#ليله_في_ديسمبر41
بعد كلام الدكتور سياف طلعني برة واقرب مقعد قدني فيه وبقى يقول لي شهد..
انا ساكته وسرحانه وخاته يدي في وشي وبقول مستر جو مات؟
كيف يعني مات؟
سياف بقى يقول لي شهد بتكلم معاك انا،عايني ،قعد على رجولو في الأرض ومسك وشي بيديه قال لي دة قدره ويومه تم ما مؤمنه بالله إنتِ؟
وقفت على حيلي وبقيت خاتة يدي في راسي
فجأة لقيت سياف ضماني عليه وبقى يطبطب علي ويقول لي إتكلمي معي ي شهد!
شهد ؟!
إتسنتدتة في حيطة كدة وبعدها قعدتة في الأرض ،وانا بعاين حوالي و م قادرة اقول اي شي ،كنت شبه داخله في صدمة..
سياف قعد في الأرض وهو ماسكني كان بحاول يخليني اتكلم او ابكي وانا كنت قاعدة وساكته وبعاين ليه...
قال لي يلا تعالي نمشي البيت ،وقفني على حيلي وقال لي ماف شي يتعمل في المستشفى الإجراءات حيقومو بيها الإداراة،يلا ي شهد..
قلت ليه انا في الإدارة،انا مسؤولة عنه ،ما بمششي بخليه وراي ،ما حصل خليتو وراي انا...
مسكني وقال لي شهد الأعلى منك موجودين حيعملو الإجراءات واكيد عندهم مراسم و بروتوكل بمشو بيه ،ف قعادنا هنا ما ليه لازمة يلا تعالي
ساقني وطلعنا من المستشفى،طول الطريق وهو بحاول يتكلم معي
ايوا نعم شفته موته قدامي بس ما كنت م مصدقة وبحاول استوعب إنه حقيقة وكان في خوف متملكني بطريقة سيئة شديد وعقلي م عايز يوقف تفكير..
وصلنا البيت
لاقتنا لين من الباب قالت لينا في شنو؟شهد مالها؟
قال ليها بعدين..
سياف دخلني الغرفة وقعدني في السرير وقعد جنبي قال لي يا شهد ..
رفعت عيني عاينت ليه وانا ساكتة..
قال لي لما تبكي حترتاحي عارفة كدة إنتِ صح؟
قلت ليه امبارح كان بقول لي إنه كويس وما حيحصل ليه شي،امبارح كان بقول لي انا ما بموت عندي باقي عمر لسة عايز اعيشو
قال لي يا شهد لو كلنا بنقول كدة وبنقرر حنعيش لمتين يبقى ماف زول حيموت ،إنتِ ما مؤمنه بربنا ؟
يلا ي شهد نحن ك مسلمين اكتر ناس متقينين بالموت ومؤمنين بيه وبنتقبله صح ولا لأ؟
انا عارف الموضوع صعب عليك قدر شنو واصعب علي انا لأنه بقى من المقربين عندي مؤخراً ولكن دة قضاء ربنا وإختياراته حنعترض على قضاء ربنا ؟
حاولي ترتاحي يا شهد ،يلا تعالي
لين جات داخله شايله كبايه مويه قالت لي شهد هاك ،سياف شالها منها وشربني شويه مويه وقال لي يلا حاولي تتغطي وترتاحي
ما كنت عايزة افكر في شي ولا عايزة احس بأي شي،كل العايزاه إني اغمض عيني وانسى اي شي
وفي الحقيقة حصل العكس يا ريتني ما فكرت اغمض عيني لحظة،فجأة لقيت نفسي بصرخ وسامعة صوت بقول لي
يا شهد ،شهد افتحي عيونك،اصحي يا شهد...
كنت بقالع وبضرب في صاحب الصوت دة بطريقة هستيرية ولما وعيت لقيت نفسي في الأرض وهو ماسكني وبقول لي سامعاني ي شهد...
رفعت عيني عاينت ليه،قال لي ماف شي،إنت كويسة؟حاسة بشنو ؟خليك مفتحة عيونك سامعاني يا شهد
أنفاسي كانت متسارعة وما منتظمة وهو نفس الشي
قلت ليه وانا ببكي انا كمان حيقتلوني ،انا كمان حأموت زيو..
شهد إنتِ كويسة؟
هموالقتلوه وم حيخلوني انا كمان
كان بعاين لي وهو ساكت..
قلت ليه والله حيموتوني انا كمان ،هم قتلوه قاصدين ما مات ساي،كنت بتكلم وبرجف..
قال لي جسمك سخن شديد محمومة إنتي ي شهد
قلت ليه سياف عاين إنت مصدقني صح؟
قال لي ايوا مصدقك يا شهد
قلت ليه حيقتلوني انا كمان ما حيخلوني
قال لي انا معاك اهدي
مسكت فيه وحضنته...
كنت متعلقة بسياف زي الغريق المتعلق بقشة في نص البحر،ما بتذكر شي غير إني كنت في الحالة دي خوفي ...
