يشبهني ولكن

روحي تحبك

ٲون والون تلف صوتي.. ونبراي
عله ذاك الي مشه برايه.. ونبراي
انتهت وياك خل نكعد.. ونبري
الذمم والكاتبه الله يصير اليه.

انام احلم بيك اصحى كل شي يذكرني بيك
اهلي وديرتي مرايتي شنسه منك دمي اليجري بجسمي نفس دمك لون عينوني ورسمت وجهي تشبه وجهك طولك مشيتك جنها مشيت ابوي وأبوك
ضحكتك ونبرة صوتك شايل مثلهن اخوي ابن امي وابوي
شريط طفولته كل ثانيه ينعاد لعبنه ولكمتنه من نتقاسمها سوه
اتذكر من نلعب ركيضان واوكع يجي يركض يمد ايده ويكومني وينظف دشداشتي من التراب ويحظني ويكلي يالله صيري سبعه مثل إخلاص توكع وتكوم الحالها
وإذى جاهل ضربني لو ضرب إخلاص
مايعوفه بذاك اليوم إلا وهو ماخذ حقنه
وأكثر من حقنه
من تصير زكريا  ومن يجي العيد نلتم كلنه ابيتكم
نحتفل بيوم زكريا كل طفل شايل دنبك كلها ادك بس انت متقبل تكول ماأحب الدنبك
وانت تخلينه ناكل ونشبع من الحلويات وتأشر الإخلاص إخلاص تشاورنه تكول احنه كلنه حالتنه زينه خلي نظم الحلويات للجهال الحالتهم ضعيفه تروح وتجيب علاليك وتخلي اوارق بنصهن كل علاكه اسم شخص وتكول ولكم ذكروني اخاف نسينه واحد من ربعنه
ومن نذبح احنه وأهلك ضحايا بالعيد هم تكول خلو البيت فلان والبيت فلان حصتهم خطيه ايتام
ومن نداوم بمدرستنا المختلطه توزعهن الطلاب ياعيني فرحتهم تسوى الدنيا هذا اليكلك شكرا وهذا اليبوسك واني كالعاده وراك وراك مثل ظلك بالمدرسه بالبيت ما افاركك ولا افارك إخلاص امي وابوي ملو مني يسحلوني سحل للبيت وارد انهزم واجيكم
اكثر الايام انعس واغفه يمكم لو يجون يشيلوني لو تكللهم امك خطيه نايمه عوفوها
لتجفل طبعا اول مااغفه وتجي إخلاص تنام يمي عالواهس تجر انت الباطنيه وتغطينه
عمتي الصبح تكول ولجن بله غطه وبله فراش تنامن عالزوليه من الوكاحه واللعب تذبن روحجن خلف الله على ضياء يغطيجن
عمي يصيحله ضياء لان حلو وابيض حيل
حنين وصاحب غيره مايغث بشر ولا يغث الكاع من يمشي كان من يشوف طفل بالمدرسه هدومه مشككه يروح يلملم من ملابسه وأحذيته وينطيها مايخلي ملابس الروحه غير شي قليل وتظل عمتي الحجيه تصيح
ولك ليش هيج كنتورك فارغ مو ابوك يحير يجيبلك متجوز من سوالفك وك يمه انطي مايخالف الك اجر بس مو تخلي روحك بله هدمه تلبسها هذا مو اخوك كنتوره مليان ويضم بغراضه
عمي يضل يضحك يكللها عوفي مالج غرض
اني. اشتريله الجمعه أخذه ويدلل
عمي عنده أصدقاء ابغداد يرحون يتسوكون منهم مرات يتغدون يم واحد منهم مرات بالمطعم اني واخلاص نكله ضياء عفيه جيبنه العاب وحلويات كل نزله البغداد لازم انغرمهم
يجون محملين ونفسيتهم مرتاحه
إخلاص تظل تبجي من يرحون تريد تروح وياهم
ومن يرجعون هم تنصبها مناحه ليش ماخذتوني وعمي يسولف شلون ضياء لعب ويه جهال صديقه وشلون بناتهم اولدهم حبابين وهادئين
واني اظل احمس بروحي ما ادري ليش
واخلاص تكمز يكللها عمي الطريق طويل انتي يصير عندج لعبان نفس ودوخه من تصعدين بالسياره
اظل حاير بيج بسج عاد سطرتي روسنه