسبة ليهم،بس متأكدة انه عمار حيثبت العكس،هو قدر يخليني غايبه عن الوعي سنة وشويه،قدر يخليني مدمنة وانا م بعرف حتى يعني شنو سجاير،قدر يشوهني ويغير في شكلي..
العقل والمنطق بقول انه دي كلها كانت خطوات مدروسة بالنسبة ليه وهو ملفه في كل الأحوال نضيف ،وموقفه سليم قدام القانون مهما حاولت اثبت العكس ما عندي دليل غير ريكوردات واتساب سمعتها وايميل شفته،حتى مافي دليل على وجود البنات نفسهم لانهم داخلين بطريقة غير شرعية للبلد،وعمار يده واصله وسمعته سابقاه...
طول الطريق كنت بفكر حأبدأ من وين وهعمل شنو في البلد دي،انا الشي الوحيد العارفاه اني ما ينفع ارجع بس هعمل شنو م كنت عارفه ابداً 💔
طلبت من سواق التاكسي يوصلني اقرب فندق ،وصلني وحجزت غرفة
كانت جواي تساؤلات كتيرة اولها هم اهلي،وين هم من الأنا كنت عايشاه دة؟
مستحيل ما يكونو سألو علي
اول خطوة مفروض اعملها هي إني اطمئن عليهم
بابا امجد ،عمتو ،شهاي،مستحيل يكونو عارفين ويقعدو مكتفين يديهم ،هم الوحيدين الممكن اعرف منهم حصل شنو خصوصاً انه مستحيل عمو عثمان ما يكون عنده علم ب إني عرفت هم شنو بالضبط ومستحيل يكون كتف يديه وسكت دة اذا م كان العملو عمار دة كله كان كلامه..
اول زول خطر على بالي امجد..
التلفون الجايبو لي عمار كان جديد،دخلت رقم امجد بتصل فيه قافل،رسلت ليه في الواتساب،امجد انا شهد ،بقيت ارسل ليه ريكوردات كتيرة ورا بعض بسال وبطمن عليهم فيها بعدها قلت ليه اول م تفتح تلفونك وتشوف الرسايل رد علي..
عديت الثواني والدقايق والساعات ما كان في منه اي رد ولا مستلم الرسايل حتى..
رسلت لشهاب ،ورسلت ل رفيدة،ورسلت ل بابا وسندس كلهم رسلت ليهم ورا بعض..
شهاب مستلم الرسايل بس م كان برد
لكن ولا بابا ولا امجد م كانو موجودين في الشبكة
كنت مستنيه بالساعات لغاية م دخلت الحمام جيت طالعة لقيت رفيدة مرسلة لي قريب ال10ريكوردات كلها كانت بتبكي فيها وبتسالني فيها عن حالي وبقيت كيف و...الخ
اتصلت عليها مكالمة واتساب على طول في نفس اللحظة اول فتحت الخط بقت تصرخ وتبكي وبتقول لي شهد،انتي شهد جد كدة ،طمنيني عنك كيفك ،حتصلي متين..
كانت بتسألني اسئلة كلها ورا بعض منها الكنت البقدر اجاوب عليها ومنها الكنت بتخطاها مع بكاها..
قالت لي يا ي ريت لو ما سافرتي 💔يا ريت لو ما شجعناك على مشية البلد الما فيها خير دي ،بس برضو كله لخير،لما ترجعي حتبدي من جديد والإنسان ما معصوم من الخطأ بقع وبقوم،وإنتي قوية قادرة تتجاوزي اي شي سيء حصل ليك انا متأكدة ،إنتِ بس تعالي وكله بتصلح💔
من خلال كلامها عرفت حاجتين انهم عندهم خبر برجعتي،وانه في روايه مرسومة قايلنها ليهم
بعد ما راقت قالت لي وين إنتو هسي حتصلو متين؟
كم مرة اثناء المكالمه قلت ليها رسلت لي امجد ما شايفاهو داخل،وشهاب ما برد،وبابا برضو ف كانت بتتجاوز سؤالي عنهم..
قلت ليها عايزة اصل لأمجد سريع يا رفيدة بأي طريقة
قالت لي المهم طمنيني عليك خليك من امجد هسي
قلت ليها رفيدة دي المرة الكم اسألك من اهلي وتتجاوزي سؤالي عنهم؟
في شنو فهميني،ابوي وين،عمتو وين،وين امجد،وين شهاب كلهم وين؟
سكتت
قلت ليها رفيدة انا بتكلم معاك جاوبيني زول فيهم حاصله ليهو حاجة؟بابا حاصلة ليها حاجه ،او عمتو او واحد من اخواني حاصلة ليهو حاجه قولي لي
رفيدة قالت لي شهد لما تجي
قلت ليها رفيدة انا م اتحركت اصلاً فهميني اهلي مالهم اخواني مالهم فيهم شنو؟
قالت لي اجلتو السفر يعني؟عمار قال اتحركتي
قلت ليها خليك من الزفت دة وفهميني اهلي مالهم ؟في شنو؟
قالت لي عمو كويس وكلهم كويسين
قلت ليها طيب حاصل شنو؟
سكتت
قلت ليها رفيدة لا إله الا الله؟
قالت لي ي شهد امجد مختفي عنده سنه وشهرين بالشهر دة،وما عارفين ليه اتجاه 💔
في اللحظة دي حسيت بجسمي مهبط..
قلت ليها كيف يعني مختفي؟مختفي وين يعني ما فاهماك؟
سكتت
قلت ليها وانا بصرخ رفيدة ما تسكتي وانا بتكلم معاك امجد مختفي وين مالو الحاصل عليه شنو ؟
بقت تبكي،قالت لي ما عارفين ي شهد ما عارفين والله ،اخر مره كان في مأمورية في الحدود وجا راجع بعدها إختفى نهائي،بلاغات فتحنا تفتيش فتشنا اي شي عملناهو مافي ليهو اي اثر والشرطة لغاية اللحظة بتفتش وبتحقق
بقت تترسم في مخيلتي سيناريوهات،الموضوع دة مستحيل يتخطى عمو عثمان وعمار..
بقيت ببكي وبقول ليها كيف يعني مختفي،كيف يعني مفقود،كيف يعني ما عارفين مكانه ،مشى وين حصل ليه شنو،عملو فيه شنو..
بقيت ببكى بأعلى صوتي..
قلت ليها رفيدة عايزاك تحكي لي قبل ما يختفي حصل شنو ؟الله يخليك يا رفيدة احكي لي بالتفصيل الممل عايزة اعرف
احكي لي عن الفترة الما اتواصلت معاكم فيها دي كلها
قالت لي عمار كان متواصل معاكم صح؟كان بتصل وبتكلم معاكم صح؟
قالت لي عمار كان متواصل مع شهاب،لما إختفيتي قريب شهر كنا بنتكلم معاك بتلفونو هو عشان قال تلفونك بايظ،بعدها مره في الاسبوع بقينا نتكلم معاك والاسبوع بقى اسبوعين،واغلب الوقت لما نتصل عمار بكون في الشغل ما في البيت،لغاية ما في يوم عمار إتصل على شهاب الكلام دة بعد قريب ال٣شهور،وثال ليهو انا ما قررت احكي الا لما وصت الحد ،حكى ليهو إنه انتي فجأة اتغيرتي وم لقاك الزولة الاخدها من هنا،واهتماماتك وسلوكياتك اتغيرت،وحكى ليهو حكايه إكتشافو انك بتتعاطي مخدرات وكدة ما متذكره صياغ كلامه بالضبط وهو عرف كيف والحصل شنو خلاه يعرف لكن قال انه بقيتي شبه مدمنه بتبلعي حبوب وإنه بحاول يعالجك من البيت لكن هو م كل الوقت بكون في البيت بسبب ظروف شغله عشان كدة ما حيقدر يخليك براك،و جاب ليك ممرضة في البيت عشان تتابع حالتك ويخليك تحت المراقبة وقال ليهو انا حبيت اختكم في الصورة ودة سبب منعي لشهد من التلفون، وانه انتي ما بتتكلمي معانا بسبب انه شايل منك التلفون ورسل ليه تقرير طبي بحالتك وكان مصدوم في انه إنتِ يحصل منك كدة وم عارف كيف اصلاً لانو هو اغلب الوقت في الشغل يا مسافر بسبب ظروف شغله ما كان منتبه لإنك بتبلعي حبوب وبتشربي سجاير من وراه وغالباً يا في الشغل وقال دة مستحيل،يا السوادنيات المعاك في المعهد البتدرسي فيه دة هم الخلوك تتعاطى وبقو يدوك الحبوب والحاجات دي وساقوك للطريق دة وطلب من شهاب انه ما يكلم زول ابداً لانه هو زاتو حتى اهلو ما عارفين بالموضوع دة وما حيعرفو خالص لكن هو كلم شهاب من باب انه اخوك الكبير ومفروض يكون عنده علم وكدة ولما تتحسني يتكلم معاك ،وشهاب كلمنا انا وعمتي سميرة وطلب مننا ما نكلم زول خالص بالموضوع دة لا ابوك ولا امجد ولا زول لأي سبب من الأسباب وقال عشان لو امجد عرف حيطلب من عمار ينزلك السودان اليوم قبل بكره وامجد اصلاً وقتها كان مافي في الحدود نحن زاتنا ما كان متواصل معانا ،وفي يوم عمار اتصل علي انا وطلب مني اتكلم معاك وانصحك الفترة دي واتكلم معاك كتير واعرف بتعملي كدة ليه لانو ما مقصر منك في شي ولا محوجك لشي والسبب إنه لقى حبوب مدسوسة في رفوف المطبخ والتلاجة بتاعتكم ولقاها بالصدفة،و قال لي انه حيدخلك مركز إعادة تأهيل يتابعو وضعك لغاية م تتعالجي وتستقري عشان وضعك ما يتفاقم وم قادر يأمن عليك مع الممرضة بس لازم مركز متخصص اقل حاجه حيخليك فيه كم شهر حسب الفترة البحددها المركز ،بعدها حصلت قصة حريق بيتكم بسبب إنه خليتي الغاز فاتح ولما جيتي تولعي ولع فيك ،كنا متابعين معاه حالتك طول فترة قعادك في المستشفى كلها وكان بملكنا المعلومات بوضعك الانتي فيه وورانا انه محتاجة تدخل جراحي تجميلي حسب كلام الدكاترة لانه في اجزا وشك كانت متتضررة شديد لغاية م طلعتي،،اخر ما في الأخر بعد م طلعتي من المستشفى بفترة وبقيتي احسن وكدة اتصل على شهاب وقال ليهو انا ما بقدر اخلي معي اختك دي هنا ،وم بقدر أأمن عليها معي لأنه ظروف شغلي ما بتسمح لي اقعد الوقت كله احرسك وانه هو اتزوج عشان يستقر في حياته ويجيب اولاد م عشان يعيش فيها مشاكل بعد العمر دة،وبعد طلعك من المستشفى جايب ليك ممرضة خاصة برضو لأنه صعب عليه يخليك براك وانه بقى مقيد في حياتو بسببك ما قادر ينجز وما قادر يعمل اي شي،والفترة الأخيرة دي قال ليهو انه قدم لأوراق الطلاق قبل شهر ومشيتو المحكمه ووافقتي على قرار الطلاق بالتراضي ما بينكم
الحتة دي لقيت نفسي بحاول استوعبها طلاق؟محكمة؟
كملت كلامها ب وانه قال حيسفرك او حينزل السودان على كدة وبس دي كل تفاصيل المتذكراها،بس يا شهد م تختي في بالك منو فينا ما بغلط؟المهم هسي إنتِ كويسة وبخير وإعتبريها تجربة شيلي الحلو منها وارمي الكعب منها وراك ،الحياة ما بتقيف ،رغم إني عارفه اخلاقك وعارفاك انتِ شنو،وانا والله في البدايه حلفت ستين يمين انه كذب وم ممكن انتِ تعملي كدة لكن كان مرسل لينا تقارير فحوصاتك كلها ،عموماً صًحبة السؤ دي في اي مكان في وعمار زول كويس شديد يا شهد والله واخلاقو كويسة والعملو معاك دة ما بعملو زول غريب ولا حتى قريب، كان ب إمكانو يرميك ويقول مالي مالها او يطلقك ويرجعك من البداية لكن هو صبر رغم كل شي ،كان على قدر ما يقدر بقول لي وبقول ل شهاب ما تكلم زول ،يا شهد ماف زول بخرب بيتو بيدو والله ابداً اسمعيها مني انا اختك دي لو قدرتو تصلحو الأمور ما بينكم وترجعو حاولو ارجعو،إعتذري ليهو وابدو من جديد وعفى الله عما سلف وحتى لو نزلتو السودان انزلو اجازة،زيارة كدة بس ،والله عمتي سميره قالت الا لو كاتبنك ما ساي وم براك ،او مدنك عين من الصور البتنشروها ليكم مع بعض والحياة الهادية العايشنها كنتو اتحسدتو والله ي شهد عمار دة الف مين تتمناه،او يمكن اهله زاتهم م بعيد،عمتو مشت لكم شيخ عشانك هو اصلاً الحصل ليك دة ما ساي،السودانيات ديل لو هم الكانو بدوك المخدرات والحاجات دي معناها هم اتعمدو يخربو عليك يا شهد💔
وكمان عايزة اقول ليك شنو ناس خالتو كوثر سافرو تركيا طبعاً استقرو هناك ،هنا بس بقى فاضل في البيت عمو عثمان وحسام ،عمو عثمان اترقى لرتبة فريق قبل كم شهر ،متواصله معاك خالتو كوثر ولا لأ؟
حسام دة كان شفتيهو قرب يجن بسبب فقدان امجد دة كان شفتي م خلى مكان وم خلى شي م عملو عشان يلقاه،للأن جاري وبفتش وبسأل والله وقف معانا وقفة ي شهد ،صورو ناشرها في اي مكان في اعمدة الشوارع العامه في المستشفيات في المشارع،في قنوات التلفزيون،اي مكان ممكن تتخيليه ،ولسه بوزع وبنشر في الفيسبوك،متأملين والله متأملين يجي راجع تحت اي لحظة بقينا بس حارسين الباب والتلفونات اي واحد فيهم دق كلنا نقوم جارين،
سكتت مسافة وقالت لي ما انسى برضو سندس وطارق إتزوجو قبل كم شهر وحالياً سندس حامل ليها شهرين...
لم أكن أظن أننى سأُخْفق هكذا، لم أكن أرانى مطلقاً ذلك الشخص المُحبط الذى عليه الآن ؛ كنت دائماً أرى أن هؤلاء الذين هزمتهم الحياة ماهم إلاأشخاص لم يحاربوا أبداً، أراهم ضعاف ومستسلمون، لكننى أصبحت اليوم مثلهم ؛ حاربت وهُزمت، صبرت ولم أنل، أنتظرت ولم أصل، ولم يعد في العمر بقية.
بكره مافي متفقين من هسي 🤝📌
