الكاتبة في روايتها (باللهجة الجزائرية)

✨كيفاه حتى لحقت لإيطاليا بلا فيزا ✨

بدات تحل عينيها بشوية والدوخة لي كانت غامتها لوحد الدرجة خلاتها حبت تتقيا... كانو يديها ورجليها محكومين بحبل تع الكباش ... فمها لي كان مغلف بكتانة وفيها ريحة قاوية تع دوا... شافت لليسار امبعد لليمين لقات روحها فلامال تع كاميونة صغيرة وحدهاة... وكان اونفاص ليها راجل مسلح ولابس كلشي كحل ... جبدت رجلها شوية بش تلحقلو وتضربو... كي ضرباتو ناض نوضة تع الواليدة كي تديها عينها فالعصر😂💔 رفد سلاحو عليها وهي جبدت روحها للور وتسيي تهدر مالغري الشيفونة ... شعرها كان مشنشف والمكياج لي ساح على وجهها بالكامل مع قشها لي كانو موسخين ... فهم داك الراجل بلي راهي حابة تهدر دونك قربلها بخطوات وهو شاد فالتوا تع الفورغونة بيسك كانت تتمشا ...نحالها الشيفونة بش تهدر

كاميلا : برحمة الوالدين لي جابوك للدنيا هادي ! قوللي شحال مادوشتش ؟ 

عقد حواجبو بش يبدا يتمتم بكلمات حتى هي مافهماتوش مي عرفت اما اللغة بش ترد عليه بأونجلي كاسي 

كاميلا :in the peace of your parents ! how much time have you not taken a shower ??اعمي الطوبا لي راهي معششة هنا اي ماتت ! 

سكت لوخر وراح يرفد يده بش يرجعلها الكتانة ... تبانيكات كاميلا حتى قالت بصوت عالي 

كاميلا : حبس ! حبس !!!وش راكم حابين من عندي ؟ ماتقوليش مفاجأة من أسماء برك ؟ راهي مشنشفتلي راسي كي الدجاجة !! قولي برك وش راكم حابين !! راني ماعندي فرنك !! الخدمة ومانخدمش

تنهد لوخر بش يرجعلها بالجزايرية ... 

: مي شحال تهدري ! هنا تبان بلي جزايرية تع بصح... ماعلابالنلش وش راه حاب البوس من عندك... كي نلحقو وتعرفي ... الحاجة لي علابالي بيها بلي ماراحش تطولي هنا 

حطت كاميلا راسها... حكمتها الفشلة فهمت بلي راهي بين سدين مافيا ... بصح كملت تهدر بدون اي امل 

كاميلا : قولي برك وين رانا ؟ 

خزر فيها بش ينطق بالطليانية 

 :benvenuto in Italia

...

كانت تتمشى  فكولوار ظالم و زوج رجال مسلحين يهدرو بيناتهم بالايطالية  قاعدين يجرو فيها ...الفكرة انها فايطاليا مابغاتش تدخل لراسها ...والمليحة قاع رايحة تقابل رئيس تع مافيا...

حبسوا !!!!ماعرفتكمش علييه !!!!

;

كيما كل شخصية فرواية كان قاعد فالبيرو تاعو الدخان والعمبر والمناظر الباردة...تلقاه قاعد بكل بروود يمد اوامر 

ني نتمسخر برك ...

لودوفيكو ... البطل تاعنا ...ايطالي باصول جزائرية ... ورث من عند باباه المنظمة ...طويل ...شعر وعينين كحلين كيما لون تع الظلام ...المهم شباب بوقوص 😌🤍معندناش الحق نهدرو عليه تغير عليه المدام😂

والمفاجعة انو ماكانش ني فالبيرو يخدم ولا يتريني ولا يعذب فالناس...كان في الوتباد يا إخوة🌚💔 نفهمكم القضية ...كاميليا خمسة وعشرين سنة ني خدمة ني زدمة ... وحد النهار اكتشفت تطبيق اسمو واتباد ...وشني دا الواتباد ؟ تطبيق وين الناس يعبرو عن افكارهم ويسمحو بخيالهم فعالم وااسع وكبير... كاميليا كانت تحب الكتيبة وعندها مخيلة كبيرة ... علابالي تقولولي وش دخل هادي فهادي... كاميلا هي من الكاتبات المعروفة فالواتباد ... كونها كتبت بزاف روايات توالم المراهقات...الرومانسية والدارك رومنس سوغتو... وهنا تبدا القضية ... عادة ماتكون الدارك رومنس انو البطل هو صاحب منظمة ولا مافيا ... وكاميليا كي كانت تكتب كانت تعطي حقائق واسرار عن المافيا ... ولهذا بعد ماكتشفو احد جواسيس لودوفيكو كان لازم عليه يعلم البوس تاعو بلي كاين اشارة حمراء... وهادي هي علاه دكا راهي قاعدة مقابلة ليه ...وي فاص افاص ... 🌚✨

to be continued ....

ارائكم ؟🌚✨