ام علي جت ومعها فوطه :هاتس
قامت انتماء واخذتها:وين الحمامات؟
ام علي اشرت على وحده من الخدم:تعالي دليها على الحمامات
راحت انتماء معها :اسمعي ما ابي توديني حمامات برا هينا ابي جوا القصر
العامله:ليه مدام ما ابغى روح هاذا حمام؟
انتماء:لا تكثرين حتسي ويلا وديني
ودتها وقفت انتماء عند الحمام تنتضر العامله تروح بس ما راحت زفرت بقله صبر:يعني ناويه تغيرين لي الفوطه ولا شلون؟
العامله:لا مدام بس انا خوف انتي مافي...
قاطعتها انتماء:لا معليتس اعرف طريقي روحي
راحت العامله وراقبتها انتماء لين راحت وراحت وجلست ترقى الدرج لين وصلت وشافت الغرفه الي كانت واقفه ام علي عندها رجعت كم خطوه وركضت بقوه وهي تدخل الغرفه وسكرت الباب وراها على طول ويدها فوق صدرها شهقت جوان وهي تشوفها مدرعمه عليها
انتماء ناضرت فيها وانبهرت كيف بنت بتكون بهالجمال كأنها ملاك
وبتمثيل الخوف:اسفه ماكنت بدخل كذا بس فيه ...رجل يمه خفت والله
جوان صدت عنها وهاذا الي كانت ما تبيه يصير ان وحده من البنات تشوفها:اطلعي برا
انتماء:الله يخليتس والله معلم احد بس فيه واحد برا وشوفيني مفرعه ما علي حتى شيله
قامت جوان وهي تطلع شيلتها الي نادر تلبسها وقطتها على الارض:البسيها واطلعي برا
انصدمت انتماء من رده فعلها :طيب خليني شوي عندتس بعدين اطلع
جوان:اطلعي برا لو سمحتي
انتماء بتمثيل واضح عليها:لا خليني عندتس شوي وبعدين انتي ليه ما نزلتي لنا؟
جوان انتبهت للفوطه حقتها وعرفت الخطه ماهي غبيه عشان تجهل الاشياء هاذي وبهدوء:سمعتي بالي كانت تحاول تكذب قدام شخص شاف اقذر خلق ربي ؟
خافت انتماء ورجعت لورا
وكملت جوان بصرخه:شايفتنيييييي غبيه عشان اجهل خطه امثالتس؟
هاه؟هذاتس شفتيني وش صار هاه وش استفدتي قولي لي وش استفدتي ؟
مسكت انتماء من عند كتوفها وجلست تهزها:وش استفدتي ليه ما تنطقين؟
انتماء بخوف وبصوت متقطع:أأ..آسفه
وبصوت عالي:اطلعيييييي برااااا
طلعت انتماء ترجف ونزلت تحت وتوجهت للحمام وسكرت عليها الباب وبرجفه فتحت شنطتها وطلعت جوالها واتصلت على صقر
انتماء:صص..صقر
صقر:هلا وش فيه؟
انتماء:البنت مم..مجنونه
صقر :مقدر افهم منك شين قفلي واذا رجعنا قولي لي كل شي
قفلت وحطت الفوطه والجوال بالشنطه وطلعت بهدوء وراحت لهم
عند البنات الي تسولف والي تضبط مكياجها والي تكلم والي تتمشى
اريج الي طالعه من الحمام وتوجهت لأم علي :يخاله مافيه مي بالحمام
ام علي :صدز والله ما دريت طيب شوفي الحمام الي جوا اكيد فيه
دخلت اريج ورقت فوق ولقت حمام ودخلته
عند اياد قام واتصل على امه
اياد:يمه ابي اغير ثوبي انكب عليه عصير شوفي لي طريق
ام علي:رح من الباب الخلفي عيب ادخلك على البنيات كذا
سكر اياد وتوجه للباب الخلفي ودخل وراح للدرج وجلس يرقى
اريج كانت طالعه وشافت رجل راقي شهقت بقوه وسمعها اياد وناضرها وانفتن من رقتها وجمالها صد وهو يكلم نفسه(ما تحل لك ما تحل لك)اريج تورطت ومستحيل تمر من عنده دخلت غرفه الي قدامها وهي خايفه ويدها على قلبها
جوان :خير خير لايكون تبيني انتي الثانيه اصدقتس اطلعي بس
اريج وهي منزله راسها:آسفه معليش بس فيه رجل برا
جوان:تبين تجننيني والله لو انكم خبول ما سويتو كذا معقوله نفس الخطه جالسه تعيدينها صاحيه انتي؟
اريج لفت على الباب:مدري من انتي بس شكلتس ما تبيني اشوفتس وما راح اشوفتس بس والله ان فيه رجل برا
جوان حست بصدقها تقدمت وهي تفتح الباب وخلت اريج وراه وصدق شافت اياد واقف ومتصنم
جوان:وش فيه؟
اياد:معليش اعتذريلي منها ما شفتها
جوان:يعني هي صادقه انت شايفها؟
اياد هز براسه ودخل غرفته
جوان لفت على اريج الي كانت منزله راسها وتبكي
هزتها دموعها وقالت:ارفعي راستس
اريج رفعت راسها بتردد وانبهرت من جمالها الفاتن للعين
جوان:مكياجتس خرب روحي غسلي وجهتس وتعالي ضبطيه
اريج:بس اخاف يكون موجود
جوان:ما قلت لتس اطلعي شوفي الحمام وراتس
لفت اريج وشافت حمام الي ما انتبهت له يوم دخلت
دخلته اريج وجلست تمسح الكحل السايل وبعدها طلعت وشافت جوان جالسه على السرير ومعها دفتر اشرت على التسريحه :عندي مكياج استعمليه
توجهت اريج للتسريحه وهي لسى فيها رجفه وجلست تحط ايلاينر
اما جوان بدت ترسمها من ورا وكان شكلها جداً جميل وهي تتمكيج
خلصت اريج ولفت عليها:مدري وشلون اشكرت بس صدز شكرا
جوان خلصت الرسمه وشقتها من الكراسه ومدتها لاريج
اخذتها اريج وانبهرت منها بس عقدت حواجبها من شكل الرسمه كانت الرسمه بنت واقفه على المرايه وحولها ناس غريبين واشكالهم تخوف واريج كانت لافه عنهم وماهي داريه اصلا
اريج ناضرت جوان:وش معنى الرسمه؟
جوان:بعدين بتعرفين
اريج:طيب ليه عطيتيني ؟
جوان:ما عمري رسمت احد الا وعطيته
حل الصمت بالمكان وقطعته اريج تحاول تفتح سالفه :عادي تصيرين صديقتي؟
سكتت جوان ولفت عنها
واريج سفطت الورقه وحطتها على التسريحه :رجعيها لي اذا قبلتي تكوني صديقتي
جوان بهدوء:اعرفي انها ماراح توصلك ابد
اريج بنفس هدوئها:اجل بتكون عندتس للابد
طلعت وسكرت الباب وفضولها يذبحها
ما انتبهت للعيون الي تناضرها بأعجاب
عند اياد كان يناضر اريج وهو منفتن حيل فيها ولاول مره حس بشعور غريب بقلبه
جوري :اريج وينتس
اريج نزلت من الدرج:هاذاني
جوري:صاير لتس شين؟ليه طولتي
اريج:لا مو صاير شي بس ضيعت
مشت اريج معها واياد ابتسم بغباء وجلس يكلم نفسه(يعني هاذي اريج الي اخذت تفكيري بس ليه طالعه من غرفه جوان؟)راح للغرفه وطقها وسمحت له جوان
اياد:منهي البنت الي طلعت منتس؟
جوان:انت مخرعها وجت لي
اياد:اها عاد مسكينه انخرعت صدز
جوان قامت واخذت الورقه الي على الطاوله وحطتها بالكراسه
اياد:وش هاذي الورقه؟
جوان:رسمتها وجيت اعطيها قالت ما اخذها الا اذا قبلتي تصيرين صديقتي
اياد:وانتي وش قلتي؟
جوان:اكيد رفضت وبتعفن الصوره عندي ما اعطيتها
اياد ذبحه الفضول تقدم ويدينه ورا ضهره وعيونه على الكراسه :اشوف
جوان رفعت حواجبها:نعم؟
اياد:لا بس اشوف تقدماتك بالرسم وبعدين البنت شفتها يعني خلص لا تصيرين تسذا
جوان:اياد اطلع برا ما ابي اعصب عليك انت بالذات
اياد زفر وعرف ان مامنها رجى طلع وسكر الباب وهو يتوعد انه بيشوفها ونزل تحت وراح من الباب الخلفي للرجال
ام علي:اقلطو على عشاكن
تقدمن البنات وشافو طواله كبيره فيها كل انواع الاطباق من محاشي وسلطات وعصائر ومشاوي كل شي يخطر ببالكم موجود
شهقت روان وضربتها رنا وبهمس:وجع تقل مو شايفه خير
روان:لا شايفه خير بس ذا كله من ياكله
رنا بضحكه:نمسك ميعاد ونجحره بفمها وهي تعرفينها لو انه سم اكلته
ضحكت روان بقوه ولفو عليها البنات وقرصتها رنا وتداركت نفسها وقالت بتبربر:معليكم كولو تذكرت شي يضحك
بدو ياكلون البنات اما جوري حست مكان الحرق يشب نار استغربت لانه من زمان ما اوجعها قامت:الحمدالله
ام علي:يويلي يوليدي ما اكلتي
جوري:كثر الله خيرتس بس شبعت
راحت للحممات الي داخل وجلست تهوي نفسها بس الوجع كل ماله يزيد توجهت للمطبخ وهي تصب مي بارد وشربته يمكن يخفف مرت عليها نسمه هوا والتفت وشافت المطبخ فيه باب يطلع على حديقه ضلام نزلت كاسه المي على الطاوله وتوجهت للباب وطلعت وداهمتها نسمه هوا بارده اخذت نفس عميق وبدت ترتاح والوجع خف حيل تنهدت بضيق مشت وابعدت شوي عن الباب وشافت نخل كثير وكبير نزلت كعبها وربطت فستانها وتسلقته بمهاره الي محد يعرفها غيرها جلست على غصن قوي وتنهدت وهي تحس بضيقه بصدرها قويه بدت تمر ذكرايات سيئه قدامها الي اغلبهم كانت ساكته ولا تنطق حرف بعد مده طويله من التفكير سمعت صوت لفت وشافت عصفور يستنجد بها بصوت خافت مسكته وشافته مضروب وعليه دم حطته بيدها وباليد الثانيه مسكت الغصن وطبت من فوق لبست كعبها وحطت العصفور بشنطتها وخلتها فاتحه عشان ما ينكتم دخلت المطبخ وراحت لهم
ام كادي لابسه عباياتها وشافت جوري وراحت لها على طول وهي تتفحصها:فيتس شي ؟وينتس من اليوم ندورتس؟
جوري:رحت المطبخ ولهيت وش فيه؟
ام كادي:وينتس على الجوال من اليوم ادق عليتس
جوري طلعت جوالها وشافته طافي:يمه طافي جوالي من اليوم اصور وطفى عادي
ام كادي:اهم شي انتس بخير ويلا البسي عبايتس مشينا
لبست جوري عبايتها ونقابها وطلعت وشافت سياره بس مو سياره ابوها
اما رياض الي سافط سيارته بحيث يوم تركب تركب وراه
فتحت الباب وركبت وشافت ميعاد ورنا وتركي ورياض
جوري:وين امي؟
ميعاد:راحت مع وليد وتقول ما تكفي السياره قالت جيبوها انتم
جوري:ووين ابوي ليه هو ما رجعنا؟
تركي:ابوي قال عنده شغل ضروري وطلع على طول
حرك رياض السياره بهدوء
وقطع صمتهم صوت عصفور لفت رنا :تسمعون الي اسمعه؟
جوري ما تبي احد يعرف بدت تسوي اصوات بفمها:هاذا انا اسوي
ابتسم رياض الي اصلا شاف كل شي كان يصير ومن يوم هي طالعه من المطبخ
