#ليله_في_ديسمبر30
قريت الرسايل بتاعه طارق وما رديت عليه،دة كان اخر باب عايزاه يتفتح وسط كل الأنا عايشة فيهو دة.
أرشفت المحادثة..
رجعت ل رفيدة لأني عارفة هي الوحيدة الحتكون رسلت ليه رقمي وم حأستغرب اذا لقيت عمار برضو مرسل لي كمان..
لما ردت علي قلت ليها بهدؤ طارق رسل ليك و اديتيه رقمي انتي؟
قالت لي اي اديتو وكلمتك انا ي شهد انه قال عايز رقمك
قلت ليها رفيدة ركزي معي حبيبي انا في فترة في غنى عن اي مشاكل تكون اضافيه لحياتي ،لأي سبب من الأسباب م عايزاك تدي رقمي دة لزول غريب او قريب فهمتيني؟
يعني لو عمار قال ليك اديني رقم شهد قولي م معي،لو عم عثمان برضو ردي نفس الرد ،حسام ،ليلى اي زول ليه علاقة بالناس ديل يطلبو منك رقمي او طريقة تواصل معي ارفضي قولي م عندك،ما متواصلة معي تمام ولا مع اي زول في البيت دة
قالت لي انا م حبيت اقول ليك لكن هو فعلاً عمار اتكلم مع شهاب وشهاب وراهو إنك رسلتي وقلتي م حترجعي السودان وأظن سأله من مكانك حالياً هناك وين،سمعتو بحكي لعمتو سميرة ،وسألني فعلاً وقال لي شهد طالما متواصلة معاك م قالت ليك هي وين في امريكا هناك ومع منو و في اي مدينة وكدة قلت ليه ما عارفة وانا ما عارفة م كذبت بس شاكلني وجاط فيني قال لينا بطلو غتاتة والبت خربت بيتها بيدها وكدة إنتو بتساعدوها تتمادى انا بحاول اصلح الأمور بينها وبين راجلها وانا اخوها الكبير وعارف مصلحتها اكتر منها ومنكم...الخ، بعد كورك وجاط قال عايز رقمك قلت ليه تلفوني قافل كهرباء بس،وحسام برضو قال انه خالتو كوثر طلبت منه يجيب ليها رقمك مني ،وانا قلت ليه استأذن شهد الأول واديك ليه ...
قلت ليها عمار سأل من مكاني؟وشهاب قال عايز يصلح الأمور بينا ؟
في اللحظة دي حسيت بالخوف والتوتر
قلت ليها وشهاب قال ليه شنو؟
قالت لي شكلو شهاب قال ليهو حيعرف مننا بإعتبار انك متواصلة معانا وكدة
قلت ليها رفيدة رقمي حتى لي شهاب ما تديه ليه فهمتي؟خالص ما تديه رقمي مهما عمل ومهما قال
اما خالتو كوثر قولي لي حسام شهد رفضت
قالت لي اقول ليه قالت لأ؟
قلت ليها ايوا قولي ليه قالت لأ،هو لما يوصل ال"لأ"دي لأمه هي حتفهم
قالت لي حاضر يا شهد حقول ليه،اما بالنسبة ل شهاب انا اصلاً عندي تلفونين حأقول ليه تلفوني الفيه رقم شهد باظ لمن اصلحو
بعد ما قفلت منها بقيت قاعدة على اعصابي قفلت بابي كويس،ووقفت في الشباك بقيت اعاين حوالين بيتي
هو ممكن يلقاني؟ممكن يكون بفتش علي؟ممكن يكون هنا ؟واذا زي ما قالت ميليسا هو متعمد يخليني اسافر براي وعارف إني ما حأسافر يبقى عايز مني شنو؟
بعد ساعة وشويه الصحفي رجع لي قال لي اسف يا بتي بس كان عندي اجتماع مهم جداً في الصحيفة
قلت ليه انا اسفة لإني اخدتة من وقتك اعفي لي
قال لي العفو ي بتي،المهم ارجع واقول ليك انا معاك للأخر طالما القضية م قضية فردية دي قضية مجتمع كامل وبروحو فيها ضحايا من خيرة شباب البلد يبقى اقلامنا وألسنتنا دي حتكون مسخرة نحارب بيها إلى أن تقوم الساعة
