البنات بدو يصحو وينزلون تحت
رنا وهي تحك عينها وشعرها نافش:كم الساعه
جلست على الارض بأهمال
جود :اربعه العصر
ام كادي اخذت المشط الي جنبها وجلست تمشط شعر رنا وتجدله
دخلت ميعاد وهي نفس حاله رنا:بنات ضهري متكسر
رنا لفت على ام كادي بعد ما خلصت:يعطيتس العافيه
توجهت ميعاد وهي تدز رنا وجلست مكانها وام كادي جلست تمشط شعرها وتجدله وبدت تقصد :
يبنياتي عسى عمركم طويل
ويبنياتي عسى يومي قبل يومكم
يبنياتي عساني كل يوم لشعوركن جديل
يبنياتي تعالن اقصد بكن
مالي غيركن يابناتي تعالن
ميعاد ماقدرت تمسك دموعها وهي تحط وجهها بين رجولها وتشهق
فزت اريج وراحت لميعاد
حضنتها وبكت بحضنها:ربي يخليها ليا يارب
الكل:امين
رنا :ميعاد خلص امسحي دموعتس واطلبي حلا نبي نتحلى
مسحت ميعاد دموعها وفتحت جوالها تطلب حلا
رياض دق على رنا
رنا:هلا رياض ...............صدق ...بس بكرا جامعه؟.......اها طيب طيب بقول للبنات......مع السلامه
لفت عليهم رنا:بنات ام علي عازمتنا كلنا عندها في البيت وتقول انها عازمه ام صقر والبنات يعني بتكون حفله هناك
جوري:ما قال لتس ليه عازمتنا؟
رنا:الا قال لي يقول ولدهم امس قال عشاكم بكرا علي ولزم علينا نجي كلنا
روان:طيب مدرستي وجامعتكن؟
رنا:يقول ما نتأخر حيل من نتعشى نسري
ميعاد نطت:اجل وش تنتضرون امشو نتجهز
اريج:ميعاد الله يهديتس نتجهز الساعه اربع
روان:مو انتي كنتي تبكين وش صار عليتس
رنا:ميعاد انفصامها قوي تري هههه
ميعاد:خلي عنتس الانفصام وقومي افتحي الباب للمندوب
رنا:يمه مسرع وصل
ميعاد:ايه المحل قريب من هينا وترا دفعته بس روحي خوذيه
قامت رنا وحطت شيلتها بدون عبايه(بحكم ان جلابيتها ساتره)قبل لا تفتح الباب سمعت صوت تركي لفت وشافته واقف
تركي بحده:ادخلي داخل
رنا سفهته وفتحت الباب واخذت الطلب ولفت وشافت تركي يبتسم بسخريه
مشت من عنده بس وقفها ومسك يدها:وش الي سويتيه قبل شوي؟
رنا:رحت استلمت الطلب
تركي:لا والله طالعه بدون عبايه ليه؟ومو قلت لتس لا تطلعين قولي لي انا اطلع؟
رنا وهي تسحب يدها:مالك شغل فيني منت اخوي ولا زوجي ولا ابوي
تركي بعصبيه:رنا لا تجنني طالعه تسذا وما تبيني اتدخل؟
رنا دمعت هي ما تحب احد يصرخ عليها:تركي فكني
تركي انصدم من دموعها وما عرف وش يسوي فكها وكانت بتروح بس توجه لها وحضنها من ورا ودفن وجهه برقبتها:اسف والله اسف لا تزعلين
رنا كش جسمها وهي تحس بأنفاسه
رنا بصوت متقطع:فف...فكني...تركي فكني
فكها تركي وهي توجهت ودخلت
روان بصرخه:والله لو تبين تفكين قضيه فلسطين امداتس وش هالتأخير ست رنا؟
رنا ما ردت عليها وحطت الحلا على الطاوله وجلست بشرود
ميعاد:وش هالسكينه الي نزلت عليها؟
اما رنا كانت تعاتب نفسها ليه ما هاوشته ودمعت ليه (لسانتس وين راح هاه؟خليتيه يارنا يشوف دموعتس )
جوري الي كانت رايحه للمطبخ وشافت كل شي صار راحت لتركي
تركي:نعم نعم وش تبين
جوري:نعامه ترفس مصارينك قل امين امش قدامي اعصابي متفلته
تركي:فلتيها عليتس مالي شغل انا
جوري مسكته من عند شعره وجلست تجره
تركي بألم:جوري وصمخ خلي شعري
جوري سفهته لما وصلو حمامات الرجال فلتته
جوري بعصبيه:وش الي سويته سودت وجهنا الله يسود وجه العدو
تركي:وش سويت قولي لي
جوري :الي سويته مع رنا وش تسميه؟؟؟
تركي طارو عيونه:شفتي كل شي ؟
جوري :لا والله هاذا الي هامك
تركي بقله حيله:جوري لا تلوميني وربي حبيتها من قلبي حب طاهر
جوري:تركي لا تجنني طاهر وانت حاضنها من ورا؟؟؟؟؟
تركي بحياء:جوري لا تحرجيني ياخي
جوري طارو عيونها :هاذا وقت الاحراج؟؟؟ما اشوفك انحرجت من نفسك من ربك ما اشوف تنحرج مني انا ؟
تركي:ياخي ما ابيها تزعل الا زعلها يا جوري ما اقواه
جوري:خلك من زعلها الحين تروح تخطبها من اهلها واذا رفضو احسن بعد
تركي:ليه اخطبها لسى انا صغير
جوري:على الاقل تحسن صورتك عندها وتعرف انك تحبها على قولتك حب طاهر
تركي:زين زين بخطبها مع اني عارف انهم بيرفضون
جوري:يلا دبر حالك انا بروح اتكشخ ما بقى عن المغرب شين
راحت جوري وشافت جود طالعه
جوري:جود وين رايحه تكشخي عندنا
جود:هاذي قولتكن بس بروح اجيب لي فستان واجي
جوري:ايه زين
راحت جود ودخلت جوري ورقت فوق ودخلت على البنات كلهم مجتمعين كعادتهم بغرفه وحده وحاطات اغاني والي تفير شعرها والي وترسم ايلاينر والي تحلطم من ضيق الفستان
جوري:بنات فزعتكم
روان:وش
جوري:شعري عيا يضبط ابي وحده تسويه
روان:تعالي انا اسويه لتس بس وشلون تبينه؟
جوري:الي يعجبتس
روان:اي عاد شعرتس كل شين يضبط عليه
جلست جوري وبدت روان تسوي شعرها
رنا لفت على كادي:كوكو
انفجرت ميعاد ضحك:كوكو مره وحده
رنا دزتها:انقلعي وش دخلتس ولا غرتي
ميعاد:عشنا انا اغار من قال
كادي:هلا
رنا:شوفي اخر مره والله
كادي بضحكه:وشو اخر مره وش تبين
رنا:ابيتس تسوين شعري كيرلي ادمنته على يدينك يجنن
كادي:ابشري اسويه لتس بس وين الكريمات
رنا سحبتها:امشي ابي اغسل شعري بالشامبو هذاك وانتي روحي جيبي الكريمات
حطت كادي الشيله على راسها وطلعت ورا رنا
طقت باب غرفه عبدالله بس محد رد توقعت محد موجود ودخلت وشافته نايم
قالت بهمس بس سمعه عبدالله:هاذا كل ما شفته يطلع نايم
توجهت للتسريحه
ابتسم عبدالله وقام بجسمه العلوي:شكلك تبين تشوفيني وانا صاحي
شهقت كادي وهي تناضر له من المرايه وفهت بملامحه الهاديه
عبدالله:ادري اني حلو بس عيب عليك استحي على وجهك
كادي بعصبيه لفت عليه:انت يالقرد الحول حلو هه ضحكتني تقول حمار لابس نضارات اقول كمل نومك يخيشه النوم
طلعت وصفقت الباب وراها وضحك عبدالله :اكلتني بقشوري
رنا طالعه من الحمام وشعرها ينقط ومدنقه وشافت كادي طالعه من غرفه عبدالله معصبه :كادي وش فيتس؟
كادي بنرفزه:انتي روحي جيبي الكريمات مالي شغل انا
دخلت غرفه البنات وجلست تتجهز
جود دخلت عليهم :بنات جبت اكثر من فستان مدري وش البس شوفو
اريج لفت وجلست تعطي رايها:انصحتس بالفستان الاصفر ذا
جود مسكت الفستان:ايه هاذا اصلا عاجبني منزمان
جود اخذت فستان احمر وفيه فتحه بالصدر وعند الركبه وضيق ومدته لاريج:اريجي جربي ذا الفستان جبته عشانتس احسه يلبق عليتس حيل
اريج :لا وين عادي عندي فساتين
جود بأصرار:اريج خوذيه تكفين بعدين تقوين ترديني؟
اريج :ما اقوى اردتس والله بس..
قاطعتها جود:لا تبسبسين روحي البسيه وانتي ساكته
اخذته وراحت الحمام تلبسه وبعد مده طلعت
شهقو البنات
رنا:وش ذا الزين والله انتس غطيتي علي
جوري بغرور:طالعه تجننين بس محد يغطي علي مثل ما تعرفون
روان:والله ما يسكتني الا ان معتس حق
جوري نطت عليها:روان احبتس واحب تعزيزتس
روان ضربت صدرها:اعجبتس
تجهزو البنات
كادي كانت لابسه فستان ابيض فيه نفشه وقصير شوي وضيق على الجسم وضيق من الخصر وحاطه مكياج شوي ثقيل وكعب ابيض وشعرها مسويته ستريت ورافعه خصلتين لورا وطالعه تهبل
