رفع عيونه على الي جلست بتعب
كادي قبل لا تكمل كلامها انتبهت للي جالس وبحركه سريعه نزلت الشيله على وجهها وقامت واخذت شنطتها وركضت ركض لفوق
عبدالله:توها تقول تعبانه وما تبي ترقى وش صار ههههه
عند كادي دخلت وسكرت الباب وراها وهي تتنفس بسرعه وحاطه يدها على صدرها جلست على طرف السرير
كادي:يمه بسم الله اهدي اهدي ما صار شي ما انتبه لك اهدي
جلست تهدي نفسها
_________
عند وجدان كانت طفشانه حيل ونزلت لأمها
وجدان:يمه ودي اروح البقاله عادي؟
حنان:ايه عادي خوذي صرافتي
وجدان؛لا معي فلوس
اخذت وجدان عباياتها ولبست نقابها وطلعت
كانت وجدان بتدخل البقاله لولا صوت يناديها من ورا:لو سمحتي
لفت وجدان عليه وجى هو يركض:محفضتك محفضتك طيحتيها
ناضرت وجدان بعيونه ومدت يدها وحط الرجل المحفضه بها وقبل لا يصد التقت عيونهم لقاء كاتبه ربي يصير لفت وجدان :بسم الله
دخلت البقاله وتفكيرها شارد
_________
رياض :انزلي يلا ودقي على لا خلصتي
ميعاد نزلت:طيب
دخلت ميعاد الكوفي وجلست على احد الكراسي نادت النادل ومسكت شنطتها تطلع كتابها
سعود من شافها مسك المنيو وراح على طول لها
سعود:وش طلبك ؟
ميعاد وعيونها بالكتاب:واحد لاتيه لو سمحت
راح سعود وعلى ثغره طيف ابتسامه وجلس يسوي الطلب
____
رياض:وين تبون انتم؟
رنا:ودنا اي مول به ملابس
رياض:تستهبلين حددي وش تبن
جوري:ودنا مول ال.....
رياض:تبشرن
تركي لف على جوري:وش رايتس انزل معكم؟
جوري:تنزل وش تسوي؟
تركي:اهيت مع الهايتين
جوري:اقول اهجد بس
تركي:لا صدق تكفين خليني انزل معتس والله طفشان
جوري:منت صاحي تنزل وشوله بعدين رنا ما تاخذ راحتها
تركي:رياض ينزل بعد
ولف على رياض :صح ؟
رياض هز راسه:اي نعم انزل
جوري:لا اقول اهجد محدن نازل حنا نتغرض للعرس ونجيكم خلص
تركي :جوجو تكفين عشاني والله طفشانه
جوري:اقول منت نازل خل عنك السوالف الي ماهي زينه
تركي:قوطي ترا اصرعتس ابي انزل لا تخليني اوريتس العين الحمرا
جوري قربت منه:وينها وينها يلا ورني
تركي:اوف منتس تكفين خلص بنزل معكم
رنا مسكت كتف جوري:خلص جوري خليهم ينزلون
جوري ناضرت رنا بطرف عين وبعدين لفت عليهم:بشرط
تركي:كفووووو والله انتس كفو
جوري:بشرط انكم تروحون مكان وحنا مكان مالكم شغل فينا ولا لنا شغل فيكم
تركي:اي هاذي هينه نقدر عليها
رياض وقف السياره :يلا انزلو
_____
ميعاد رفعت ناضرها على الي حط الصينيه
ميعاد:عفواً اخوي انا مو طالبه كروسان
سعود ابتسم :اعرف بس هاذي هديه من المقهى تجي للزبون الجديد
ميعاد رفعت حاجبها:بس انا مو جديده
سعود:انتي قبل فتره جيتي ونسيت اعطيك اعذريني
ميعاد:من متى وانت تعطون هدايا للجدد؟
سعود:من فتح فرعنا وحنا نعطي
ميعاد :لا تحرج نفسك باشياء مالها داعي انا اعرف الكوفي هذا من زمان ما عمره قدم هدايا للزباين
ونزلت عيونها على الكتاب:خذها من عندي
عض شفته بقوه من الاحراج واخذ الكروسان وسحب نفسه
اما ميعاد كانت تقرا بهدوء ولا كأن شي صار
_______
روان:عزوز
عبدالعزيز:هلا
روان:شرايك نطلع البر؟
عبدالعزيز:والله ياروان مالي خلقه بس اذا ودك نروح ابشري
روان تكت على الدريشه:لا خلص
عبدالعزيز وقف السياره ولف عليها:روان اذا فيك شي قولي لي تراني اخوك ولا بعد توأمك يعني احس فيك اكثر من اي شخص ثاني
روان لفت عليه والدمعه بطرف عينها:خلها على الله وخلها وسط قلبي ياخوي تحرقه
عبدالعزيز:لا لا هاذا اكيد شي كايد وش صاير
روان:عبدالعزيز ما ابي اضيق خلقك ولا اضيق خلقي ابي الحين اتمشى وافكر احتاج بهاذا الوقت اني اتكلم مع نفسي اكثر من اي شي ثاني
عبدالعزيز:طيب براحتك بس لو تبين تتكلمين لاحد لي انا اول شخص تجيني توعديني؟
روان:اوعدك
عبدالعزيز:احلفي
روان:والله
عبدالعزيز حرك السياره:والله ياروان اني ما ابي غير راحتك وعشان كذا بوقف لك عند مكانك المفضل
ابتسمت روان من شافت الجبل الي تحب تروح له يوم تتضايق
عبدالعزيز:روان وش رايك نروح البيت نجيب عزبه لنا؟
روان:تم يلا
لف سيارته وغير مساره وراح البيت
___
جوان:يمه لا جت البنت الي عازمتها قولي لها ترقى لي
ام علي:يبنتي عيب والله ترقى لتس وهي ضيفه انزلي لها
جوان صدت وجلست على كرسي التسريحه:انتي قولي لها وبس
كانت بتتكلم بس رن على مسامعهم جرس البيت يعلن عن وجود زائر نزلت ام علي تفتح لهم ووصل جوان صوت امها وترحيبها الحار
مسكت مشينا وجلست تمشط شعرها وماهي دقايق الا وطق باب غرفتها
جوان:ادخل
دخلت اريج وتوسعت ابتسامتها من شافت جوان :سلام
جوان:وعليكم السلام غريبه قالت لتس امي بهالسرعه
عقدت حواجبها بعدم فهم:وش تقول لي مافهمت
جوان:ماقالت لتس امي ارقي عندي؟
اريج:لا رقيت عندتس من ارادتي محد قال لي
جوان:اها
سكرت اريج الباب وجلست على طرف السرير
حطت جوان المشط على التسريحه وقامت ولفت عليها
اريج:شعرتس حلو
جوان جلست جنبها:ابي ارسمتس
اخذت كراستها وفتحتها :لحضه بجيب قلم واجي
قامت واريج اخذت الكراسه وجلست تتفرج عليها كانت الرسومات قليله بس من بين هالرسومات كانت فيه رسمه ولد واقف وكان بمكان زي المحكمه ويصارخ وحوله الناس خايفين شد انتباها لانها كانت كلها الوان حلوه بعيده عن الاسود لاحضت بالزاويه فيه وحده مربطه وشعرها على وجهها وكانت مافيها الوان والواضح بالصوره ان الولد يدافع عن هاذي البنت والناس ضدها كانت الصوره تعني الف معنى والف شعور دب الخوف بقلب اريج من هالبنت الغريبه وسرحت بالصوره وملامح الولد والواضح انه صغير بالعمر كان جميل جداً قاطع سرحانها صوت جوان :هاذا اخوي اياد
سكرت الكراسه بفزع:ما كنت اقصد افتش بس قلت اشوف رسمتس
جلست جوان واخذت الكراسه وفتحت على الرسمه وجلست تتأملها:هاذي من اجمل الصور الي عندي واعزهم على قلبي لدرجه اني يوم رسمتها عجزت اتخلى عنها واعطيها اياد احبها حيل ومستحيل اتخلى عنها
كان الفضول يقتل اريج ودها تسأل عن اشياء كثيره ودها تقول ليه امك مو معترفه انك بنتها وليه انتي حابسه نفسك وليه وليه وليه عجزت تسكت وقالت :وش قصه الرسمه اذا عادي قولي لي
فتحت صفحه جديده ومسكت القلم وبدت ترسم خاب امل اريج وحست ان ماكان لازم تسأل بعد مده من الصمت الي دام بينهم قطعه صوت جوان الخافت:قبل اربع سنين كنت بالسجن
رفعت اريج راسها بفجيعه وكملت جوان وهي ترسم :بأتهام اعتداء وسرقه على كبير سن
عقدت اريج حواجبها :عادي تقولين اسمه؟
جوان :عدي علي ال...... بس ليه؟
اريج فتحت عيونها بصدمه :انتي انتي الي اعتدتي عليه؟!!!
جوان:تعرفينه؟
اريج:اي اي ابوي قال لنا السالفه بس مستحيل انتي تكفين قال انك سويتي اشياء فضيعه تكفين انكري
جوان:وش يفيد لو نكرت ؟ وش يفيد لو عليت صوتي وصراخت انا مضلومه ما يفيد شي بعد فوات الأوان
اريج:بس مستحيل يضلونك بسهوله يعني تعرفين الموضوع ذا حساس وبيحسبون لكل شي الف حساب
جوان:خليها على الله يا اريج
اريج:الا ما قلتي لي وش اسمتس؟
قامت جوان وفتحت درجها واخذت ورقه وسكرته ولفت على اريج ومدتها لها :اسمي جوان وابيك تكوني صديقتي
اخذت اريج الورقه بأبتسامه :بكون لتس احلا صديقه بروحي انتي
جوان جلست:لا عزمتس مرتن ثانيه تجين؟
اريج:لو نزلتي لأمي وشافتس اقدر اجي
جوان:بنزل بس بشرط بسرعه ارقى
اريج وقفت:تم يلا امشي بعد انا ابطيت على امي
رتبت جوان شكلها بالمرايه وطلعت مع اريج
_____
تركي شد يد جوري :جوريييي
جوري:وجعه مو قلت لك ما اعرفك ولا تعرفني ؟؟؟
تركي:خلينا من هالحتسي تعال عازمتس على احلى شاورما
جوري:تركي وش شاورما رح عني توني ماكله ذره
تركي:بالله ذره وش تسوي تراها بس تصبيره امشي خل نطفح ملحقتن على مغثه الملابس ماهو طاير عرس وليد
رنا دزت جوري وبهمس:امشي جيعانه انا
تركي سمعها:جيعانه وانا موجود ؟يخسي الجوع امشي امشي معي
مشو وراه ودخل تركي المطعم وجلسو على احد الطوايل كانت جوري فيها فضول تسأل عن رياض بس مستحيل لفت بتقول لرنا تسأل بدالها وقبل لا تقول لها رنا فهمتها وقالت:الا رياض وينه ما اشوفه
تركي:والله رياض شاف له وحده مزه وجالس يرقمها ههههه
دام الصمت بينهم دقايق اما رنا توترت
وجوري تصنمت واحترت عيونها حست بحرقه بحلقها اخذت المي الي قدامها وفضتها بمعدتها كلها وقامت:شبعت امش ودني البيت
تركي وقف:جوري وش بلاتس خل ناكل حتى رنا تقول جيعانه
رنا وقفت واحترمت موقف جوري:لا عادي انا اسوي لي اكل قل لرياض نبي نمشي
تركي هز راسه وطلع جواله يدق على رياض وفعلاً طلع رياض وركبو السياره لف عليهم:غريبه بسرعه خلصتو
جوري صدت عنه بعضب وعقد حواجبه وشغل السياره وهو مستغرب
سرحت جوري بالشوارع وبالها شارد وعيونها تحرقها
ما وعت الا على السياره توقفت رفعت راسها
رياض:وصلنا
نزلت بهدوء وبدون كلام وحاولت قد ما تقدر انها تمسك غضبها ولا تنفجر
رقت الدرج بخطوات سريعه وهي تحس ان خطواتها ثقيله تحس بخذلان دخلت الغرفه وسكرتها وفكت نقابها وشيلتها وعباياتها
حست بحراره مكان الحرق جلست تهوي نفسها بس مافيه فايده فتحت باب البلكونه وطير شعرها الهوى البارد حست بحرقه بقلبها فركت وجهها يدها بقوه ودخلت وسكرت الباب وانسدحت على السرير وغطت بأفكارها وتخيلاتها الي ما تزيد الا حرقه قلبها
اعطوه حقه 🤍
