#ليله_في_ديسمبر28
كنت بحاول اصدق كلام رفيدة البتقول فيه ده او بحاول استوعبه،معقولة دة عمار الأنا شاركته بيت واحد ؟
معقوله دي نفس الشخصية العشت معاها ؟
السؤال الوحيد الما قادرة اتجاوزه هو ليه عمل فيني كدة؟
شهد إنتِ معي؟
شهد
حسيت على روحي لقيت رفيدة بتتكلم معي لسة قالت لي اها جايه متين طيب ما وريتيني واجلتو السفر مالكم احكي لي لانو كلنا منتظرين؟
لقيت نفسي بفكر لو حكيت لرفيدة بتفاصيل الحاصل معي دة كله من الألف للياء اكيد رفيدة حتحكي ل عمتي وبابا ،وهم اصلا مهمومين ومشغولين بإختفاء امجد انا حأبقى عليهم هم زايد لو وريتهم ،وهم كدة كدة لسة مرسومة في مخيلتهم صورة عمار الأولى ف ما عايزة اقلق بيهم ابداً واحكي ليهم حاصل معي شنو لغاية ما ارجع السودان وانا في كل الأحوال حأرجع ما عندي شي بقعدني هنا لكن حأمشي اواجه عمار واهدده بالشرطة في حال م وراني امجد اخوي وين وعملو فيه شنو هو واخوه،حتى لو حيرجع يعمل فيني العملو قبل ما حأتردد في اني امشي وقبل ما امشي حاتصل على الشرطة وحأبلغ عنه يعني ما حيفكر يعمل فيني شي لو قلت ليه انا بلغت الشرطة عنك قبل م اجي هنا...
دة كان تفكيري بيني وبين نفسي..
فجأة باب الغرفة دق،في البدايه حسيت بخوفه كدة قلت ليها رفيدة دقايق برجع ليك،
بقيت واقفة في مكاني ف سمعت صوت الباب مره تانيه وبعدها سمعت صوت بقول لي خدمات الغرف..
مشيت على الباب وفتحته..
كانت بت قالت لي خدمة نظافة الغرف،بعدها دخلت وقفلت الباب بسرعة،اتخلعت في اللحظة دي وجسمي برد..
قالت لي إنتِ شهد؟
بقيت اعاين ليها بخلعة،كانت لابسة لبس الموظفين فعلاً
قالت لي ما تخافي انا ميليسا،انا هنا لمساعدتك ارجوك ما تخافي..
"المحادثة بيني وبينها بالإنجليزي مترجمة للدارجي بتاعنا"
رجعت منها ورا قلت ليها عايزة مني شنو منو ك؟ اطلعي من هنا قبل ما اصرخ واطلب امن الفندق
قالت لي ماف زول مرسلني انا هنا بغرض مساعدتك فقط
قلت ليها ما بعرفك وم عايزة مساعدة
قالت لي عايزة انبهك على نقاط كتيرة فايتة عليك بخصوص زوجك ،اولها إنه هو عارف انك ما حترجعي دولتك وحتنزلي من الطيارة، لو كان حريص على رجعتك كان سافر معاك هو بنفسه ،لكن عنده هدف وراء الحاجه دي...
سألتني معاك تلفون؟
لسة انا بعاين ليها بخوفة كدة،قلت ليها بصوت عالي إنتِ منو وعايزة شنو وبتعرفيه من وين اصلاً؟
قالت لي حأفهمك بس لمصلحتك جاوبيني عمار مخلي معاك تلفون؟
هزيت ليها راسي ب نعم
قالت لي لازم تتخلصي منه الان،التلفون دة هو مخليه معاك عشان يتعقبك بيه والان هو حيكون عارف بتواجدك هنا،وهنا دي انا بقصد بيها الفندق دة والغرفة دي بالتحديد..
بقيت اعاين ليها..
قالت لي والدليل على انه عارفك ما حتسافري افتحي الشنطة حتلقي المبلغ المخليه ليك كبير جداً صح ولا لا؟
فعلاً عمار كان مخلي لي قروش في الشنطة وم بسيطة ابداً
قالت لي يلا نطلع من هنا وخلي التلفون في الغرفة دي حأساعدك في شراء واحد جديد..
بقيت مترددة ما بين اسمع كلامها ولا لأ..
قالت لي رجاءً حاولي ما تفكري الان ماف وقت يلا نطلع من هنا..
خليت التلفون في الغرفة وطلعت معاها
نزلنا طابق تاني قالت لي انا حجزت غرفة تانيه تحسباً ،وقفنا قدام غرفة كدة ودخلنا وقفلتها علينا
عاينت لي لقتني متوترة قالت لي ما تتوتري ارجوك انا عارفة انه طريقة دخلتي عليك مسببة ليك نوع من الخوف لكن انا هنا ما عشان أأذيك بأي شكل كان ولا عندي مصلحة في كدة...
وقفت في شباك الغرفة وقالت لي انا ميليسا من إيطاليا،عمار في فترة ما كان على علاقة مع اختي التوأم، كانت خطوبتهم رسمية ،اختي كانت طالبة ناجحةومتفوقة وجميلة،وزكية وكانت صغيره 25سنة طلعت لي التلفون وبقت توريني الصور بتاعتها وكملت كلامها ب كانو على وشك الزواج وإختلفو لأسباب اختي رفضت تفصح عنها بشكل مباشر ،وبسببه وضعها ساء للحد البقت فيه ما بتطلع من البيت وبترفض مقابله اي شخص ،كانت بتنوم بالمهدئات وبتجيها نوبات اثناء نومها،انعزلت عن العالم كلياً وكانت بترفض تقابل اطباء لمساعدتها..
يوم ما قررت تطلع من البيت طلعت بكامل وعيها واتصلت علي مكالمة وقالت انها قررت تواجه مخاوفها ومسافرة امريكا عشان تقابل سيدة اسمها كاثرين،لما سألتها منو كاثرين قالت الشي الوحيد العارفاه انه هي الوحيدة البتقدر تساعدها...
وقتها ما فهمت هي بتقدر تساعدها في شنو لكن فهمت انها متورطة في شي ودة سبب حالتها الوصلت ليها دي..
بقت ساكته مسافه..
قلت ليها وحصل شنو؟
قالت لي دي السنة السابعة واختي ما ليها اثر من وقتها
بقيت اعاين ليها بخلعة..
قالت لي اخر امالنا بقت في المشارح والمستشفيات من 7سنة ونحن لغاية اللحظة بنفتش عليها ..
بقيت بفكر في امجد ممكن يعملو فيه نفس الشي اذا عمو عثمان وعمار ليهم يد في الموضوع؟
دموعي جات جاريه..
قالت لي من وقتها وانا بفتش ورا عمار ،وعلى علم بكل تحركاته وخطواته ،حياته بيرفكت جداً للحد الما ممكن يكون فيه تجاهه شكوك ابداً،انا على علم بكل تفاصيل حياتكم ،وعلى علم بالإتعمل فيك بس ما بتقدري تثبتي عليه شي رغم معرفتك الحاليه ب إنه شغال في مجال الإتجار بالبشر ،وبالمناسبة هو ما بس بتاجر بالبنات والأولاد كمان،الفكرة الأساسية بتتلخص في انهم بساعدوهم بالدخول لأمريكا بطريقة غير شرعية بعدها بتم ابتزازهم وبستخدموهم لأغراض خاصة ك قتله متسللين وموزعين مخدرات وغيرها من الأغراض،اما البنات ف بتم استخدامهم في مواقع الإتجار بالبشر لعصابات بتستخدمهم لأغراض مختلفة واغلب الحاجات دي بتتم اونلاين في المواقع الممنوعة زي الدارك ويب وغيرها من المواقع الخفيه، هو جزء من الشبكة دي،يعني م عنده تعاملات ملموسة على ارض الواقع مع اي مجموعة إجراميه...
قلت ليها سبب معرفتي الحقيقة كانو 20بت طلب مني اختارهم على انهم مبتعثات يعني خلاني اكون جزءمن شغله القذر،وانا شفتهم بعيني في شيكاغو دة دليل كافي ضده صح؟انا ممكن امشي افتح بلاغ واشهد ضده واساعد الشرطة بالتاريخ بتاع مشيتنا ل شيكاغو ،ممكن يتأكدو من المعلومة دي من تاريخ رحلتنا للمطار وممكن اديهم تفاصيل المطعم الإتلاقينا فيه مع البنات واكيد كاميرات المراقبة في كل المكان ممكن تتراجع عادي بالتاريخ واليوم الزمن وحتى المطعم اكيد حيكون مدعم بكاميرات مراقبة ممكن الشرطة تستعين بيها وبكدة حيطالبوه ب انه يوصلهم للبنات اذا كانو فعلاً مبتعثات وموجدات ولا لأ وكدة حيثبتو عليه التهمة لأنو ما حيقدر يجيب البنات...
