#ليله_في_ديسمبر26
ما تقرب مني ،ما تقرب مني يا عمار قلت ليك..
حأفهمك يا شهد..
ما عايزة افهم منك شي ،ابعد مني بس قرفانه منك
إتزوجتني عشان شنو إنت ممكن افهم؟
إنت وأخوك وخالتو كوثر كلكم إستغفلتوني
عايزة اعرف وديت بنات الناس وين يا عمار،عملت فيهم شنو؟وال7ضحايا ديل يعني شنو؟
يعني ماتو؟
ماتو كيف؟
كل العيشتني فيهو طول فترة ال3سنين من لما عقدنا لغاية الان دة كلو كان كذب ووهم؟
دة ما كنت إنت؟
قال لي شهد وهو مقرب علي رميت ليه التلفون وانا راجعة منه لورا وبقول ليه ما تهبشني ما تهبشني يا عمار وبقيت اصرخ فيه بكريقة هستيريه لغايه ما مسكني وحضني بالقوة وانا بقالع وبقى يتكلم معي وانا بصرخ وما متذكرة تاني الحصل شنو لغاية م صحيت لقيت نفسي في غرفتني بس ما كنت قادرة اقوم وهو قاعد في كرسي جنبي وبعاين لي
م كنت حاسه بجسمي ولا برجولي ،اي طرف من اطرافي ما كنت حاسة بيه نهائي
بقيت اعاين ليه ودموعي جاريه..
قام من مكانه ومشى على شباك الغرفة فتح الستارة وبقى يعاين برة مسافة وجا راجع
قلت ليه ال7بنات ماتو ؟جاوبني ،ال7بنات القال عنهم عم عثمان ضحايا ماتو؟
بسأل فيه ودموعي جاريه
قلت ليه ماتو بسببي ،انا الإخترتهم
قال لي شهد الحقيقة الوحيدة هي إنه البنات ديل بختارو مصيرهم دة وتبعاته بيدهم،هم عارفين إنهم حيدخلو امريكا بطرق غير شرعية والموضوع فيه مخاطرة وبوافقو،شال اللابتوب بتاعه وفتحه وقرب علي قال لي شايفة دي نُسخ من اوراقهم وهم موقعين بكامل إرادتهم على الإستمارة بتاعة التسجيل ،كل واحدة م قعة عارفة تماماً مخاطر الطريق وإحتمالية وصولها سالمة 50% بس
قلت ليه أسوأ ما في الموضوع إنه إنت دكتور،إنت الناس بتأمن عليك حياتها وهي مطمنة كيف ممكن يكون دة الجانب التاني من حياتك شكله كدة؟
عملتو في باقي البنات شنو؟
وديتهم وين جاوبني؟بتبيعهم اعضاء؟
قال لي ابداً الشي الأكيد العايزك تعرفيه انهم ما بتباعو اعضاء ولا انا بستغل مهنتي في حاجه زي دي
قلت ليه تستغل مهنتك؟
قلت ليه في إستغلال للمهن اسوأ من كدة؟
إنت الدكتور،واخوك المفروض انه جزء من مؤسسة مسؤوليتو حماية الوطن والمواطن هو نفسه البتاجر بالمواطن عن اي استغلال انت بتتكلم؟
سكتت مسافة بعدها قلت ليه
طالما ما بيتم بيعهم اعضاء يبقى بتم إستخدامهم في الأسوأ من كدة ودة شي افضل منه تبيعهم اعضاء على الأقل مصيرهم معروف
النقاش بينا كان هادي كأنه ونسة عادية،ودة بسبب ثباته الإنفعالي،واحد تاني غير عمار كان ما خلاني يطلع علي نهار او تغيب لي شمس اما هو ف كان هادي ومتماسك وحتى اسئلتي بجاوب عليها بدبلوماسية كدة ،انا م كان فيني حيل اقاوم او انفعل او حتى اتكلم بصوت عالي ،ي دوب كنت بقدر اتكلم اما باقي اطرافي كانت كأنها ما موجودة
،قلت ليه طيب خليني استغل اللحظة دي واسألك حتعمل فيني شنو؟
قال لي إختاري إنتِ عايزاني اعمل شنو؟
طول فترة التلاتة سنين دي حياتنا كانت متفصلة على مزاجك من لحظة العرس لغاية ما وصلنا ،ف الان إنتِ قرري عايزة شنو؟
قلت ليه اسوأ الخيارات شنو؟حتقتلني؟هو واضح انك بديت تعمل كدة بتخديرك لجسمي بالشكل دة يبقى انا كدة كدة ميتة
قال لي ممكن تتناسى معرفتك بأي شي ونعيش عادي ونكمل من محل ما وقفنا وانا اوعدك ما اخليك جزء من اي شي تاني؟
قلت ليه أتناسى ؟
عايزني انسى إنه إنت الشخص الوحيد القلت ليه في يوم اني اتعلمت يعني شنو ثقة وانا معاك؟
انسى إنه إنتو إستغفلتوني وإستغليتوني وجبتوني هنا ؟أنسى إنك خليتني جزء من شغلك القذر دة لما خليتني اختار البنات دي
اي عيشة عايزني اعيشها معاك دي ؟
قال لي بعيداً عن الجانب دة من حياتي ،الجانب بتاع حياتي معاك ك دة اكتر شي انا كنت صادق فيه،انا م استغليتك ولا استغبيتك ابداً وحاولت اقدم ليك افضل ما عندي سواء كان مادياً او النسخة الأفضل من شخصيتي...
قرب كرسيه علي ومسك يدي الانا ما حاسة بيهم اصلاً وقال لي إتقبليني كدة يا شهد،إتقبلي شكل حياتي التاني دة زي م اتقبلتيني زي م انا في البداية ،الإتغير شنو فيني ؟انا معاك زي ما انا عمري ما حتغير ك زوج ليك ،كل المتزوجات بتقبلو ازواجهم بالهم عليه وببقو ليهم ستر وغطى مهما بلغو من سؤ طالما م بقصر منها في شي، وانا ما حأقصر منك في شي..
