#ليله_في_ديسمبر32
FBI?"مكتب التحقيقات الفدرالية"
سكتت مسافة وانا سرحانه في الأنا فيه دة ،كل م احاول اطلع من الدوامه دي بلقى نفسي غرقانه فيها اكتر وم عارفه نهايتها ممكن تكون شنو، لقيتها بتقول لي شهد إنتِ معي؟
قلت ليها ايوا معاك
قالت لي خليك نبيهه في ردود افعالك ،هو ممكن يطلع ليك في اي مكان وبأي شكل من الأشكال،انا عارفة إنك مريتي بفترات صعبة وعشتي حاجات اشبه ب إنها كارثيه وصعب عليك تتخطيها واثرها السلبي بظهر بشكل او بأخر لكن كل العايزاه منك هو حفاظك على ثباتك الإنفعالي وهدؤك تمام ؟والأهم تحفظك التام على معلوماتك العندك..
إتذكرت كلام الصحفي لما وصاني على إني م ينفع اثق في اي زول
قلت ليها حاضر
قفلت منها وانا حاسة بالضيق والكراهيه تجاه عمو عثمان وخالتو كوثر ،لولاهم انا م كنت هنا اليوم ولا كنت هعيش العايشاه دة ،هم ما بس قدرو يحرموني من امي ،هم حتى بعد ما حرموني منها م اكتفو بكدة،اول مره أحس بالكراهيه تجاه زول والإحساس دة ما عايزة اتعايش معاه ابداً
في يوم وانا طالعة على الدار الصباح جاتني مسج في التلفون الرسلتو لي جينيفر مكتوب لي فيها عنوان ،ومحدد لي الزمن الساعة 10ص
إتصلت على مشرفة في الدار ووضحت ليها إني حتأخر ،مشيت للعنوان المكتوب ،المكان كان معرض للرسم ،وفيه ناس كتار ،دخلت المعرض وانا بتلفت يمين وشمال،وبعاين للتلفون ومترددة اتصل في الرقم ولا م اتصل ،كنت واقفة قدام لوحة..
فجأة سمعت زول بقول لي :التردد دايماً بخلي خصمك يكون سابقك بخطوة عشان كدة م تترددي في اي خطوة حسيتيها صح..
إتلفته لقيت واحد واقف وراي ومدخل يديه في جيوبو،قال لي بمعنى اخر العرب عندكم بقولو أعقلها وتوكل..
كان لابس حلق وشعرو طويل ماسكو بي ربطة وعامل وعامل وشم في رقبته ،قال لي الفتاة المطيعة دة إسم اللوحة..
بقيت اعاين ليه..
قال لي تعابير وشك اذا في مصور حريف ونبيه حياخدها وحيعمل منها مميز في وسائل التواصل الإجتماعي..
كمل كلامه ب
" شهد،31سنه،حامله للبطاقة الخضرا ،دخلتي امريكا عن طريق لم شمل ك زوجة ...الخ كمل كلامه وقال معلومات كتيره عني اخرها قال لي قبل عدة اشهر كنتي في مركز.... لإعادة التأهيل والعلاج من الإدمان في نيويورك،
إشتغلتي في قسم العلاقات العامه في شركة...
منفصلة الان📌
إتحرك مشى وانا مشيت وراه طلع طابق كامل ووقف في بلكونه كدة ودخل يديه في جيبو وهو ساكت وبعاين
قلت ليه المعلومات دي مفروض تكون عن الطرف التاني ما انا الطرف المعني شكلك فاهم غلط..
قال لي قبل ما اكون عميل في مكتب التحقيقيات الفدراليه انا رسام ،بهتم بالتفاصيل ،تفاصيل الضحية عندي اهم و قبل تفاصيل الطرف التاني،ما إذا كانت الضحية دي في يوم مدمنة؟كيف أجزم إنك صادقة..
قلت ليه بس دي ما القصة الحقيقية عن تفاصيل إدماني
قال لي التقرير الطبي بقول عكس كدة،المواد المخدة كانت موجودة في فحص الدم الخاص بالتقرير الطبي بتاعك
عايزة اتكلم قال لي:اما بالنسبة لطليقك ملفه من و إلى الان و
نضيف حسب كل التقارير والتحريات الإتعملت عنه ،ما عنده اي نشاط خارج نطاق شغله
ماف سفر خارج امريكا مؤخراً
ماف اي نشاط يشتبه به
معظم مشاركاته متعلقة بحضوره وترأسه لمؤتمرات في ولايات امريكا المختلفة..
تم تكريمه الإسبوع السابق من قبل المجلس الأمريكي للطب الباطني ك افضل جراح للعام ،قام بعمل عمليه فصل توأم منفصل بأعلى الرأس وإستغرقت العمليه 73ساعة متواصلة،وإتعملت معاه مقابله تلفزيونيه في برنامج معروف ،غير إنه مؤخراً قام بالتبرع باجراء عمليات عديدة دون مقابل..
طليقك الأن في قمة نجاحاته،حيكون المريب هو إدعاءك وإتهامك ليه بالطريقه دي ،قد يكون الأمر متعلق بتصفية حسابات او محاوله لتشويه صورته،او محاولة إغتيال لشخصيته او،او ،او...
