#ليله_في_ديسمبر_34
سياف إنت جادي؟
دقايق
إتصل علي مكالمة ،
فتحت الخط قلت ليه إنت وين؟
قال لي ماشي على ليبيا بالخلا مش في السودان عندنا حتة بالإسم دة 😂💔
قلت ليه سياف دة بجد؟
قال لي يا بت الحلال صلاتك على النبي؟
قلت ليه الف على الحبيب
قال لي صاحبي القلت ليك عليه لقيت ابوه عيان وفي الأردن حالياً بتعالج هناك،وصراحة انا هناك ما حأقدر اقدم اي نوع من المساعدة عشان كدة لازم اصلو وادرس حيثيات القضية وافهم منه مباشرة وان شاء الله ما يحصل إلا كله خير
سكتت وانا بحاول اوقف دموعي
قال لي الو ؟
قلت ليه يعني ما عارفة اقول ليك شنو،اخر حاجة اتوقعت زول ممكن يعملها و...
قاطعني وقال لي دعواتك بس ،وبعدين نحن دمنا دة غالي ما بنخليهو ورانا كدة ابداً مهما حصل ،إتواصلت مع مسؤول في السفارة السودانية قبل ما اتحرك وإن شاءالله اول ما اصل حأمشي اقابله اولاً وافهم عدم تدخل السلطات بالخصوص دة شنو،وإنتي كدة كدة عندك علي إعتذار ما قدمتو بالشكل الصح ف الخطوة دي إعتبريها إعتذار مني ليك ،اول ما نصل واصل لي اخوك بتواصل معاك واخليك تطمني عليه إن شاء الله
قلت ليه إن شاء الله شكراً بالجد يا سياف ،حقيقي كلمة شكراً قليله
قال لي داخلين على مكان ما فيهو شبكة يلا في امان الله
من فترة ما حسيت بشويه راحة زي الحسيتها بعد المكالمة دي زي الزول الكان جاري مسافة طويله ووقف إتنهد..
.............................................
طارق انت مش وعدتني؟مش قلت لي مسافر السودان بس وجاي راجع البسفرك ليبيا شنو؟عشان تسوي شنو وعشان تقدم شنو وتساعد بشنو يعني ما فاهماك ؟
زول شغال تهريب عديل وهو ضابط يعني كدة كدة في كل الأحوال طالع منها،ما تتعب روحك ساي ،وانا حامل والدكتور كلمك انه حملي دة صعب يستمر ومفروض تبعدني من كل الاجواء دي لكن ضروري توترني وتنرفزني حتى ترتاح ،مش كفايه اني اتجاوزت حكاية انك سافرت بدون ما انا اعرف؟مش كفاية إتفاجأته بيك بي وإنت مسافر؟
حألقاك متين انا لو ما لقيتك في الفترة الزفت الأنا فيها؟
يعني عندك ديل ومشاكلهم الما بتنتهي دي اهم مني انا؟
انا تعبانه جداً يا طارق وإنت عارف كدة بس بتتعمد تضايقني م كنا كويسين قبل كم شهر اول م خلاص شهد ظهرت قمت لحركاتك...
سندس الله يهديك امشي اخدي ادويتك تمام وارتاحي نومي الزمن متأخر
ما تقول لي الكلام دة كأني شافعة انا اعصابي تالفة ما عايزة ادوية ولا زفت انا عايزاك انت
اذا عايزاني م اتكلم معاك كانك شافعة معناها بطلي امور الشفع البتسوي فيها دي،يا زولة اخوي في مِحنة اخليهو عشان اقعد احرسك؟
دة كلامك يا طارق؟
واخر كلام ،طالما ما ناقصك شي ما تتجنني فيني،انا م جاي هنا اللعب،ما ممكن تتصلي علي في راس كل ثانيه تسأليني راجع متين عايزة مني شنو؟لما الموضوع دة يخلص على خير انا برجع تمام؟
ناقصكم شي حاصله ليكم اي حاجه اكتبيها لي في الواتساب شي مهم شديد اتصلي غير كدة لا الفيني مكفيني وزيادة يلا سلام.
سندس وهي بتبكي:شايفة يا عمتي شايفة تصرفاتو معي؟شايفاه بتكلم كيف؟انا بجد تعبت منو تعبت خلاص ولا براعي لوضعي ولا حالتي عندو مشاكل الناس دي كلهم اهم،انا دايماً اخر همو،دايماً انا ما من اولوياتو رغم اي شي بعملو عشانو،اعمل شنو انا اتطلق منه وارتاح؟ما ممكن كل يوم باكيه بسببه اعيش عمري دة كلو وانا ببكي يعني ولا شنو؟😭💔
يا بتي قولي بسم الله ،هسي في شنو اللعني الشيطان الببكي شنو ؟طارق دة جديد عليك؟ما هو من زمان دة حالو بالذات مع اولاد خالتو ديل ،تتعودي بس وتصبري لغاية ما يرجع برواقة كدة تجهزي نفسك وتتكلمي معاه براحة وتطلبي العايزاه ،لكن بإسلوبك دة ما بتلقي منه غير الشكل والجوطة،الرجال ديل زي الأطفال بالسياسة بمشو
لكن يا عمتو انا اقعد اسايس فيه كدة لمتين؟لمتين بس؟
عندك خيار تاني غير كدة؟فكرتي بعد الطلاق تعملي شنو؟اقعدي اتعاوري وإتشاكلي معاه كدة لمن تلقيه عاين بره
هسي هو مقصر؟ما مقصر في العين لبره وتلفونو يشهد على كدة وياما قبضتو كل مره عذر جديد،انا عمري م لاقاني راجل متزوج بصاحب بنات زي ما بعمل ولدك دة ،بيتعمد يعمل كدة انا متأكدة إنه بتعمد يعمل كدة
