ما بعد النهايه ✈️ - مكتملة

الفصل الثامن عشر

- انا ..

قالتها رؤي و قد غزت الحمرا وجهها بالكامل .. لا تعرف بما تجيبه .. كان بداخلها يتراقص بسعاده فهي لا تنكر انجذابها نحوه رغم انكارها للأمر دائماً .. وزاد قربهم من ذلك الانجذاب ايضاً ..

ضحك سفيان و هو ينظر حوله : هو مفيش حد غيرك يعنى .. فاكيد انتى .. و حتى لو في .. انا مش عايزغيرك ..

لم تنطق بكلمه ... من هذا ؟ .. أهذا سفيان الذي ظل أكثر من عام لا ينطق بالسلام لها .. و كأنه قراءه أفكارها ليكمل كلامه : انا اسف فعلاً على الطريقه الى وقفتك بيها .. بس للأسف انا مش ضامن اني أقدر أقولك نفس الكلام بالثبات ده مره تانيه .. و مش هستنى لما تضيعي مني يا رؤي .. فللأسف انتى مضطره تردي عليا دلوقتى و تقوليلي قرارك ..

اجابت عليه بتلعثم : بس انا .. يعنى مش هينفع دلوقتى ارد عليك .. محتاجه وقت افكر .

تنهد و هو يحك رقبته بيده بينما اكمل : عابد كان بيقولى انى شكلي مفقوس اوى .. و انتى عارفه عني كتير .. يعنى اعتقد تقدرى تردي رد مبدئي حتى .. يعنى يا اه يا اه ان شاء الله بردوا ..

ضحكت بخجل و هي تحاول ايجاد الرد المناسب .. كان ينظر لها بنظرات هائمه كان يكبحها دائماً .. قالت بعد تفكير : بس بابا و ماما مش هنا و انا يعنى ..

- حلو نكلمهم ..

سحب الحزام الخاص بمعطفه الابيض .. قام بصنع حلقه منه وضعها فى يدها بينما قام بلف باقى الحزام على يده و هو يجذبها قائلاً : يلا بينا ..

قالت بين ضحكاتها فالامر برمته يحدث بسرعه جعلتها تعجز عن التفكير : استنى بس هنروح فين .

- اقرب كافيه علشان نقعد نكلم أهلك و نشوف هيجوا امتى ؟ .. ما انا مش هستنى اتجوز مع بنت عابد شكلي وحش ترضيهالى ..

ضحكت على كلماته و هي تقول : طب انا بعرف امشي لوحدي على فكره .

- وانا مبسوط  كده ..

ابتسمت له وسارت تتبعه بينهما ذلك الرابط الخاص الذي صنعه هو ..

خلال الاسبوع اللاحق لتلك الاحداث .. جرت الامور سريعاً .. فقد حدث سفيان والدي رؤي عدة مرات و اعطاهما كل المعلومات عنه و كيفية التأكد منها .. و جعل سجي تكلمهما ايضاً .. فهي عائلته هنا .. و مع الحاح رؤي عليهما بالطبع دون معرفة سفيان بالأمر خضع والداها اخيراً لرغبتهما فى أعلان خطبه مؤقتاً بخاتم بسيط .. حتى يحضران من مصر فى اجازتهما المعتاده و عندها يقومان بعقد القران .. بعد الاختبار النهائي بالتأكيد .. فهو لن يعطي ابنته لأي أحد لكنه يثق بها و بأختياراتها .. كما انه ولاول مره يري الرغبه واضحه في عينيها تجاه شئ ما او شخص ما فطالما كان شغفها الاول و الوحيد هو عملها و دراستها .. و الان وحيدة قلبه تحب ..