دياجير الغرام

بارت السادس و العشرون

علَىٰ احساسك أخافن مو علَىٰ احساسي
لِـهـذا اِمْن اَحتضر ماريدك اتقاسي
خل نفرُض وَسط حِجرك تحط راسي
اْو بين اِيديك ألفُظ آخِر اَنفاسي
هالصوره تِظَل تِذكُرها ماناسي
يعز اِعليّه حالك يا أعز ناسي
يا بالحسن خلّيني وَحدي اْو أغمُّض عيني
رحمه ابشعورك  ياحيدر رحمه ابشعورك
اْولا تمسح اعله اجبيني اْو يمك أمد ايديني
رحمه ابشعورك ياحيدر رحمه ابشعورك
ذِكرىٰ اْو تصَدعك  ماريد اَودعك
————————
زمرد /

كلنا خايفين من اگول خوف يعني بمعنى الكلمة ! اي نفر موجود هنا الخوف مسيطر على ملامحو و حركاتو

عيوني تجول على الي حولي ، كلهم يبين حبهم للي جوة ، لزمهرير ، ما انكر شگد يحبوها و شگد هي محبوبة

اشوف الاذية بوجوهم ، اشوف ابوها بعمامها شلون يندعون و ينخون اشوف اخوها بمهيب شلون يرجف رجف حتى شعر راسو يرجف

زمهرير ما فقدت احد كلهم موجودين هنا ، اشوف حب ابوها و اخوها و حنانهم و دلالهم و خوفهم ب اجود

ما ركد ولا گعد ولا لسانو وگف عن الدعاء ولا ثانية وحدة حتى ما بقى طبيب ما وصا

بعد ما انطونا الخبر عن اطفالها و عنها البچي صار بفلس ، رحنا للطوارئ و اهلها تطشروا

هذا الي يخابر طبيب يعرفو و ذاك الي راح يسأل عن حالتها و هذاك الي راح يسأل عن احسن طبيب تا ياخذوها اله

و هذه الي تحمد الله و تشكره لهسه عايشة و هذه الي تبچي و دموعها ما وگفت المستشفى انخبص و انا ؟

ما اعرف شنو احساسي بس صدقت بقول الله تعالى : ( الله لا يكلف نفساً الا وسعها )

من الله سبحانه و تعالى اخذ امانتو كان يدري في احد وراهم و يحميهم غير ابوهم و اخوهم

و حتى هسه اذا الله سبحانه اخذ امانه زمهرير يعرف اكو احذ وره اطفالها مستحيل يتركوهم

مر اسبوعين و على نفس الحالة ، بلقيس حالتها زينة و گدرنا ناخذها للبيت بس مهيار ابد

صار بي ابو صفار و احتمال قصور الغدة الدرقية ، چان الغذاء كله يوصل لبلقيس و هو لا

اجود ميت على ابنو يگول ليش هيجي حظة ، چان مهيار شكلة يموت بچي صغير كلش و حليگو دوم مفتوح و شفايفو بيض بسبب ابو صفار الي يشوفو يشبع بچي

هو يحتاج حليب امو بس امو تعبانة ، زمهرير لهسه بغيبوبة و حالتها كل ما جايها للاسوء ، مرتين تنخفض نبضات قلبها و ترجع طبيعي تحطنا كلنا بأنذار