#ليله_في_ديسمبر_35
خوفي بقى م من فكرة وين امجد،خوفي من وجود امجد حالياً وإحتمالية إنه عم عثمان وعمار يرجعو يأذوه بشكل او بأخر ،ودة شي اكيد،وواضح من نبرة امجد انه عارف حاجه بس م قادرة اتوقع هل هو عارف هم شنو بشكل قاطع ولا لأ،وقبل ما استعجل واحكي ليه في حال رجع ضغط علي مره تانيه لازم احاول اعرف هو عارف شنو بالضبط..
................................
السلام عليكم ورحمة الله وبركاته
وعليكم السلام عم عثمان كيفك ياخي اتفضل زارتنا البركة والله
الحمدلله تمام والله يا شهاب يا إبني،وحمدلله على سلامة الشاب دة كمان،الف الحمدلله الربنا جمع بيهو والله مع الجري والمأموريات م عرفت إلا اليوم،وكنت برة البلد كم يوم كمان ان شاء الله هو بخير وسلامة بس؟
والله يا عم عثمان بألف صحة وعافية الحمدلله
وينو هو هسي كدة خلينا نشوفو ونتطمئن عليه ،
في غرفتو غالباً،دقايق بس اشوفو وين
اتفضل ادخل ،ابوي زاتو بشاهد في الأخبار في الصالون ادخل يا عم عثمان
كدة خليني اطل عليه طيب طولت منه انا زاتي..
عمو امجد،يا عمو امجد
اي نعم يا مِنة
بابا قال ليك عم عثمان دة جا يسلم عليك في الصالون بهناك
نعم؟
بابا قال ليك عم عثمان دة جا يسلم عليك ومستنيك في الصالون بهناك
طيب تعالي
رفيدة:امجد شايل منة وماشي وين بنجهز للغداء نحن ما تطلع بعيد
ماشي الصالون ما طالع مكان
اوووووووووووو الباشا امجد،حمدلله على السلامة ياخي حمدلله على السلامة يا ابني
قام عليه وعايز يحضنه امجد مد ليه يده وقال ليه:وعليكم السلام
عم عثمان بي تعابير وش متغيره وتردد سلم عليه ،وقال ليه الف سلامة عليك يا ابني قلقتنا عليك ،قلبنا الدنيا دي فوق تحت م لقينا ليك اثر،الفترة المضت دي كلها كانت عندي سفرات كدة على حدود اثيوبيا فجأة سمعت إنو الحمدلله ربنا جمع بيك الحاصل شنو يا ولدي احكي لي لا حول ولا قوة الا بالله ياخي،شهاب قال لي اتلقيت في ليبيا وجماعة تهريب الوداك هناك شنو يا ولدي وعلاقتك شنو بالناس ديل...
ما عندي علاقة بيهم لا من بعيد ولا من قريب، وحاجتين مفروض انت تكون متأكد منهم تماماً وانا واثق إنك متأكد منهم بس خليني اذكرك بيهم برضو علاقتي بالجماعة ديل،والكلام القالو اخوك عن اختي
اخوك لما اديناه ليها إتخطينا مسألة العمر،وإتخطينا مسألة البُعد ،وناسبناكم نسب مبني على الجيرة والعُشرة،لكن في الاول والأخير في حاجه فاتت علينا ودة غلطنا نحن بنعترف بيهو،وهو اننا نسينا او إتناسينا مسألة الأخلاقيات دي،ما اخدها من الشارع ،ولا لقاها لافة في مطار من المطارات ،اخدها من بيت رجال معززة مكرمة كان يعمل زي ما عملنا وقت سلمناها ليه ويجي يسلمنا بتنا في يدنا وكان قال والله قنعت ساي بدون سبب،ما نفعت معي،مليت،ما دايرها كنت إحترمته بدل القيل القالو عنها دة،ونحن غُلب كدة نهائي ما بتغلبنا ورجعتها حبابها عارف ليه؟شهد دي قبل اخوك كانت عمود البيت دة هو القايم عليها ما نحن الرجال ديل والان هي عايشة هناك براها متحملة مسؤوليه نفسها ومتحملة مسؤوليه البيت دة برضه وطلعتي من الحتة الكنت فيها ديك كانت بسببها تتوقع كلام اخوك ممكن ينطبق عليها؟
إنت عارف وانا عارف إنه دي ما الحقيقة بس يلا يا عم عثمان ما مهم هو قال شنو المهم نحن عارفين بتنا شنو..
