#ليله_في_ديسمبر15
أرجو أن تكون النهاية السعيدة في مكانٍ ما سأصل إليه يومًا وأن تنتهي جولتي من الركض وراء أحلامي بنيلها لا بالندم عليها، وأن تستحق الوجهة الأخيرة عناء الوصول إليها منذ البداية...
دقيقة احسب..
فتح ليك باب العربية وإنتو طالعين ،وجاب ليك بوكيه ورد،ولما وصلتو تاني فتح ليك باب العربية،وجره ليك الكرسي عشان تقعدي،وطلب الأكل بناء على كلامك وفتح ليك باب العربيه لتالت مره ووصلك البيت وفتح ليك باب العربية لرابع مرة وإستناك لغاية م تدخلي،وإتصل عليك مكالمة ما بعد الDate اللي هي اهم من الDate نفسه ،الخطوات دي بالنظام دة حتى ليوناردو دي كابريو م عملها في تايتنك 😁
ضحكت وقلت ليها حافظ شديد
قالت لي مذاكر بطريقة فوق الممتازة،المهم خليك منه هو احكي لي حسيتي بشنو تجاهه او معاه
قلت ليها محترم وظريف
قالت لي ياخ م بتكلم عن ظرافته واحترامه اقصد شعورياً،هو نحن حنعرس الواحد كيف لو م حسينا بإنجذاب ناحيته ؟
قلت ليها ي بت بطلي قلة ادب 😂
قالت لي جد كدة،طيب م حسيتي بمشاعرك اتحركت تجاهه ؟
قلت ليها لا ي بت دي اول مقابله لينا يعني ي دوب بنقول ي هادي
قالت لي م المشكله إنه الfirst date بحدد حاجات كتيرة
قلت ليها قناعتي بتقول لي إنه الfirst deat بكون مليان تكلف ومحاولة لإبهار الطرف التاني ليس إلا يعني مهما كان الأداء رهيب ف البدايات بتظل بدايات والعبرة في الخواتم
قالت لي شهد بطلي تقري كتب عشان تبطلي فلسفة 😒
قلت ليها طيب حاضر 😂😂😂😂
شهد اها ي بتي بشري العريس كيف
حتى إنتِ ي عمتو؟
ما نتطمن ي بتي
مبدئياً كويس
يعني شنو مبدئياً دي طمنينا عديل انا وخالتك سارة لما اتأخرتي قلنا ننتظرك برة في الشارع
صاح كلام عمتك اها كلمينا كيف العريس،لو حسيتي ب إنه في اي شي م تمام طوالي م تترددي ،لأنو عرسان اوروبا ديل م مضمونين
لا م عليه عوجه غايتو للان
الحمدلله يعني نبدأ نتحبس؟
اتكلم معاك في تفاصيل العرس وكدة؟
لأ ابداً ي خالتو سارة
ولا فتح معاك الموضوع او جاب ليك سيرة ؟
خالص ي عمتو
اها نان طلعتو اتلاقيتو ليشنوووو؟
رفيدة قالت ليهم دة إسمو ال First deat م فيهو الكلام البتسألوها عنه دة ي عجايز ،الكلام البحصل فيهو بتحكي للشبوبات بس م ليكم ولا م كدة ي شهد؟
خالتو سارة قالت ليها أصلك إنتِ بت قليلة ادب وفارغة
عمتي سميرة قالت ليها شوفيها تتخجل كيفن خلاص سمح فهمنا 😂💔
حسيت نفسي قدر السمسمة حقيقي يعني 💔
وانا بجهز للشغل بكره جاتني مكالمه ،رفعت التلفون لقيتها خالتي كوثر..
اول م فتحت الخط قلت ليها كويس إنو إتذكرتي إنك عندك بنت إسمها شهد
قالت لي حبيبتي الزعلانه مني
قلت ليها م تحنكيني ب حبيبتي انا حقيقي زعلانه منك
قالت لي والله الفترة المضت دي م بتتخيلي كمية الضغطة الكنت فيها وكنت شغالة ورش عددها فوق م تتخيلي وحتى جاتني سفرة م قدرت اسافر قلت ليهم عيانه وفعلاً عيانة والله
قلت ليها الف سلامة مالك؟مشيتي الدكتور؟
قالت لي م مشيتي والله حاسه بأرق وإرهاق مبالغة عايزة اقعد في البيت على الأقل اسبوعين
قلت ليها ايوا ارتاحي وم تتعبي روحك وابعدي عن التلفونات بالذات تلفون العيادة والاستشارات اقفليه خالص
قالت لي حاضر اها إنتِ كيف وامورك ماشة كيف،م حكيتي لي الحصل شنو بالتفصيل بخصوص موضوع سندس وطارق
شلت التلفون وطلعت السطوح وقعدت احكي ليها الحصل بالتفصيل
قالت لي غايتو ي بتي الحمدلله رغم جمال علاقتك مع طارق الظاهرياً كانت إنها حلوة لكن لما نجي نحللها بنلقاها مرهقة،علاقة م واضحة او م عندها إسم واضح،ايوا نعم ولد خالتك وممكن يكون في نوع من القرب بينكم لكن م بحجم التقارب الكان بينكم ودة إستهلاك لمشاعركم الاتنين مافي واحد فيكم مدي التانيه فرصة عشان يتفرغ لحياتو بشكل افضل..
بالنسبة لخالتك ورونق م قادرة اقول ليك شي غير ربنا يهديكم وم تعملي شي غير ترفعي يديك للمولى عزوجل وتتحسبني عليهم بس
قلت ليها فعلاً عموماً دة كل الحصل وانا لما لقيت نفسي متضررة حسمت الموضوع مع طارق وإكتفيت بكدة
قالت لي عجبني موقفك خير م فعلتي المهم إنتِ الان كويسة طمنيني؟
قلت ليها ايوا الحمدلله كويسة
قالت لي اها نتكلم في الأهم ،ليلى قالت لي إنه إنتِ وعمها طلعتو إتلاقيتو وكدة
قلت ليها ايوا ،يوم جا بيتنا م قدرت الاقيه،ف إتلاقينا اليوم
قالت لي طيب وموافقتك دي إن شاءالله تكون بقناعة تامة ي شهد وماف اي عوامل محيطة بيك سبب في كدة سواء طارق او الحصل مؤخراً دة او غيره
قلت ليها لا ابداً إنتِ عارفة إني بفكر مليون مرة قبل اخطي خطوة بخصوص اي قرار مصيري
قالت لي اتمنى تكوني فكرتي كويس شديد ي شهد
قلت ليها طيب ي خالتو كوثر إنتِ قولي لي رأيك شنو؟
قالت لي في شنو؟
قلت ليها في دكتور عمار،إنتِ ادرى بيه طبعاً،وعارفه إني معتبراك في مقام امي واكيد مصلحتي في المقدمه عندك بغض النظر عن صلة القرابة بينكم إنتِ رايك شنو فيه؟ورأيك شنو في قرار إني اتزوجه ؟
قالت لي إنتِ إستخرتي ؟
قلت ليها اممممممممممممم لا
قالت لي إستخيري ،وكرري إستخارتك كذا مرة لغاية م تطمئني
قلت ليها دة رأيك؟
قالت لي دة رأي اي أم اكيد
قلت ليها طيب حاضر
قالت لي ولو احتجتيني في اي وقت م تترددي تتصلي علي
حاضر ي خالتو وإنتِ خلي بالك من صحتك وإرتاحي وزي م قلت ليك ابعدي تلفون العيادة من جنبك وإلا حأجي اخدو واخليه معي
حااااضر حبيبتي
واذا لبكره حسيتي نفسك م كويسة امشي المستشفى
حاااضر
حأتصل عليك اتأكد بكره م عايزة اجي عشااانن
فهمتك وفاهماك،حاضر 😂
لكن لو خليتيني اقلق عليك حأجي اكيد
