#ليله_في_ديسمبر29
وانا بقرا في العناوين بتاعه الجرايد حسيت راسي بقى تقيل ،بقرا ما فاهمة وبردد العنوان كم مرة وببكي،بقيت حاضنة الجرايد وبقول ديل هم القتلو امي ،هم حيقتلو امجد،انا عرست زول قتل امي،عشت مع زول قتل امي في بيت واحد،بقيت بتذكر كل لحظاتي من الألف للياء مع عمار،وخالتو كوثر ،طريقة قربهم مني،كلامهم معي واحتواءهم لي كنت بتذكر وانا مشمئزة من نفسي وبمسح على جسمي بيدي وبقول لأ ،انا عملت كدة ،انا وثقت فيهم كدة كيف بس إستغفلوني بالطريقة دي،،لقيت نفسي دخلت الحمام قلعت ملابسي وفتحت الموية وانا بغسل في جسمي بطريقة هستيريه كدة وببكى،وقعدته اكتر من ساعة وانا بغسل في نفسي وكارهه فكره اني في يوم لامست زول فيهم واترميت في حضن واحد فيهم ،اتوضيت وطلعت صليت وبقيت واقعة في المصلاية وببكي،نزلت تطبيق المصحف في تلفوني وقعدت اقرا قرءان وانا ببكي لغاية ما نمت مكاني...
لما صحيت ولقيت نفسي في مكاني وكمية الهدؤ الحوالي استشعرت حقيقة قدر شنو الوحدة دي موحشة لدرجة انه بتحس الكون كله ما بيسعك،الحزن يمكن يكون هو الحزن بس بفرق لما تكون في بيتكم ووسط اهلك من لما تكون وحيد في مكان غريب مافي ولا زول ممكن يحس ب إنك ما كويس من ملامحك من نبرة صوتك من عدم وجودك وسطهم،كل م تبعد من محيط بيتك حتفهم انه البيت م بشكله ولا بمكانه ،بيتك هم اهلك،هم السُكنه والسكينه متى ما كانو موجودين ووين ما كانو موجودين ف إنت ساكن...
رغم إنهياري بالليل الصباح صحيت على واقع اني قدامي طريقين لازم اختار امشي في واحد فيه ،طريق إني اعيش دور الضحيه وافضل منهارة واشيل الليل كله بقى واقرر إنه الحياة ما عادلة معي واتعايش معاها زي م هي،وطريق إني اقوم على حيلي واكمل البديته واواصل للنهايه..
وما بين تفكيري في اي طريق اختار لقيت تلفوني بتصل ،رفعته لقيتها ميليسا قالت لي إنتي كويسة؟
قلت ليها نوعاً ما..
قالت لي مالك؟في شي حاصل؟وصلتي لي شي
قلت ليها ما بس إنتِ الأختك مختفيه انا اكتشفت انه اخوي كمان مختفي عنده سنة وشويه ،انا ما عارفه هعمل شنو
قالت لي شاكة في انه عمار ليه يد في الموضوع؟
قلت ليها حاسه انه الموضوع ما بطلع منه هو واخوه بس جاهله السبب..
قالت لي ضحية جديدة تضاف لملفه الإجرامي،ما تقلقي انا وإنتِ الان على نفس الخط ونفس القضية،كل البقدر اقولو ليك انه عندنا مثل بقول No news ,good news "مافي اخبار،اخبار جيدة"
طالما ماف اخبار عن اي شي سيء حاصل ليه دي تعتبر اخبار جيدة،قضيت 7سنوات وانا بستخدم المثل دة على امل إني حألقى اختي في يوم وحتكون بخير كمان انتِ حاولي تختي الحاجه دي في بالك...
قلت ليها م قادرة اتوقع غير اسوأ الفروض 💔
قالت لي ما تقلقي وفكري بإيجابيه وإعتبريه دافع لإنه تستمري ..
وبالمناسبة حأرسل ليك ملف فيه معلومات عن السيدة كاثرين يمكن تحتاجيها حأرجع اتصل عليك مرة تانيه
قلت ليها اوك تمام
تلقائياً لقيت نفسي بقوم بجهز عشان امشي دار الرعايه...
