معليش على التأخير كان عندي شويه ضروف
_________
اريج:بنات لازم نبدا من الجين تجهيزات مابقى عن العيد شي
جوري:اي والله حتى بعد لازم نشتري فساتين عرس وليد حددوه ثاني يوم العيد ترا
لفو على صوت تكسير صحون وشافو روان واقفه وعند رجولها صينيه وكاسات وفناجيل متكسره فزت ميعاد
ميعاد:وش فيتس
روان وبعيونها اثر الصدمه:قلتي عرس من؟
جوري بأستغراب:وليد على جود ليه ما تدرين؟
روان هزت راسها بالنفي وملامحها تعتليهم الصدمه
جوري قامت :وش فيتس مو انتي حضرتي ملكتهم معقوله ما تدرين وانا بعد قلت لكن
روان لفت وطلعت وهي رافضه فكره ان وليد راح منها لفت حجابها وبعيونها احر الدموع تحس انها تختنق مو قادره تتنفس
طلعت برا تنادي:عبدالعزيز عبدالعزيز
طلع عزوز وراه وليد :وش فيه وش صاير؟
روان وهي تتحاشى النضر لوليد:ابي اطلع وابيك توديني
عبدالعزيز لمح بعيونها الحزن والدموع لف ودخل الدوانيه:بجيب المفتاح
روان حطت عينها بعين وليد وكانت نضره مليانه حقد وحزن وخذلان مليانه كلام واحاسيس وعتاب لمعت دمعه بعينها وصدت على طول من طاحت دمعتها
وليد :عسى ماهو شر وش فيتس ؟
روان من غصتها مو قادره تتكلم تحس بشعور يخنق شعور اول مره تحس فيه كانت راسمه احلامها معه ومستقبلها كله معه كانت مختاره حتى الفلم الي بخاطرها تتابعه معه كانت تكتب عنه كل ليله حبته حب طاهر حقيقي كيف يصير معها كذا تعاتب نفسها وتلوم نفسها كثير على حبها كيف يتزوج كيف؟
تحس بغصه توجع وشعور يوجع حيل تحس انها مخنوقه ومو قادره تتنفس ضاق التنفس عندها وضاقت فيها الوسيعه الدموع بعيونها مو مخليتها تشوف شي كان الدموع تنزل بدون اي تعبير منها كانت تحس بشعور شنيع ويعور
طلع عبدالعزيز :يلا
مشى ومشت وراه وقبل لا تتعدى وليد همست بغصه واضحه عليها :
ما بغيتك بالحرام ولا بغيتك من عبث
ما بغيت الا ورقه تجمعنا بالحلال
اجتمعن الدموع بعيونها ومشت وهي كلها خذلان
وليد عقد حواجبه بعدم فهم ودخل وهو مستغرب من كلامها
ركبت السياره وحرك عبدالعزيز وعم الصمت بينهم
عبدالعزيز بمحاوله تلطيف جو :عندي لتس خبر يجنن
هزت راسها وكمل:افتحي الدرج الي قدامك
مدت يدها وفتحته :شوفي الاوراق الموجوده وبتعلمك سبب غيابي وعدم اجتماعي معكم
اخذت الورقه وفتحتها وتوسعو عيونها بصدمه
لفت عليه:شاري بيت؟من له؟
عبدالعزيز :مو بس بيت بعد شوفي شيك مبلغ كبير
روان:من له؟؟؟؟
عبدالعزيز :الصراحه انا ابي اخطب واتزوج وأسس اسره عشان كذا شريت بيت والمهر جاهز
ابتسمت روان بذهول:احلف
عبدالعزيز:ما تبين تعرفين منهي الي بخطبها؟
روان:خلني اتوقع
رفعت نضرها فوق تفكر وفزت :جوري؟
عبدالعزيز:لا
روان بأستغراب:اريج؟
هز راسه بالنفي :كادي؟
عبدالعزيز:لا
روان:ميهاف؟
عبدالعزيز:لا
روان تذكرت اسم وقالت بتردد وكأنها خايفه من الاجابه:ج.. جود ؟
فز عبدالعزيز:جبتيها جود
روان حست بمويه بارده انكبت عليها من هول الخبر وكمل عبدالعزيز بحماس :تخيلي اني من شفتها وانا حاطها ببالي وسمعت انها تحب اللون الابيض حيل عشان كذا خليت أثثت البيت باللون الابيض وخليتهم يسوون مسبح بالحوش لاني مره سمعتها تقول نفسي اتعلم السباحه وقررت اني اعلمها لما نتزوج
لفت روان وماقدرت تعلمه ما قدرت ابد
روان:عبدالعزيز انت تهورت مره وش عرفك انها بترفض ولا لا؟
عبدالعزيز:لا معليك انا مجهز لكل شي
روان :شلون؟
عبدالعزيز:انشاءالله بقى شوي ويجهز البيت وكل شي واخطبها من ابوها ثاني يوم العيد
لفت روان عليه بصدمه:لا ما يصير ثاني يوم العيد
عبدالعزيز:ليه وش فيها؟
روان بترقيعه:نسيت ان عرس وليد ثاني يوم العيد؟
عبدالعزيز :صدق حددو عرسه؟ عاد حسافه والله مقدرت احضر ملكته بس عادي حتى لو بعرسه يعني اخطبها قدام الرجال وكذا
روان هزت راسها بنفي:لا لا ما تقدر
عبدالعزيز:بس وش السبب انك ما تبيني اخطب ثاني يوم العيد؟
روان بأنفعال:بدون سبب
عبدالعزيز حس ان فيه شي :روان وش فيه؟
روان توترت وهزت راسها:مافيه شي بعدين انا طالعه معك اتونس تضيق خلقي ليه ؟
عبدالعزيز وكأنه تذكر:الا تعالي وش فيك متضايقه ؟
نزلت راسها بضيق:ولا شي بس كنت ابي اطلع ضايق خلقي وبنفس الوقت اشتقت لك صرنا ما نشوفك كثير
عبدالعزيز:تقولين هالكلام لميعاد مو لتؤمك الي انولد معك ياروان
روان:عبدالعزيز قلت مافيني شي لا تضغط علي
هز راسه وهو فعلا ما يبي يضغط عليها
____________
جوري :بنات وش فيها؟
ميعاد:مدري والله
اريج:ليه هي ما تعرف عن خطبه وليد؟
رنا:يوم قلتي لنا منهو الي خطبها كانت مو موجوده
ميعاد :انا بقوم اشيل القزاز لا يجرح احد
رنا :وانا بروح لرياض بقول له شي
راحت رنا لرياض وجلست تناديه
تركي طلع:هلا وش فيه
رنا وهي تتحاشى النضر له:ناد رياض ابيه بموضوع
ابتسم تركي وحك راسه من ورا:هذاك الموضوع
رنا:اقول ناد رياض بس
تركي:عادي قولي لي رايتس انا الي بخطب مو رياض
رنا وسعت عيونها:تركي استح على وجهك وناد لي رياض
تركي:يخبله اسهل عليتس المهمه ترا رياض بتستحين منوه
رنا:استحي منك ولا استحي منه
تركي:تستحين من رجلتس؟
رنا دفته:وجعه
ضحك تركي :واهههه يزينها من لسانتس
ضحكت رنا وحطت يدها على فمها
رياض من وراهم :نعم نعم وش تسوين ما باقي تملكتو؟؟
تركي:يولد علامك علينا
رياض :اقول ابعد ابعد وجع
تركي:والله مردوده يارياض
رياض بضحكه:اتمنى ما تردها
تركي:لا معليك بس انتضر
راح تركي ولف رياض على رنا والابتسامه شاقه وجهه :وش بغيتي
رنا وهي مدنقه راسها :الي تشوفه
رياض انفجر ضحك:يويلي ترا انتي الي بتتزوجينه ماهو انا هههههههه
رنا ضربته :وجعه
رياض:طيب انتي وش رايتس يعني تحسين مناسب؟
رنا هزت راسها:استخرت الحمدالله وارتحت
هز راسه:الحمدالله
ولف يدخل:انا بقول له وانتي ادخلي داخل
عند تركي اول ما شاف رياض دخل فز على طول له
تركي بهمس:ها بشر
رياض:اقول اهجد بس
تركي مسك يده:رياض وجعه
رياض :مالك نصيب عندنا ياتركي
تركي بردت ملامح وجهه:وش تقصد يارياض تكلم زين
رياض:رنا مو موافقه عليك ياتركي
تركي:وشهو الي تقوله يارياض ؟؟
رياض:وش بلاك اقول لك مو موافقه افهم
تركي :رياض لا تستهبل
رياض وهو كاتم الضحكه:زي ما سمعت مو موافقه رنا عليك
تركي:ليه مو موافقه؟
رياض:تقول بس يقول وجعه وش ابي فيه
تركي عقد حواجبه :رياض ليكون الي فبالي
انفجر رياض ضحك
ابتسم تركي براحه :والله لو اني مو مستانس كان دبيتك دب
رياض :هههههه يويلي وجهك تغير لونه
تركي:لعبت بأعصابي يولد
رياض ربت على كتفه:اخطب من ابوي جتك الموافقه ياتركي
تركي:ايه هاذا الكلام الزين
رياض جلس وحط رجل على رجل:ابي قهوه
ضحك تركي ومسك الدله:ابشر ابشر تحضر لك احلا قهوه
مد الفنجان له
رياض:باليمين
عقد حواجبه وناضر يده :طيب هاذي اليمين
رياض :لا هاذي اليسار
تركي نزل الدله والفنجان وجلس يناضر يدينه بعد فهم
ضحك رياض بقوه :يربي يتركي
ضربه تركي بقوه على كتفه:على شحم شككتني بنفسي
رياض :هههههه عطني عطني الفنجان خلنا نتحلى
تركي حط عنده صينيه الحلا :اطفح منوه جعلك الماحي
رياض اخذ حبه حلا وهو يضحك
_________
انتماء:صقر قم قم يلا ودنا السوق
فز صقر بشهقه :وش فيه
انتماء:وش بلاك خرعتني؟
صقر وهو يمسح على وجهه:لا بس كابوس
انتماء تكتفت:تشوف انا دايم انقذك من الكوابيس
صقر :طيب يالمنقذه وش ودتس ما تخلين احد يرتاح ؟
انتماء:لا محد يرتاح عندي انا يلا كلنا تحت نحتريك نبي تودينا السوق
نزلت انتماء وراح صقر الحمام ووغسل وجهه وهو يناضر المرايه كان الحلم على انه يخوف الا ان صقر كان مره مستانس انه شافها
كانت بالحلم لابسه اسود وشعرها مغطي وجهها وكان معها فرشايه رسم كلها لون احمر وتقرب من صقر وتقول :
ازعجتني بتفكيرك فيني
وكانت ترددها وهي تقرب اكثر لين لصق صقر على الجدار وصارت قريبه منه وهمست بأذنه:
لاعاد اشوفك بأحلامي ملاحقني ياصقر!
هز راسه بأنزاعاج وطلع من الحمام ولبس على السريع ثوبه وطلع
__________________
وجدان تكلم بالجوال :سعود تعال ودني السوق بشتري للعيد
سعود:وجدانوه ماني فاضي لتس عندي يا كثر الزباين
وجدان بتذمر:اوف منك طيب انا وش البس للعيد هاه؟
سعود بحنيه: وجداني ما قلت ما بوديتس بس والله عندي يكثر الزباين اطلع واخليهم ما يصير
وجدان :طيب خلص بطلب تكسي
سعود:وش تطلبين تكسي لا انا ليا جيت بوديتس خلص
وجدان:طيب طيب بس جب لي من عندك حلا وقهوه يويلك تنسى
سعود :هههه ابشري ابشري يلا باي
قفل وبدا يكمل شغله ويسوي الطلبات
