#ليله_في_ديسمبر18
أكثر ما يؤسفني مجيء الأشياء الجيدة في وقت سيىء، الأمور التي لطالما حلمت بها و انتظرتها تطرق بابي في أكثر اللحظات التي تسود فيها الفوضى حياتي، وتكون نظرتي مشوشة، فلا أنا أجيد التعامل معها ولا هي ترفق بي و تنتظرني، وسرعان ما تتلاشى قبل أن أحظى بها أو قبل أن أخبرها أن هذه ليست أنا.
شهد ،يا بت شهدد
نعم ي خالتو سارة
هاك دة طارق قال عايزك
قلت ليها بتردد طارق؟
قالت لي هاك امسكي التلفون عندي حلة في النار
شلت التلفون وقلت ليه طارق كيفك
قال لي امبارح كان عقدك قالو م كلمتيني إنه عقد..
قلت ليه المفروض إنها خطوبة بس دة كان رأي شهاب
ألف مبروك ،ربنا يتمم ليك على الف خير ي رب
قلت ليه جد ي طارق كان المفروض تكون خطوبة بس قالو إنهم يعقدو ف عقدو وانا م كنت عارفة
قال لي كله لخير،الله يسعدك ،لو إحتجتي لي في شي انا موجود ابشري والبينا عامرة تمام؟
قلت ليه حاضر
إتكلم معي ببرود وبنبرة الزول العتبان علي ولايمني كأني م كنت صادقة في كلامي معاه ومكذبني،حسيت بغصة في حلقي ودموعي بقت في طرف عيني وجات جارية ،ماف شي بينا بتقال تاني ،ولا في واحد فينا ليه حق يعتب على التاني بعد كدهه
عدت ايام واسابيع وزي م قال عمار كان بعيد كل البعد في التواصل مباشر معي ،مره مره يرسل لي واتساب يطمئن علي واوقات بتتواصل معي ليلى وخالتو كوثر ،رغم اني حسيت إنه إسلوبي وطريقتي كانت حادة معاه ومفروض اعتذر إلا إني م كنت حاسة إنه دة وقت الإعتذار المناسب.
..................
سندس أنا معترف إني غلطتة في حقك وحقك فوق رأسي والله،إنتِ لسة صغيرة والحياة قدامك بكل خياراتها ليه تختاري تسلمي نفسك ل أمي وكلامها وتمشي على هواها؟ليه تختاري تحتكري نفسك في مكان م مكانك؟
يا سندس انا يمكن دي المرة الوحيدة الحأكون واضح وصريح معاك فيها لأنو في الأساس الغلط كان غلطي وكان في لحظة غضب وحماقة وانا قبل م اتصرف اي تصرف احمق جيت وسألتك يا سندس حاصل شنو في البيت،قلتي لي حيكون في عرس قريب
قلت ليك شهد صح اتقدم ليها زول ،ردك كان ايوا
سألتك شهد وافقت؟
قلتي لي الخطوبة تمت اي
قلت ليك شهد وافقت رددت ليك السؤال مرتين جوابك كان اي
قرار زواجي منك كان غلطة في لحظة حماقة وانا متحملو بكل تبعاتو،أنا م أسف لأني بقول ليك كان غلطة هو فعلاً كان غلطة بس إنتِ وأمي وكلكم كنتو سبب فيها وطالما كذبتي معناها ي سندس عارفة حقيقة مشاعري تجاه شهد،وانا هسي بقولها ليك لو في بت انا كنت وما زلت عايزها ف هي شهد ،صح م حصلت قسمة والبقت بقت لكن انا في بنات الأسرة دي يا شهد يا م عايز،عايزاني ك أخو حأشيلك فوق راسي وم حأحوجك لي شي ،اكلك شرابك لبسك قرايتك لغاية م تتخرجي وتكوني في بيتك على عيني وراسي بس م تنتظري مني شي اكتر من كدة ابداً فهمتي ي سندس،وم تسمعي لي كلام امي،ايوا نعم هي امي وانا م بقدر اعمل ليها شي عشان هي كدة ودة طبعها ممكن تغيرني وتمشيني على هواها وم حتتغير هي لكن كل البقدر اقولو ليك لو حتسمعي كلامها حتتحملي معاها نتايجو زي م حاصل فينا هسي ،انا م اتكلمت معاها وم حتكلم معاها لأنه م حأطلع من كلامي معاها بنتيجة،ولو قلت ليها الكلام القلتو ليك دة م حيصلك زي م انا عايز عشان كدة حبيت اتكلم معاك مباشرة
.......................................
السلام عليكم مستر خالد
اووووو شهودتنا ياخ مرحب مرحب
شنو لكن ياخ تسفهيني في الواتساب كدة ،شنو التقلة دي ي بتنا
قلت ليه العفو ي مستر ياخ م كدة بس تقول شنو
قال لي العريس م مديك فرصة تفضي لينا شكلو
قلت ليه فعلاً
قال لي ي سلام ياخ والله حظو ،محظوظ شديد
قلت ليه قلت عندك شنو عايزني اراجعهم معاك؟
قال لي ايوااا اول شي اتفضلي الهدية دي مني ليك وم تقولي لي م بقبل هدايا بدون مناسبة وتحرجيني زي المرة الفاتت المرة دي الهدية مناسبتها عقدك ،تاني شي في الإيميل دة عايزك تفهميني المقصود بيه شنو بس تعالي بجاي عشان اللابتوب م شاحن والوصلة قصيرة
قلت ليه حاضر ،قام لي من الكرسي حقو وقال لي اتفضلي
قلت ليه لا م مهم اناااا
قال لي لا اقعدي عشان الإيميل طويل ومحتاج شرح
قعدت وفتحت الإيميل ،قلت ليه طيب ي مستر هنا هم بقولو ليك انهم موافقين على المقترح بتاعنا بشكل مبدئي لكن لازم يكون في اجتماع اولي عشان تناقشو فيه النقاط المهمة ،تاني شي..
وانا بتكلم حسيت إنه درجه قربو لي م طبيعيه وحسيته بتنفس في وشي
صلحت قعدتي وتجاهلت الحاجه دي فجأة خت يدو في كتفي وقال لي متعطرة بشنو عطرك دة جميل جداً
على طول قمت على حيلي
قال لي بخلعة مالك؟
م رديت عليه وطلعت من مكتبه وحسيت جسمي كله برجف،دخلت المكتب بتاعي وقفلتو علي وبقيت ابكي
البكية والخلعة بتاعه اول مره زول غريب يقرب منك بالطريقة دي ويبيحها لنفسو،رغم إنه رد فعلي كان مفروض يكون غير دة لكن الخوفة لحظتها م خلت عندي حيل غير اني رجولي تطلعني من هناك
